കാസർകോട് നഗരത്തിൽ ഓടിക്കൊണ്ടിരുന്ന കാറിന് തീപിടിച്ചു; ഡ്രൈവർ തലനാരിഴക്ക് രക്ഷപ്പെട്ടു

കാസർകോട്: (KasargodVartha) നഗരത്തിൻ്റെ ഹൃദയഭാഗമായ പഴയ പ്രസ് ക്ലബ് ജംഗ്ഷനിൽ ഓടികൊണ്ടിരുന്ന കാറിന് തീപിടിച്ചു. വെള്ളിയാഴ്ച പുലർച്ചെ നാല് മണിയോടെയാണ് സംഭവം. ചെർക്കളയിലെ അബ്ദുല്ല എന്നയാൾ ഓടിച്ചിരുന്ന മാരുതി ആൾട്ടോ കാറിനാണ് തീപിടിത്തമുണ്ടായത്.
റെയിൽവേ സ്റ്റേഷനിലേക്ക് പോവുകയായിരുന്ന അബ്ദുല്ല കാറിൻ്റെ മുൻഭാഗത്ത് നിന്നും തീയും പുകയും ഉയരുന്നത് കണ്ട ഉടൻ തന്നെ വാഹനം നിർത്തി പുറത്തേക്ക് ഇറങ്ങിയതിനാൽ തലനാരിഴയ്ക്ക് രക്ഷപ്പെടുകയായിരുന്നു.

സംഭവത്തിൻ്റെ വിശദാംശങ്ങളും രക്ഷാപ്രവർത്തനവും

വാഹനത്തിൽ നിന്നും തീ ആളിപ്പടരുന്നത് കണ്ട ഉടൻ തന്നെ അബ്ദുല്ല അഗ്നിശമന സേനയെ വിവരമറിയിക്കുകയായിരുന്നു. സീനിയർ ഫയർ ആൻഡ് റെസ്‌ക്യൂ ഓഫീസർ വി. സുകുവിൻ്റെ നേതൃത്വത്തിൽ സ്ഥലത്തെത്തിയ അഗ്നിശമനസേനയുടെ രണ്ട് യൂണിറ്റ് ഫയർ എൻജിനുകൾ അതിവേഗം തീ അണച്ചു.

തീ അണച്ചെങ്കിലും കാറിൻ്റെ മുൻഭാഗം പൂർണ്ണമായും കത്തി നശിച്ചിരുന്നു. നടുറോഡിൽ നിർത്തിയിട്ട വാഹനം കാരണം ഗതാഗതക്കുരുക്ക് ഉണ്ടാവാതിരിക്കാൻ ഉടൻ തന്നെ വാഹനം റോഡിൻ്റെ വശത്തേക്ക് മാറ്റുകയും ഗതാഗതം പുനഃസ്ഥാപിക്കുകയും ചെയ്തു.

രക്ഷാപ്രവർത്തനത്തിൽ അഗ്നിശമനസേന ഉദ്യോഗസ്ഥരായ രാജേഷ്, അഭിലാഷ്, മുഹമ്മദ് സിറാജുദ്ദീൻ, അരുണ പി. നായർ, ശ്രീജിഷ്, അനന്തു, ഷൈജു എന്നിവർ പങ്കെടുത്തു. അഗ്നിബാധയുടെ കാരണം സംബന്ധിച്ച് കൂടുതൽ വിവരങ്ങൾ ലഭ്യമായിട്ടില്ല.

ഓടിക്കൊണ്ടിരിക്കുന്ന വാഹനങ്ങളിൽ തീപിടിത്തമുണ്ടാകാനുള്ള കാരണങ്ങളെക്കുറിച്ച് നിങ്ങളുടെ അഭിപ്രായം കമൻ്റ് ചെയ്യുക.

Article Summary: Car Catches Fire in Kasaragod Driver Escapes.

#CarFire #Kasaragod #KasaragodNews #FireAccident #DriverEscapes #MarutiAlto