കാസർകോട് നഗര പരിധിയിലെ പ്രധാന ടൂറിസം കേന്ദ്രങ്ങളെ കോർത്തിണക്കി ടൂറിസം സർക്യൂട്ട് പദ്ധതി വരുന്നു; നെല്ലിക്കുന്ന് കസബ ഹാർബർ ഉൾപ്പെടെയുള്ള തീരദേശ മേഖലയെ വികസിപ്പിക്കാൻ നടപടികൾ ആരംഭിച്ചു

കാസർകോട്: (KasargodVartha) കാസർകോട് നഗര പരിധിയിലെ പ്രധാന ടൂറിസം കേന്ദ്രങ്ങളെ കോർത്തിണക്കി 'കാസർകോട് ടൂറിസം സർക്യൂട്ട്' പദ്ധതി യാഥാർത്ഥ്യമാക്കാൻ ജില്ലാ ഭരണകൂടം ഒരുങ്ങുന്നു. നെല്ലിക്കുന്ന് കസബ ഹാർബർ ഉൾപ്പെടെയുള്ള തീരദേശ മേഖലയെ മികച്ച ടൂറിസം കേന്ദ്രമായി വികസിപ്പിക്കുന്നതിനുള്ള നവീന പദ്ധതികൾക്കാണ് തുടക്കമിടുന്നത്. 

ഇതിനായി ജില്ലാ ഭരണകൂടം, കാസർകോട് നഗരസഭ, ടൂറിസം വകുപ്പ് എന്നിവയുടെ സംയുക്ത ആഭിമുഖ്യത്തിൽ രൂപരേഖ തയ്യാറാക്കി വരികയാണ്. പദ്ധതിയുടെ വിശദമായ പ്രൊജക്ട് റിപ്പോർട്ട് (ഡിപിആർ) അടിയന്തരമായി തയ്യാറാക്കി സമർപ്പിക്കാൻ ജില്ലാ കളക്ടർ അർജുൻ പാണ്ഡ്യൻ ഡിടിപിസിക്ക് നിർദ്ദേശം നൽകി.

വികസന പദ്ധതികൾ

ജില്ലാ കളക്ടറുടെ നേതൃത്വത്തിലുള്ള സംഘം ഹാർബർ പുലിമുട്ട് ബീച്ച്, കോർണിഷ് ചിൽഡ്രൻസ് പാർക്ക്, ലൈറ്റ് ഹൗസ്, തളങ്കര പടിഞ്ഞാറ്, സീവ്യൂ പാർക്ക്, ഗുഡ് വൈബ്സ് ഡിടിപിസി അമ്നെറ്റി സെൻ്റർ തുടങ്ങിയ കേന്ദ്രങ്ങൾ സന്ദർശിച്ച് സ്ഥിതിഗതികൾ വിലയിരുത്തി. പ്രകൃതി സൗന്ദര്യത്തിന് കോട്ടം തട്ടാതെ ശരിയായ വെളിച്ചം, ശുചിമുറി, പാർക്കിങ് സൗകര്യം, കടകൾ, ഇരിപ്പിടങ്ങൾ, സാഹസിക വിനോദസഞ്ചാര പ്രവർത്തനങ്ങൾ എന്നിവ പദ്ധതിയിൽ ഉൾപ്പെടുത്തും. 

ഹാർബർ പുലിമുട്ടിലേക്കുള്ള റോഡിൻ്റെ നിർമാണവും പുലിമുട്ടിൽ സിസിടിവി ക്യാമറകളും സ്ഥാപിക്കുമെന്ന് ഹാർബർ എൻജിനീയറിങ് വിഭാഗം അറിയിച്ചു. തീരദേശ നിയന്ത്രണ ചട്ടങ്ങൾ (സിആർസെഡ്) പൂർണ്ണമായും പാലിച്ചായിരിക്കും നിർമാണ പ്രവൃത്തികൾ നടക്കുക.

ലൈറ്റ് ഹൗസ് സന്ദർശനം

കാസർകോട് ലൈറ്റ് ഹൗസിലെ സന്ദർശന സമയം വർധിപ്പിക്കാൻ കേന്ദ്ര പോർട്ട്, ഷിപ്പിങ് & വാട്ടർവേയ്സ് മന്ത്രാലയത്തോട് ആവശ്യപ്പെടുമെന്ന് ജില്ലാ കളക്ടർ അറിയിച്ചു. നിലവിൽ വൈകിട്ട് 4 മുതൽ 5.30 വരെ മാത്രമാണ് ഇവിടെ പ്രവേശനം. ഇത് മറ്റ് പ്രധാന ലൈറ്റ് ഹൗസുകളിലേതുപോലെ രാവിലെ 10 മണി മുതൽ വൈകിട്ട് 5 മണി വരെയാക്കാൻ അനുമതി തേടി ലൈറ്റ് ഷിപ്സ് & ലൈറ്റ് ഹൗസ് ഡയറക്ടർക്ക് കത്തയക്കും. 

