പോലീസ് ജീപ്പ് സ്കൂട്ടറുമായി കൂട്ടിയിടിച്ച് അപകടം; വഴിയാത്രക്കാരി മരിച്ചു, രണ്ടുപേർക്ക് പരിക്ക്

കാഞ്ഞങ്ങാട്: (KasargodVartha) പടന്നക്കാട് ദേശീയപാതയിൽ സ്കൂട്ടർ യാത്രികനെ രക്ഷിക്കാൻ വെട്ടിച്ച പോലീസ് ജീപ്പ് രണ്ട് വാഹനങ്ങളിൽ ഇടിച്ച് അപകടം. വഴിയാത്രക്കാരിയായ സുഹറ മരിച്ചു. ഞാണിക്കടവ് പിള്ളേര് പീടിക സ്വദേശിനിയാണ് സുഹറ. ചൊവ്വാഴ്ച വൈകീട്ട് മൂന്നുമണിയോടെയാണ് സുഹറ മരണപ്പെട്ടത്. സ്കൂട്ടർ യാത്രക്കാരായ രണ്ടുപേർക്ക് അപകടത്തിൽ ഗുരുതരമായി പരിക്കേറ്റു.

ചൊവ്വാഴ്ച രാവിലെ 10.15-ഓടെയാണ് അപകടം നടന്നത്. ചീമേനി പോലീസ് സ്റ്റേഷന്റെ ജീപ്പാണ് അപകടത്തിൽപ്പെട്ടത്. ചീമേനിയിൽനിന്ന് കാഞ്ഞങ്ങാട് ഭാഗത്തേക്ക് വരികയായിരുന്ന പോലീസ് ജീപ്പ്, എതിർദിശയിൽ വന്ന മറ്റൊരു ജീപ്പിനെ മറികടന്ന് മുന്നിലെത്തിയ സ്കൂട്ടർ യാത്രികനെ രക്ഷിക്കാൻ ശ്രമിക്കുന്നതിനിടെയാണ് അപകടം സംഭവിച്ചത്.

സ്കൂട്ടറിൽ ഇടിച്ചശേഷം ജീപ്പ് വഴിയാത്രക്കാരിയായ സുഹറയെയും ഇടിച്ച് എതിർദിശയിൽ വന്ന മറ്റൊരു ജീപ്പിൽ തട്ടിയാണ് നിന്നത്. സ്കൂട്ടർ യാത്രക്കാരായ ചന്ദ്രൻ, ബേബി എന്നിവർക്കാണ് പരിക്കേറ്റത്. ഇവരെ ഉടൻതന്നെ കാഞ്ഞങ്ങാട് ജില്ലാ ആശുപത്രിയിൽ പ്രവേശിപ്പിച്ചു. പരിക്കുകൾ ഗുരുതരമായതിനാൽ മൂന്നുപേരെയും പിന്നീട് പരിയാരത്തേക്ക് മാറ്റിയിരുന്നു. ചികിത്സയിലിരിക്കെയാണ് സുഹറ മരിച്ചത്.
 

ഈ അപകടത്തെക്കുറിച്ച്  നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Pedestrian killed, two injured in accident involving police jeep in Kanhangad.

#Kanhangad #Kasargod #PoliceJeepAccident #RoadSafety #KeralaNews #Accident