കാസർകോട്ടുകാർക്ക് സന്തോഷ വാർത്ത; പ്രതീക്ഷയായി എയിംസ്; പുതിയ പ്രൊപ്പോസലിൽ ജില്ലയെയും ഉൾപ്പെടുത്തുമെന്ന് സർക്കാർ ഉറപ്പ്, ജനകീയ കൂട്ടായ്മയുടെ നിയമപോരാട്ടത്തിന് നേട്ടം

കാസർകോട്: (KasargodVartha) ജില്ലയിലെ ആരോഗ്യ മേഖലയ്ക്ക് ശാശ്വത പരിഹാരം ലക്ഷ്യമിട്ട് 2018 മുതൽ 'എയിംസ് കാസർകോട് ജനകീയ കൂട്ടായ്മ' നടത്തി വന്ന സമരങ്ങൾക്കും നിയമപോരാട്ടങ്ങൾക്കും നിർണായകമായ മുന്നേറ്റമെന്ന് വിലയിരുത്താവുന്ന പ്രഖ്യാപനമാണ് സംസ്ഥാന സർക്കാരിൻ്റെ ഭാഗത്ത് നിന്നുണ്ടായിരിക്കുന്നത്. കേരളത്തിനായി കേന്ദ്ര സർക്കാരിന് സംസ്ഥാന സർക്കാർ സമർപ്പിക്കുന്ന പുതിയ എയിംസ് പ്രൊപ്പോസലിൽ കാസർകോടിനെയും ഉൾപ്പെടുത്തുമെന്ന് ഉറപ്പുനൽകിയതായി ജനകീയ കൂട്ടായ്മ ഭാരവാഹികൾ വാർത്താസമ്മേളനത്തിൽ അറിയിച്ചു.

കോവിഡ് മഹാമാരിക്കാലത്ത് കാസർകോട് ജില്ലയിലെ ആരോഗ്യ സംവിധാനത്തിൻ്റെ പരിമിതികൾ കൂടുതൽ വ്യക്തമായ സാഹചര്യത്തിലാണ് ജില്ലയ്ക്ക് സമഗ്ര ആരോഗ്യ സ്വയംപര്യാപ്തത ഉറപ്പാക്കുക എന്ന ലക്ഷ്യത്തോടെ എയിംസ് ആവശ്യപ്പെട്ട് ജനകീയ കൂട്ടായ്മ വിവിധ തലങ്ങളിൽ പ്രക്ഷോഭങ്ങളും നിയമനടപടികളും ആരംഭിച്ചത്.

കോടതി ഇടപെടൽ നിർണായകം

കേരളത്തിന് എയിംസ് അനുവദിക്കുന്നതിൽ കേന്ദ്ര സർക്കാർ കാലതാമസം വരുത്തുന്നതിനെതിരെയും, എയിംസിനായുള്ള പരിഗണനാ പട്ടികയിൽ കാസർകോടിനെ ഉൾപ്പെടുത്തണമെന്നും ആവശ്യപ്പെട്ട് ജനകീയ കൂട്ടായ്മ കേരള ഹൈകോടതിയെ സമീപിച്ചിരുന്നു. 

ഹർജി പരിഗണിച്ച ഹൈകോടതി ചീഫ് ജസ്റ്റിസ് ഉൾപ്പെട്ട ഡിവിഷൻ ബെഞ്ച്, കേരളത്തിന് എയിംസ് വേണമെന്ന ആവശ്യം നിസ്സാരമായി കാണാനാകില്ലെന്ന് നിരീക്ഷിക്കുകയും കേന്ദ്ര സർക്കാർ ഇക്കാര്യത്തിൽ വ്യക്തമായ നിലപാട് അറിയിക്കണമെന്നും സംസ്ഥാനം നിർദേശിച്ച സ്ഥലങ്ങളിൽ ശാസ്ത്രീയമായ സാധ്യതാപഠനം നടത്തണമെന്നും കേന്ദ്ര ആരോഗ്യ മന്ത്രാലയത്തോട് നിർദേശിക്കുകയും ചെയ്തിരുന്നു. ഈ കോടതി ഇടപെടൽ കാസർകോടിൻ്റെ ആവശ്യത്തിന് നിയമപരമായ ശക്തമായ പിന്തുണ ലഭിക്കാൻ വഴിയൊരുക്കിയെന്ന് കൂട്ടായ്മ വ്യക്തമാക്കി.

