കുമ്പള ടോൾ: ബാധ്യത യാത്രക്കാരുടെ തലയിൽ; കർണാടക ആർടിസി ടിക്കറ്റ് നിരക്ക് കുത്തനെ കൂട്ടി, 7 രൂപ അധികം

മഞ്ചേശ്വരം: (KasargodVartha) കുമ്പള ആരിക്കാടിയിൽ ദേശീയപാതയിൽ പുതുതായി ആരംഭിച്ച ടോൾ പിരിവിന്റെ ഭാരം സാധാരണക്കാരായ യാത്രക്കാരുടെ ചുമലിലിട്ട് കർണാടക ആർടിസി (KSRTC). ടോൾ പ്ലാസ വഴി കടന്നുപോകുന്ന കർണാടക ആർടിസി ബസുകളിൽ ടിക്കറ്റ് നിരക്കിനൊപ്പം 'ടോൾ യൂസർ ഫീ' എന്ന പേരിൽ അധിക തുക ഈടാക്കിത്തുടങ്ങിയത് യാത്രക്കാരിൽ കടുത്ത പ്രതിഷേധത്തിന് ഇടയാക്കി.

ടിക്കറ്റിൽ 7 രൂപയുടെ വർധന 

നയബസാർ-ചൗക്കി റൂട്ടിൽ സർവീസ് നടത്തുന്ന കർണാടക ആർടിസി ബസുകളിൽ ജനുവരി 20 മുതൽ 7 രൂപയാണ് അധികമായി ഈടാക്കുന്നത്. നേരത്തെ 25 രൂപയായിരുന്ന ടിക്കറ്റ് നിരക്ക് ഇപ്പോൾ 32 രൂപയായി ഉയർന്നു. യാത്രക്കാർക്ക് നൽകുന്ന ടിക്കറ്റിൽ 25 രൂപ യാത്രാക്കൂലിയായും 7 രൂപ ടോൾ നിരക്കായും (Toll: 7.00) പ്രത്യേകം രേഖപ്പെടുത്തിയിട്ടുണ്ട്. അതേസമയം, ഇതേ റൂട്ടിൽ സർവീസ് നടത്തുന്ന കേരള ആർടിസി ബസുകൾ പഴയ നിരക്കായ 25 രൂപ തന്നെയാണ് ഇപ്പോഴും ഈടാക്കുന്നത്. ഒരേ റൂട്ടിൽ രണ്ട് നിരക്ക് ഈടാക്കുന്നത് യാത്രക്കാർക്കിടയിൽ ആശയക്കുഴപ്പത്തിനും പ്രതിഷേധത്തിനും കാരണമായിട്ടുണ്ട്.

പ്രതിസന്ധിയിലായി സ്വകാര്യ ബസുകൾ 

കർണാടക ആർടിസി ടോൾ തുക യാത്രക്കാരിൽ നിന്ന് നേരിട്ട് ഈടാക്കുമ്പോൾ, നിരക്ക് വർദ്ധിപ്പിക്കാൻ കഴിയാതെ സ്വകാര്യ ബസുടമകൾ പ്രതിസന്ധിയിലാണ്. ടോൾ പ്ലാസയിൽ ഭീമമായ തുക നൽകേണ്ടി വരുന്നത് സർവീസുകളെ ബാധിക്കുമെന്ന് കാസർകോട് ജില്ലാ പ്രൈവറ്റ് ബസ് ഓപ്പറേറ്റേഴ്സ് അസോസിയേഷൻ ഭാരവാഹികൾ ചൂണ്ടിക്കാട്ടി. സർവീസ് റോഡ് നിർമ്മാണം പൂർത്തിയാക്കാതെ ടോൾ പിരിക്കുന്നത് അംഗീകരിക്കാനാവില്ലെന്നും, ലോക്കൽ ബസുകൾക്ക് ടോൾ ഇളവ് നൽകണമെന്നും അവർ ആവശ്യപ്പെട്ടു. അധിക ബാധ്യത താങ്ങാനാവില്ലെന്നും പ്രശ്നത്തിന് പരിഹാരമുണ്ടായില്ലെങ്കിൽ സർവീസ് നിർത്തിവെച്ചുള്ള സമരത്തിലേക്ക് നീങ്ങേണ്ടി വരുമെന്നും ബസുടമകൾ മുന്നറിയിപ്പ് നൽകിയിട്ടുണ്ട്.

