കാനായി കുഞ്ഞിരാമന്റെ ശിൽപക്കരുത്തിന് പിന്നിൽ നളിനിയുടെ കരുതൽ; അരനൂറ്റാണ്ടിന്റെ ജീവതവും കലയും ഒരുമിച്ച്

കുഞ്ഞിക്കണ്ണൻ മുട്ടത്ത്

(KasargodVartha) പ്രായാധിക്യവും ആരോഗ്യപ്രശ്നങ്ങളും തളർത്തിയപ്പോഴും, പ്രശസ്ത ശിൽപി കാനായി കുഞ്ഞിരാമൻ്റെ വലിയ ശിൽപസൃഷ്ടി വിജയകരമായി പൂർത്തിയാക്കാൻ കരുത്തായി കൂടെനിന്നത് ജീവിതപങ്കാളി നളിനിയാണ്. കഴിഞ്ഞ വർഷം വീട്ടിൽ വെച്ച് വീണ് പരിക്കുകൾ പറ്റിയ കാനായി, വേനലിനെ വകവെയ്ക്കാതെ എൻഡോസൾഫാൻ ദുരിതബാധിതരെ ആസ്പദമാക്കിയുള്ള ശിൽപത്തിൻ്റെ പ്രവർത്തനങ്ങളിൽ സജീവമായി തുടരുകയായിരുന്നു. ഈ യാത്രയിൽ ഓരോ ഘട്ടത്തിലും നളിനിയുടെ പിന്തുണയാണ് അദ്ദേഹത്തിന് ഊർജമായത്.

ശിൽപനിർമാണം പുരോഗമിച്ച മാസങ്ങളിൽ ഇരുവരും ദിവസവും നിർമാണസ്ഥലത്ത് എത്തിയിരുന്നു. കാനായിക്കൊപ്പം സംഘാംഗങ്ങളുമായി ചേർന്ന് നളിനിയും നിർമാണ പ്രവർത്തനങ്ങളിൽ പങ്കാളിയായി. ശിൽപത്തിൻ്റെ ഉയരത്തിലുള്ള ഭാഗങ്ങളിൽ ജോലി ചെയ്യേണ്ട ഘട്ടങ്ങളിൽ കാനായിയെ താങ്ങിനിർത്തി നളിനി കൂടെയുണ്ടായിരുന്നു. പ്രായത്തിൻ്റെ അവശതകൾക്കിടയിലും കാനായിക്ക് ക്രെയിനിൽ കയറാൻ നളിനി സഹായിച്ചതായി ശിൽപം ഉദ്ഘാടനം ചെയ്യുന്ന ചടങ്ങിൽ സംസാരിച്ച മുൻ ജില്ലാ പഞ്ചായത്ത് പ്രസിഡന്റ് ബേബി ബാലകൃഷ്ണൻ അനുസ്മരിച്ചു.

കാനായിയുടെ കലാജീവിതത്തിലെ പ്രധാന സൃഷ്ടികൾക്കും പിന്നിൽ നളിനിയുടെ കരുതലുണ്ടായിരുന്നു. കഴിഞ്ഞ 18 വർഷമായി ഈ ശിൽപം യാഥാർഥ്യമാക്കാനുള്ള കാനായിയുടെ ശ്രമങ്ങൾക്ക് നളിനി പ്രചോദനമായിരുന്നുവെന്നും ബേബി ബാലകൃഷ്ണൻ വ്യക്തമാക്കി.