തളങ്കര പ്രദേശത്ത് കേരള മാരിടൈം ബോർഡും നഗരസഭയും ചേർന്ന് ടൂറിസം വികസനം സാധ്യമാക്കുമെന്നും, തളങ്കര പാർക്കിൻ്റെ വികസനം പിപിപി മോഡലിൽ നടപ്പാക്കുമെന്നും പോർട്ട് കൺസർവേറ്റർ മുഹമ്മദ് റാഫി അറിയിച്ചു. തളങ്കര പടിഞ്ഞാറ് ഭാഗത്ത് കേരള മാരിടൈം ബോർഡിൻ്റെ നേതൃത്വത്തിൽ പൊതു-സ്വകാര്യ പങ്കാളിത്തത്തോടെ ടൂറിസം പ്രൊജക്ട് നടപ്പിലാക്കുന്നതിനുള്ള ടെണ്ടർ നടപടികൾ പുരോഗമിക്കുകയാണ്.

അനുബന്ധ പരിപാടികൾ

ടൂറിസം സർക്യൂട്ടിൻ്റെ വിളംബരത്തോടനുബന്ധിച്ച് നെല്ലിക്കുന്ന് ബീച്ചിൽ കാസർകോട് എംഎൽഎ കല്ലട്ര മാഹിൻ ഫ്ലാഗ് ഓഫ് ചെയ്ത 'ബീച്ച് റൺ' സംഘടിപ്പിച്ചു. തുടർന്ന് നഗരസഭയുടെ നേതൃത്വത്തിൽ മെഗാ ബീച്ച് ശുചീകരണവും നടന്നു. ജില്ലാ കളക്ടറുടെ നേതൃത്വത്തിൽ നഗരവനം പദ്ധതിയും സന്ദർശിച്ചു. 

സാമൂഹിക വനവൽക്കരണ വിഭാഗത്തിൻ്റെ മേൽനോട്ടത്തിൽ നഗരവനം ഉടൻ പ്രവർത്തനം ആരംഭിക്കുമെന്ന് അധികൃതർ അറിയിച്ചു. നഗരസഭയുടെ ഉടമസ്ഥതയിലുള്ള പാർക്കുകളുടെ വികസനം വേഗത്തിലാക്കുമെന്ന് ചെയർപേഴ്സൺ ഷാഹിന സലിം വ്യക്തമാക്കി. അമൃത് ഭാരത് പദ്ധതിയിൽ ഉൾപ്പെടുത്തി ലൈറ്റ് ഹൗസിന് മുൻവശത്തായി വിപുലമായ പാർക്ക് നിർമിക്കുന്നതിനുള്ള നടപടികൾ അവസാന ഘട്ടത്തിലാണ്.

സംഘത്തിൽ കാസർകോട് നഗരസഭ ചെയർപേഴ്സൺ ഷാഹിന സലിം, വൈസ് ചെയർപേഴ്സൺ കെ എം ഹനീഫ്, സ്റ്റാൻ്റിങ് കമ്മിറ്റി ചെയർപേഴ്സൻമാരായ ജാഫർ കമാൽ, ഹമീദ് ബദിര, സമീന മുജീബ്, വിദ്യാശ്രീ, മഹറൂനീസ ഹമീദ്, കൗൺസിലർമാരായ ആർ രഞ്ജിഷ, ആയിഷ, ആർ രേഷ്മ, അബ്ദുൽ റഹ്‌മാൻ, സലിം, ടൂറിസം ഡെപ്യൂട്ടി ഡയറക്ടർ എ നസീബ്, ഡിടിപിസി സെക്രട്ടറി ജെ കെ ജിജേഷ്, ജില്ലാ ഇൻഫർമേഷൻ ഓഫീസർ എം മധുസൂദനൻ, ഹാർബർ എൻജിനീയറിങ് എക്സിക്യൂട്ടിവ് എൻജിനീയർ കെ രൂപേഷ്, ബാബുമോൻ, എം രാജീവൻ, സർവ്വേ വകുപ്പ് അസിസ്റ്റൻ്റ് ഡയറക്ടർ എസ് ഫാൻ്റിൻ കോർണെലിയെസ്, പോർട്ട് കൺസർവേറ്റർ മുഹമ്മദ് റാഫി, തഹസിൽദാർ എൻ ശ്രീകുമാർ, വില്ലേജ് ഓഫീസർ ഉമർ ഫാറൂഖ് തുടങ്ങിയവർ പങ്കെടുത്തു.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകൾക്കായി ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം.

Article Summary: The Kasaragod district administration is set to realize the 'Kasargod Tourism Circuit' project by connecting major tourism spots in the city. District Collector Arjun Pandyan has directed the DTPC to prepare a Detailed Project Report (DPR).

#KasargodTourism #CoastalTourismCircuit #KasargodNews #KeralaTourism #DevelopmentProjects #Lighthouse #DTPC #AparnaNews