ഡിടിപിസി ഓഫീസ് കെട്ടിടം ശോചനീയാവസ്ഥയിൽ; പൊളിച്ചുപണിയാൻ സമർപ്പിച്ച പദ്ധതി എങ്ങുമെത്തിയില്ല

കാസർകോട്: (KasargodVartha) ജില്ലയുടെ വിനോദസഞ്ചാര വികസനത്തിന് പദ്ധതി തയ്യാറാക്കി നടപ്പിലാക്കേണ്ടതും ടൂറിസ്റ്റുകളും സംരംഭകരും വന്നുപോകുന്നതുമായ ജില്ലാ ടൂറിസം പ്രൊമോഷൻ കൗൺസിലിന്റെ ഓഫീസ് കെട്ടിടം ശോചനീയാവസ്ഥയിൽ. ജില്ലാ കളക്ടർ ചെയർമാനായ സമിതിയുടെ ഓഫീസ് കെട്ടിടത്തിനകത്ത് പലയിടത്തും വിള്ളലുകൾ പ്രത്യക്ഷപ്പെട്ടിട്ടുണ്ട്.

ദേശീയപാതയുടെ സർവീസ് റോഡ് കടന്നുപോകുന്ന മുൻവശത്ത് മതിലില്ലാത്ത അവസ്ഥയിലാണ്. മാത്രമല്ല, പാറക്കട്ട കെട്ടിയ റോഡിന്റെ വശത്തുള്ള മതിൽ ഏത് സമയവും തകർന്നു വീഴാവുന്ന നിലയിലുമാണ് നിലനിൽക്കുന്നത്. 

ഓഫീസ് കെട്ടിടം റോഡിൽ നിന്നും ഏകദേശം ഒരു മീറ്റർ ഉയരത്തിലാണ് സ്ഥിതി ചെയ്യുന്നത്. എന്നാൽ, ഓഫീസിലേക്ക് കയറിച്ചെല്ലാൻ ശരിയായ പടികൾ പോലുമില്ലാത്തത് ബുദ്ധിമുട്ടുണ്ടാക്കുന്നു.

ഡിടിപിസി ഓഫീസ് കെട്ടിടം പുതുക്കിപ്പണിയാൻ നേരത്തെ കൗൺസിലിന്റെ അംഗീകാരത്തിനായി പദ്ധതി സമർപ്പിച്ചെങ്കിലും തുടർനടപടികൾ ഉണ്ടായില്ല. താഴെ വാണിജ്യ ആവശ്യങ്ങൾക്കായുള്ള സൗകര്യവും മുകളിൽ ഓഫീസുമായി കെട്ടിടം പുതുക്കിപ്പണിയാനാണ് പദ്ധതിയിട്ടിരുന്നത്. എന്നാൽ ഈ പദ്ധതി എങ്ങുമെത്തിയിരുന്നില്ല.

ദേശീയപാത വികസനം പൂർത്തിയാവുന്നതോടെ ജില്ലയുടെ ടൂറിസം മേഖലയുടെ മുഖമുദ്രയാകേണ്ടതാണ് ഡിടിപിസി ഓഫീസ്. ഈ സാഹചര്യത്തിൽ, ശോചനീയാവസ്ഥയിലായ ഓഫീസ് കെട്ടിടം അടിയന്തരമായി പുതുക്കിപ്പണിയണം എന്ന ആവശ്യം ശക്തമാവുകയാണ്.

കാസർകോട്ടെ ടൂറിസം വികസനത്തിന് ഈ കെട്ടിടത്തിൻ്റെ ശോചനീയാവസ്ഥ തടസ്സമാവില്ലേ? നിങ്ങളുടെ അഭിപ്രായങ്ങൾ കമന്റ് ചെയ്യുക. 

Article Summary: Kasaragod DTPC office building is dilapidated; renovation project stalled, prompting urgent public demand.

#KasargodTourism #DTPC #OfficeRenovation #KeralaTourism #Infrastructure #KasaragodNews