ലാളിത്യവും തുറന്നുപറച്ചിലുകളും

ശിൽപത്തിൻ്റെ ഉദ്ഘാടനത്തിന് ശേഷം മാധ്യമപ്രവർത്തകരോട് സംസാരിക്കവെ നളിനി കുടുംബത്തിൻ്റെ ലാളിത്യം വ്യക്തമാക്കി. തങ്ങൾക്കും കാനായിക്കും വലിയ ആർഭാടങ്ങളോ ആവശ്യങ്ങളോ ഇല്ലെന്നും, ഉള്ളതിൽ പൂർണമായി തൃപ്തരാണെന്നും അവർ പറഞ്ഞു. പൊതുസ്ഥലങ്ങളിലും നാടിനുമായി കാനായി ഒരുക്കുന്ന ശിൽപങ്ങൾക്ക് അദ്ദേഹം പ്രതിഫലം വാങ്ങാറില്ലെന്നും നളിനി വ്യക്തമാക്കി. വ്യക്തികൾക്കായി മാത്രം ഒരുക്കുന്ന ചില ശിൽപങ്ങളിൽ നിന്നും തങ്ങൾക്ക് രണ്ടുപേർക്കും കിട്ടുന്ന പെൻഷനിൽ നിന്നുമാണ് വരുമാനം ലഭിക്കുന്നത്. വീട്ടു ജോലികളും സാമ്പത്തിക കാര്യങ്ങളും പൂർണമായും താനാണ് കൈകാര്യം ചെയ്യുന്നതെന്നും അവർ കൂട്ടിച്ചേർത്തു.

കലാജീവിതത്തിലെ അരനൂറ്റാണ്ടിൻ്റെ കൂട്ടായ്മ

കാനായിയുടെ കലാജീവിതത്തിൽ നളിനിയുടെ പങ്ക് തുടക്കം മുതലുള്ളതാണ്. 1977-ൽ ഇരുവരും വിവാഹിതരായതു മുതൽ കാനായിയുടെ എല്ലാ കലാപ്രവർത്തനങ്ങളിലും നളിനി ഒപ്പമുണ്ടായിരുന്നു. നളിനിയെ നേരിൽ കണ്ടതോടെയാണ് കാനായി വിവാഹത്തിന് സമ്മതം മൂളിയത്. അതിനു ശേഷം 1977 മുതൽ ഇന്നുവരെ ഇരുവരും ജീവിതത്തിലും കലയിലും ഒരുമയോടെയാണ് മുന്നേറിയത്.

മാധ്യമങ്ങളോട് സംസാരിക്കവെ നളിനി തൻ്റെ ആഗ്രഹവും പങ്കുവെച്ചു: ‘ദൈവത്തിൽ വിശ്വാസമുണ്ട്. അദ്ദേഹം ഒരിക്കലും ഒരു ജോലി പൂർത്തിയാക്കാതെ ഉപേക്ഷിക്കരുതെന്നാണ് എൻ്റെ ഒരേയൊരു പ്രാർഥന,’ നളിനി പറഞ്ഞു.

കാസർകോടിന്റെ മണ്ണിൽ കാനായി കുഞ്ഞിരാമൻ ഒരുക്കിയ വിക്ടിംസ്, ഫ്രീഡം ശില്പങ്ങൾ നാടിന് സമർപ്പിച്ചു

18 വർഷത്തെ നീണ്ട കാത്തിരിപ്പിനും നിരവധി ഭരണപരമായ കടമ്പകൾക്കും ഒടുവിൽ വിഖ്യാത ശില്പി കാനായി കുഞ്ഞിരാമൻ കാസർകോട് ജില്ലാ പഞ്ചായത്ത് അങ്കണത്തിൽ ഒരുക്കിയ ശില്പങ്ങൾ നാടിന് സമർപ്പിച്ചു. കാസർകോട് ജില്ലാ പഞ്ചായത്തിന്റെ വാർഷിക പദ്ധതിയിലുൾപ്പെടുത്തി നിർമിച്ച ഈ ശില്പങ്ങൾ സാധാരണ മനുഷ്യരുടെ ജീവിതവും കാസർകോടിന്റെ സാംസ്കാരിക പൈതൃകവും പൂർണമായി പ്രതിഫലിപ്പിക്കുന്നവയാണ്. ജില്ലയുടെ കലാ-സാംസ്കാരിക ചരിത്രത്തിലെ ഏറ്റവും ശ്രദ്ധേയമായ സൃഷ്ടിയായി ഇത് മാറുമെന്ന് ഉദ്ഘാടന ചടങ്ങിൽ പങ്കെടുത്തവർ പറഞ്ഞു.