ജനപ്രതിനിധികളുടെ പിന്തുണ

ജനകീയ കൂട്ടായ്മയുടെ ആവശ്യവുമായി ബന്ധപ്പെട്ട് എംപി രാജ്മോഹൻ ഉണ്ണിത്താൻ മുഖ്യമന്ത്രി വി ഡി സതീശനുമായി നടത്തിയ കൂടിക്കാഴ്ചയിൽ, പുതിയ എയിംസ് പ്രൊപ്പോസലിൽ കാസർകോടിനെയും ഉൾപ്പെടുത്തുമെന്ന് ഉറപ്പ് ലഭിച്ചതായും കൂട്ടായ്മ അറിയിച്ചു. ഇക്കാര്യം എംപി അറിയിച്ചിട്ടുണ്ട്.

അതേസമയം ഉദുമ എംഎൽഎ കെ നീലകണ്ഠൻ്റെ ഇടപെടലിനെ തുടർന്ന് ആരോഗ്യമന്ത്രി കെ മുരളീധരനും കാസർകോട് ജില്ലയ്ക്ക് പ്രത്യേക പരിഗണന നൽകുമെന്നും കേന്ദ്രത്തിന് സമർപ്പിക്കുന്ന പുതിയ പട്ടികയിൽ ജില്ലയുടെ പേര് ഉൾപ്പെടുത്തുമെന്നും അറിയിച്ചതായി ഭാരവാഹികൾ വാർത്താസമ്മേളനത്തിൽ വ്യക്തമാക്കി. ഈ വിഷയത്തിൽ പിന്തുണയും ഇടപെടലും നടത്തിയ എംഎൽഎമാരായ എ കെ എം അഷറഫ്, കല്ലട്ര മാഹിൻ ഹാജി, സന്ദീപ് വാര്യർ എന്നിവർക്കും മറ്റ് ജനപ്രതിനിധികൾക്കും ജനകീയ കൂട്ടായ്മ നന്ദി രേഖപ്പെടുത്തി.

ഒറ്റക്കെട്ടായി നിൽക്കണം

എയിംസ് പരിഗണനാ പട്ടികയിൽ കാസർകോടിൻ്റെ പേര് ഉൾപ്പെടുമെന്ന പ്രതീക്ഷ ശക്തമായ സാഹചര്യത്തിൽ, കേന്ദ്രം ഭരിക്കുന്ന ബിജെപി നേതൃത്വവും ജില്ലയിലെ എംപിയും ജനപ്രതിനിധികളും ഉൾപ്പെടെ എല്ലാ രാഷ്ട്രീയ കക്ഷികളും രാഷ്ട്രീയ ഭിന്നതകൾ മാറ്റിവെച്ച് കാസർകോടിന് എയിംസ് ലഭ്യമാക്കുന്നതിനായി ഒരുമിച്ച് പ്രവർത്തിക്കണമെന്ന് ജനകീയ കൂട്ടായ്മ അഭ്യർഥിച്ചു.

കേരളത്തിന് അനുവദിക്കുന്ന എയിംസ് കാസർകോടിന് തന്നെ ലഭ്യമാക്കാൻ കേന്ദ്ര സർക്കാരിൽ ശക്തമായ സമ്മർദം ചെലുത്താൻ എല്ലാ ജനപ്രതിനിധികളും രാഷ്ട്രീയ പാർട്ടികളും കൂട്ടായ പ്രവർത്തനം നടത്തണമെന്നും കൂട്ടായ്മ ആവശ്യപ്പെട്ടു. വാർത്താസമ്മേളനത്തിൽ പ്രസിഡൻ്റ് ഗണേഷൻ അരമങ്ങാനം, ജനറൽ സെക്രട്ടറി മുരളീധരൻ പടന്നക്കാട്, ട്രഷറർ സലിം ചൗക്കി, വൈസ് പ്രസിഡൻ്റ് നാസർ ചെർക്കളം, സെക്രട്ടറി സിസ്റ്റർ ജയാ ആൻ്റോ മംഗലത്ത് എന്നിവർ പങ്കെടുത്തു.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകൾക്കായി ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമന്റായി രേഖപ്പെടുത്താം.

Article Summary: The AIIMS Kasaragod Janakeeya Koottayma announced that the state government has assured the inclusion of Kasaragod in the new AIIMS proposal submitted to the central government. This comes as a significant achievement for their legal and public struggles.

#AIIMSKasaragod #KeralaHealth #KasaragodNews #CMVDSatheesan #KeralaGovernment #JanakeeyaKoottayma #AparnaNews