കാഞ്ഞങ്ങാട്-കാസർകോട് പാത കടലാക്രമണ ഭീഷണിയിൽ; തൃക്കണ്ണാട് റോഡിന്റെ നിലനിൽപ്പ് തുലാസിൽ

ബേക്കൽ: (KasargodVartha) കാസർകോട്-കാഞ്ഞങ്ങാട് സംസ്ഥാന പാത കടലാക്രമണ ഭീഷണിയിൽ. തൃക്കണ്ണാട് റോഡിന്റെ വലിയൊരു ഭാഗം ഇതിനോടകം കടലെടുത്തു കഴിഞ്ഞു. ഏത് നിമിഷവും റോഡ് പൂർണമായി കടലെടുക്കാവുന്ന സ്ഥിതിയാണ് ഇവിടെയുള്ളത്.

തൃക്കണ്ണാട് പരിസരത്ത് രൂക്ഷമാകുന്ന കടലാക്രമണം തടയാൻ അടിയന്തര നടപടി ആവശ്യപ്പെട്ട് സി.എച്ച്. കുഞ്ഞമ്പു എം.എൽ.എയും എം. രാജഗോപാലൻ എം.എൽ.എയും ജലവിഭവ വകുപ്പ് മന്ത്രി റോഷി അഗസ്റ്റിനുമായി ബുധനാഴ്ച തിരുവനന്തപുരത്ത് കൂടിക്കാഴ്ച നടത്തിയിരുന്നു. കടലാക്രമണം ചെറുക്കുന്നതിനുള്ള പ്രതിരോധ പ്രവർത്തനങ്ങൾക്കായി ആദ്യഘട്ടത്തിൽ 25 ലക്ഷം രൂപ അനുവദിക്കാമെന്ന് മന്ത്രി ഉറപ്പുനൽകി.

പ്രശ്നത്തിന് അടിയന്തര പരിഹാരമുണ്ടായില്ലെങ്കിൽ ഗുരുതരമായ സാഹചര്യം ഉണ്ടാകുമെന്ന് ചൂണ്ടിക്കാട്ടി പോലീസ് ജില്ലാ കളക്ടർക്ക് റിപ്പോർട്ട് സമർപ്പിച്ചിരുന്നു. ബുധനാഴ്ച രാത്രിയുണ്ടായ ശക്തമായ മഴയെത്തുടർന്ന് കെ.എസ്.ടി.പി. റോഡിന്റെ പല ഭാഗങ്ങളും വെള്ളത്തിനടിയിലായി. കടലാക്രമണം തുടരുന്ന തൃക്കണ്ണാട് ത്രയംബകേശ്വര ക്ഷേത്രത്തിനു മുന്നിൽ റോഡരികിലെ മണ്ണ് ഒലിച്ചുപോയത് വലിയ അപകടഭീഷണിയുയർത്തുന്നുണ്ട്.

റോഡരികിൽ വലിയ കുഴി രൂപപ്പെട്ടിട്ടുണ്ട്. കടലാക്രമണം ഇനിയും തുടർന്നാൽ റോഡ് പൂർണ്ണമായും തകരാനുള്ള സാധ്യതയുമുണ്ട്. നിലവിൽ റോഡിൽ നിന്ന് അഞ്ചു മീറ്റർ മാത്രം അകലെയാണ് കടൽ. ഇത്രയും അടുത്ത് കടൽ എത്തുന്നത് ഇത് ആദ്യമായാണെന്ന് പ്രദേശവാസികൾ പറയുന്നു.

അനാസ്ഥയുടെ തിരമാലകൾ: തൃക്കണ്ണാട് പാത തകർന്നു; സർക്കാരിനെ കുറ്റപ്പെടുത്തി ബിജെപി

കാസർകോട്: തൃക്കണ്ണാട് ക്ഷേത്രത്തിന് മുന്നിലുണ്ടായ ശക്തമായ കടലാക്രമണത്തിൽ കാസർകോട് - കാഞ്ഞങ്ങാട് സംസ്ഥാന പാത തകർച്ചാ ഭീഷണിയിലായതിന് സംസ്ഥാന സർക്കാരാണ് ഉത്തരവാദിയെന്ന് ബി.ജെ.പി. മേഖലാ പ്രസിഡന്റ് അഡ്വ. കെ. ശ്രീകാന്ത് ആരോപിച്ചു.

വർഷങ്ങളായി ഈ പ്രദേശത്തെ കടലാക്രമണം തടയാൻ ജനങ്ങളും മാധ്യമങ്ങളും തുടർച്ചയായി ആവശ്യപ്പെട്ടിട്ടും ഭരണകൂടം യാതൊരു നടപടിയും സ്വീകരിച്ചില്ലെന്ന് അദ്ദേഹം കുറ്റപ്പെടുത്തി. ഈ വിഷയത്തിൽ ഇടപെടുന്നതിൽ എം.പി.യും എം.എൽ.എ.യും പൂർണ്ണമായും പരാജയപ്പെട്ടുവെന്നും ശ്രീകാന്ത് കൂട്ടിച്ചേർത്തു.

തൃക്കണ്ണാട് ക്ഷേത്രത്തിലെ പള്ളിവേട്ട മണ്ഡപവും കൊടുങ്ങല്ലൂർ ഭണ്ടാര മണ്ഡപവും കടലാക്രമണത്തിൽ തകർന്നിട്ടും പിണറായി സർക്കാർ നടപടിയെടുക്കാൻ തയ്യാറായില്ലെന്ന് ശ്രീകാന്ത് വിമർശിച്ചു.

ദേശീയ പാതയുടെ നിർമ്മാണ പ്രവർത്തനങ്ങൾ നടക്കുന്നതിനാൽ ദീർഘദൂര വാഹനങ്ങൾക്കും വലിയ വാഹനങ്ങൾക്കും അതുവഴി പോകാൻ സാധിക്കാത്ത സാഹചര്യമാണുള്ളത്. സംസ്ഥാന പാതയിലൂടെയുള്ള ഗതാഗതം നിയന്ത്രിക്കുന്നത് യാത്രാക്ലേശം വൻതോതിൽ വർദ്ധിപ്പിക്കുമെന്നും അദ്ദേഹം ചൂണ്ടിക്കാട്ടി.

സാങ്കേതിക തടസ്സങ്ങൾ മാറ്റിവെച്ച്, യുദ്ധകാലാടിസ്ഥാനത്തിൽ സർക്കാർ ഈ വിഷയത്തിൽ അടിയന്തര പരിഹാരം കാണണമെന്ന് ബി.ജെ.പി. ആവശ്യപ്പെട്ടു.

Updated.

തൃക്കണ്ണാട് റോഡിന്റെ കടലാക്രമണ ഭീഷണിയെക്കുറിച്ച്  നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: Kanhangad-Kasaragod highway faces severe coastal erosion threat.

#Kasaragod #CoastalErosion #Thrikkannad #RoadSafety #Kerala #Monsoon