ദുരിതബാധിതരുടെ അതിജീവന പ്രതീകം

എൻഡോസൾഫാൻ ദുരിതബാധിതരുടെ നടുക്കുന്ന ഓർമകൾ വിളിച്ചോതുന്ന 'വിക്ടിംസ്', അവരുടെ അതിജീവനത്തിന്റെ പ്രതീകമായ 'ഫ്രീഡം' എന്നീ രണ്ട് ശില്പങ്ങളാണ് ജില്ലാ പഞ്ചായത്ത് ആസ്ഥാനത്തിന്റെ മുൻവശത്തായി നിർമിച്ചിട്ടുള്ളത്. നാട മുറിച്ച് ശില്പങ്ങളുടെ അനാച്ഛാദനം ശില്പിയായ കാനായി കുഞ്ഞിരാമൻ തന്നെ നിർവഹിച്ചു. കാനായി ജന്മനാടിന് സമ്മാനിച്ച അമൂല്യ സൃഷ്ടികളാണ് ഇവയെന്നും, ശംഖുമുഖത്തും വേളിയിലും തോന്നയ്ക്കലും ഉൾപ്പടെ അദ്ദേഹം നിർമിച്ച മറ്റ് ശില്പങ്ങളുടെ കൂടെ 45 അടി ഉയരമുള്ള ഈ ശില്പവും ചരിത്രത്തിൽ പ്രത്യേക സ്ഥാനം നേടുമെന്നും ഔദ്യോഗിക സമർപ്പണ ചടങ്ങ് ഉദ്ഘാടനം നിർവഹിച്ച് സംസാരിച്ച രാജ്മോഹൻ ഉണ്ണിത്താൻ എം.പി പറഞ്ഞു.

18 വർഷത്തെ കാത്തിരിപ്പും ചുവപ്പുനാടകളും

ജില്ലാ പഞ്ചായത്തിന്റെ അങ്കണത്തിൽ ഇത്തരമൊരു ശില്പം സ്ഥാപിക്കണമെന്ന ആശയം 18 വർഷങ്ങൾക്ക് മുമ്പാണ് ആദ്യമായി ഉയർന്നത്. കാസർകോട് പ്രസ് ക്ലബിൽ നടന്ന ഒരു പരിപാടിക്കിടെയാണ് ഈ ആശയത്തിന്റെ ജനനമെന്ന് ചടങ്ങിൽ സംസാരിച്ച മുൻ ജില്ലാ പഞ്ചായത്ത് പ്രസിഡന്റ് എം.വി. ബാലകൃഷ്ണൻ മാസ്റ്റർ അനുസ്മരിച്ചു. അന്ന് കാനായി കുഞ്ഞിരാമനുമായി അദ്ദേഹം നേരിട്ട് ഇക്കാര്യം പങ്കുവെക്കുകയായിരുന്നു. എന്നാൽ ആ സമയത്ത് ജില്ലാ പഞ്ചായത്തുകൾക്ക് ഇത്തരത്തിൽ ശില്പങ്ങൾ സ്ഥാപിക്കുന്നതിന് വ്യക്തമായ മാർഗനിർദേശങ്ങളൊന്നും സർക്കാരിൽ നിന്നും ഉണ്ടായിരുന്നില്ല. അതിനാൽ ആവശ്യമായ അനുമതികളും നടപടിക്രമങ്ങളും പൂർത്തിയാക്കുന്നതിന് ഏറെ ബുദ്ധിമുട്ടുകൾ നേരിട്ടു.

ഇതിനിടയിൽ, ശില്പം ഒരുക്കാൻ കാനായി കുഞ്ഞിരാമൻ സ്വമേധയാ മുന്നോട്ടുവന്നത് വലിയ പിന്തുണയായെന്നും ബാലകൃഷ്ണൻ മാസ്റ്റർ പറഞ്ഞു. ശില്പത്തിന് പ്രതിഫലമായി ഒരു രൂപ പോലും കാനായി ആവശ്യപ്പെട്ടിരുന്നില്ല. പകരം, നിർമാണത്തിനാവശ്യമായ സാമഗ്രികളുടെയും തൊഴിലാളികളുടെയും ചെലവ് മാത്രമാണ് അദ്ദേഹം ആവശ്യപ്പെട്ടത്. പദ്ധതിക്ക് സർക്കാർ അനുമതി ലഭിക്കുന്നതിനായി മുഖ്യമന്ത്രിയുമായി ബന്ധപ്പെട്ടും വിവിധ സർക്കാർ ഓഫീസുകളിൽ കയറിയിറങ്ങിയും താൻ പ്രവർത്തിച്ചതായി ബാലകൃഷ്ണൻ മാസ്റ്റർ കൂട്ടിച്ചേർത്തു. ഒടുവിൽ 18 വർഷം നീണ്ട ശ്രമങ്ങൾക്കൊടുവിലാണ് ശില്പം പൂർത്തിയായത്. ശില്പത്തിന്റെ നിർമാണത്തിൽ കാനായിക്കൊപ്പം തോളോട് തോൾ ചേർന്ന് പ്രവർത്തിച്ചവർക്കും അദ്ദേഹം പ്രത്യേക നന്ദി അറിയിച്ചു.