കൊള്ളയ്ക്കെതിരെ യൂത്ത് ലീഗ് 

കുമ്പള ആരിക്കാടിയിൽ നിയമവിരുദ്ധമായി സ്ഥാപിച്ച ടോൾ പ്ലാസയുടെ സാമ്പത്തിക ബാധ്യത സാധാരണക്കാരായ ബസ് യാത്രക്കാരുടെ മേൽ അടിച്ചേൽപ്പിക്കുന്ന കർണാടക ആർടിസിയുടെ നടപടി അങ്ങേയറ്റം അനീതിയാണെന്ന് മുസ്ലിം യൂത്ത് ലീഗ് മഞ്ചേശ്വരം നിയോജക മണ്ഡലം കമ്മിറ്റി പ്രസ്താവനയിൽ പറഞ്ഞു.

ടോൾ യൂസർ ഫീ എന്ന പേരിൽ ടിക്കറ്റ് നിരക്കിൽ വൻ വർദ്ധനവാണ് കെഎസ്ആർടിസി വരുത്തിയിരിക്കുന്നത്. നേരത്തെ 25 രൂപയുണ്ടായിരുന്ന ടിക്കറ്റ് നിരക്ക് പെട്ടെന്ന് 32 രൂപയായി ഉയർത്തി. ഓരോ യാത്രക്കാരനിൽ നിന്നും അധികമായി 7 രൂപ വീതം ഈടാക്കുന്നത് പകൽക്കൊള്ളയാണ്. ടോൾ പ്ലാസയ്ക്ക് സമീപം സർവീസ് റോഡ് നിർമ്മിക്കാത്ത അധികൃതരുടെ വീഴ്ചയ്ക്ക് സാധാരണക്കാരായ യാത്രക്കാർ പിഴയൊടുക്കേണ്ടി വരുന്നത് അംഗീകരിക്കാനാവില്ല.

യഥാർത്ഥത്തിൽ സർവീസ് റോഡിലൂടെ സഞ്ചരിക്കേണ്ട ബസ്സുകളെ, അവിടെ റോഡില്ല എന്ന സാങ്കേതിക കാരണം പറഞ്ഞ് ടോൾ പ്ലാസ വഴി തിരിച്ചുവിടുകയും അതിന്റെ ബാധ്യത പാവപ്പെട്ട യാത്രക്കാരിൽ നിന്ന് ഈടാക്കുകയുമാണ് ചെയ്യുന്നത്. ടോൾ കൊള്ളയ്‌ക്കെതിരെ നാട് ഒന്നടങ്കം പ്രതിഷേധിക്കുമ്പോൾ, അതിന് കുടപിടിക്കുന്ന സമീപനമാണ് കർണാടക ട്രാൻസ്പോർട്ട് കോർപ്പറേഷൻ സ്വീകരിക്കുന്നത്.

ഈ വിഷയത്തിൽ കേരള സർക്കാർ അടിയന്തരമായി ഇടപെടണമെന്നും കർണാടക അധികൃതരുമായി ചർച്ച നടത്തി അന്യായമായ നിരക്ക് വർദ്ധനവ് പിൻവലിപ്പിക്കണമെന്നും യൂത്ത് ലീഗ് ആവശ്യപ്പെട്ടു. സാധാരണക്കാരുടെ പ്രയാസം കണക്കിലെടുത്ത് ഈ കൊള്ള അവസാനിപ്പിക്കാൻ തയ്യാറായില്ലെങ്കിൽ ശക്തമായ പ്രതിഷേധ പരിപാടികളുമായി തെരുവിലിറങ്ങുമെന്ന് മുസ്ലിം യൂത്ത് ലീഗ് മഞ്ചേശ്വരം നിയോജക മണ്ഡലം പ്രസിഡന്റ് ബി.എം. മുസ്തഫയും ജനറൽ സെക്രട്ടറി സിദ്ദീഖ് ദണ്ഡഗോളിയും അറിയിച്ചു.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായങ്ങൾ കമൻ്റ് ചെയ്യു

Article Summary: Karnataka RTC increases bus fares by Rs 7 on the Kumbala route citing toll charges, while Kerala RTC maintains old rates. Youth League and private bus owners protest against the burden on passengers.

#KumbalaToll #KarnatakaRTC #KeralaRTC #BusFareHike #Kasaragod #YouthLeague #Manjeshwaram