കാസർകോട് ബാങ്ക് റോഡിൽ രൂക്ഷമായ ഗതാഗതക്കുരുക്ക്: ബസ് സമയക്രമം തെറ്റുന്നു, ജീവനക്കാർ തമ്മിൽ വാഗ്വാദം പതിവാകുന്നു

കാസർകോട്: (KasargodVartha) ജില്ലയിലെ പൊട്ടിപ്പൊളിഞ്ഞ റോഡുകൾ വീതികൂട്ടി ടാറിങ് നടത്തി ഗതാഗതയോഗ്യമാക്കിയെങ്കിലും കാസർകോട് ബാങ്ക് റോഡിലെ ഗതാഗതക്കുരുക്കിന് അയവില്ല. ഇവിടെ ബസുകൾ കുരുക്കിൽപ്പെടുന്നത് നിത്യസംഭവമായതോടെ സമയക്രമം പാലിക്കാൻ കഴിയാതെ ജീവനക്കാർ തമ്മിൽ വാഗ്വാദത്തിൽ ഏർപ്പെടുന്നത് പതിവായിരിക്കുകയാണ്.

ഗതാഗതക്കുരുക്കിന്റെ പേരിൽ മംഗളൂരു-കാസർകോട് കെഎസ്ആർടിസി ബസുകൾ പുതിയ ബസ് സ്റ്റാൻഡിൽ കയറാതെ നേരെ മംഗളൂരിലേക്ക് പോകുന്നതും യാത്രക്കാർക്ക് വലിയ ദുരിതമാകുന്നുണ്ട്. പുതിയ സ്റ്റാൻഡിൽ ബസ് കാത്തുനിൽക്കുന്ന യാത്രക്കാർ ഇതോടെ പെരുവഴിയിലാകുന്ന അവസ്ഥയാണ്.

ബാങ്ക് റോഡ് ജങ്ഷനിൽ എല്ലാ സമയത്തും ട്രാഫിക് നിയന്ത്രിക്കാൻ പോലീസിന്റെ സേവനം ഉണ്ടാകാറില്ല. ഈ സമയങ്ങളിലാണ് ഏറ്റവും വലിയ കുരുക്ക് അനുഭവപ്പെടുന്നത്. ജില്ലയിലെ മികച്ച പോലീസ് സ്റ്റേഷനായി തിരഞ്ഞെടുക്കപ്പെട്ട കാസർകോട് പോലീസ് സ്റ്റേഷന് മുന്നിലാണ് ഈ സ്ഥിതി എന്നതും ശ്രദ്ധേയമാണ്. ഇവിടെ സ്ഥിരമായി ട്രാഫിക് പോലീസിന്റെ സേവനം വേണമെന്ന് വ്യാപാരികളും വാഹന ഉടമകളും ബസ് ജീവനക്കാരും ആവശ്യപ്പെടാൻ തുടങ്ങിയിട്ട് കാലമേറെയായി.

ടൗൺ കേന്ദ്രീകരിച്ച് വലിയ തോതിലുള്ള ട്രാഫിക് പരിഷ്കരണം ആവിഷ്കരിച്ച് നടപ്പിലാക്കുമെന്ന് നേരത്തെ നഗരസഭയും പോലീസ് മേധാവികളും അറിയിച്ചിരുന്നതാണ്. കെഎസ്ആർടിസി ബസ് സ്റ്റാൻഡ് ഉൾക്കൊള്ളുന്ന ബാങ്ക് റോഡ് വൺവേ സംവിധാനത്തിലേക്ക് മാറ്റണമെന്ന ആവശ്യവും ശക്തമാണ്. 

രാവിലെയും വൈകുന്നേരങ്ങളിലുമാണ് ഇവിടെ വലിയ തോതിലുള്ള കുരുക്ക് അനുഭവപ്പെടുന്നത്. നാല് ഭാഗത്തുനിന്നുള്ള വാഹനങ്ങൾ എത്തുന്നതിനാൽ ജങ്ഷനിലെ പ്രശ്നങ്ങൾ പലതവണ അധികൃതരുടെ ശ്രദ്ധയിൽപ്പെടുത്തിയതുമാണ്. നഗരസഭയുടെ പുതിയ ഭരണസമിതി ട്രാഫിക് പരിഷ്കരണ നടപടികൾ വേഗത്തിലാക്കണമെന്നാണ് ഇപ്പോൾ ഉയരുന്ന പ്രധാന ആവശ്യം.

കാസർകോട് നഗരത്തിലെ ഈ ഗതാഗതക്കുരുക്കിനെക്കുറിച്ച് നിങ്ങളുടെ അഭിപ്രായമെന്താണ്? വാർത്ത ഷെയർ ചെയ്യൂ.

Article Summary: Severe traffic congestion at Kasaragod Bank Road disrupts bus schedules and causes hardship to passengers.

#Kasaragod #TrafficJam #BankRoad #KeralaPolice #KSRTC #KasaragodNews