സ്പീക്കറുടെ അസാന്നിധ്യവും ജനപ്രതിനിധികളുടെ പ്രതിഷേധവും
 

ഉദ്ഘാടന ചടങ്ങിൽ നിയമസഭാ സ്പീക്കർ പങ്കെടുക്കാതിരുന്നതിനെച്ചൊല്ലി രൂക്ഷമായ രാഷ്ട്രീയ വിമർശനവും വേദിയിൽ ഉയർന്നു. സ്പീക്കറുമായി നേരത്തെ തന്നെ ദീർഘമായി സംസാരിച്ചിരുന്നുവെന്നും ചടങ്ങിൽ നിർബന്ധമായും പങ്കെടുക്കേണ്ടതിന്റെ അനിവാര്യത അദ്ദേഹത്തെ നേരിട്ട് അറിയിച്ചിരുന്നുവെന്നും മഞ്ചേശ്വരം എം.എൽ.എ എ.കെ.എം. അഷ്റഫ് പറഞ്ഞു. എന്നാൽ മുഖ്യമന്ത്രിയുടെ പരിപാടി പിന്നീട് തീരുമാനിക്കപ്പെട്ടതാണെന്നും അദ്ദേഹം ചൂണ്ടിക്കാട്ടി. 

സ്പീക്കർ ചടങ്ങിൽ പങ്കെടുക്കാതിരുന്നതിൽ കാസർകോട് ജില്ലാ പഞ്ചായത്ത് പ്രസിഡന്റ് സാബു എബ്രഹാമും ശക്തമായ നിരാശ പ്രകടിപ്പിച്ചു. സ്പീക്കറുമായി നേരത്തെ ബന്ധപ്പെട്ടിരുന്നതായും ചടങ്ങിൽ പങ്കെടുക്കുന്നതിനുള്ള എല്ലാ കാര്യങ്ങളും തീരുമാനിച്ചിരുന്നതായും ചടങ്ങിൽ ആമുഖപ്രഭാഷണം നടത്തിയ അദ്ദേഹം പറഞ്ഞു. മുഖ്യമന്ത്രിയുടെ പരിപാടി പിന്നീട് തീരുമാനിക്കപ്പെട്ടതാണെന്നും, അതിന്റെ പേരിൽ നേരത്തെ തീരുമാനിച്ചിരുന്ന സ്പീക്കറുടെ പരിപാടി ഒഴിവാക്കേണ്ട യാതൊരു സാഹചര്യവും ഉണ്ടാകരുതായിരുന്നുവെന്നും സാബു എബ്രഹാം അഭിപ്രായപ്പെട്ടു.

രാജ്മോഹൻ ഉണ്ണിത്താൻ എം.പിയും വിഷയത്തിൽ കടുത്ത വിമർശനം ഉന്നയിച്ചു. 18 വർഷം കാത്തിരുന്ന പദ്ധതിയുടെ ഉദ്ഘാടനത്തിന് ഏഴ് ദിവസം കൂടി കാത്തിരുന്നാലും യാതൊരു വലിയ പ്രശ്നവുമുണ്ടാകുമായിരുന്നില്ലെന്ന് അദ്ദേഹം പറഞ്ഞു. 18 വർഷം കാത്തിരുന്ന പദ്ധതിയായതിനാൽ ഏഴ് ദിവസം കൂടി കാത്തിരുന്നാൽ മുഖ്യമന്ത്രിയെക്കൊണ്ട് തന്നെ ഈ ശില്പം ഉദ്ഘാടനം ചെയ്യിക്കാമായിരുന്നുവെന്നും ഉണ്ണിത്താൻ വ്യക്തമാക്കി.

'വടക്ക് വളരാൻ തെക്കോട്ട് നോക്കേണ്ടതില്ല'

കാസർകോടിനോടുള്ള മാറിമാറിവരുന്ന സർക്കാരുകളുടെ സ്ഥിരമായ അവഗണനയുടെ ഭാഗമായാണ് ഇത്തരം സംഭവങ്ങളെയും കാണേണ്ടതെന്ന് എ.കെ.എം. അഷ്റഫ് കുറ്റപ്പെടുത്തി. ഇടതായാലും വലതായാലും മന്ത്രിമാർ പലപ്പോഴും കോഴിക്കോടുവരെ മാത്രമാണ് എത്തുന്നതെന്ന വിവേചനപരമായ സമീപനമാണ് കാസർകോടിനോടുള്ള അവഗണനയ്ക്ക് പിന്നിലെന്നും അദ്ദേഹം പറഞ്ഞു. ‘

'കാസർകോടിനെ എന്തിനാണ് ഇത്ര ഭയപ്പെടുന്നത്?' എന്ന നിർണായക ചോദ്യവും അഷ്റഫ് വേദിയിൽ ഉന്നയിച്ചു. ജില്ലയുടെ വികസനത്തിലും കലാ-സാംസ്കാരിക മേഖലകളിലും കൂടുതൽ ശ്രദ്ധ വേണമെന്നും അദ്ദേഹം ആവശ്യപ്പെട്ടു. ജില്ലയുടെ അതിർത്തിയായ തലപ്പാടിയിൽ പുതിയൊരു ശില്പം സ്ഥാപിക്കേണ്ടതിന്റെ ആവശ്യകതയും അദ്ദേഹം ചൂണ്ടിക്കാട്ടി.

ചടങ്ങിൽ സംസാരിച്ച മഞ്ചേശ്വരം ബ്ലോക്ക് പഞ്ചായത്ത് പ്രസിഡന്റ് യു.കെ. സെയ്ഫുല്ല തങ്ങൾ ഭരണാധികാരികളുടെ തീരുമാനങ്ങളിൽ ദീർഘവീക്ഷണം അനിവാര്യമാണെന്ന് ആവശ്യപ്പെട്ടു. ഒരു ഭരണാധികാരി ഒരു ഉത്തരവ് പുറപ്പെടുവിക്കുന്നതിന് മുമ്പ് അതിന്റെ ഭാവിയിലെ പ്രത്യാഘാതങ്ങളെക്കുറിച്ച് കൃത്യമായി ചിന്തിച്ചിരിക്കണം. കാസർകോടിനോടുള്ള ഈ കടുത്ത അവഗണന ഇനിയും തുടരുകയാണെങ്കിൽ ഇവിടെ 'അവഗണനയുടെ പ്രതിമ' കൂടി അധികൃതർക്ക് സ്ഥാപിക്കേണ്ടിവരുമെന്നായിരുന്നു അദ്ദേഹത്തിന്റെ മൂർച്ചയേറിയ പരിഹാസം.

കല മനുഷ്യന്റെ ഉള്ളിലാണുള്ളത്

ശില്പം ഒരുക്കിയ കാനായി കുഞ്ഞിരാമൻ കാസർകോടിന്റെ വികസനത്തെയും കലയുടെ പ്രാധാന്യത്തെയും കുറിച്ച് വേദിയിൽ ശ്രദ്ധേയമായ സന്ദേശമാണ് നൽകിയത്. വടക്ക് വളരണമെങ്കിൽ തെക്കോട്ട് മാത്രം നോക്കേണ്ടതില്ലെന്നും വടക്കൻ കേരളത്തിന്റെ തനത് കഴിവുകളിലേക്ക് കൂടുതൽ ശ്രദ്ധ തിരിക്കണമെന്നും അദ്ദേഹം പറഞ്ഞു. 

വടക്കൻ കേരളത്തിലെ ജനങ്ങൾ നിഷ്കളങ്കരും അധ്വാനശീലികളുമാണ്. പുറത്തേക്ക് കലയെ അന്വേഷിക്കുന്നതിന് പകരം മനുഷ്യന്റെ ഉള്ളിലേക്ക് നോക്കണം. കല മനുഷ്യന്റെ ഉള്ളിലാണുള്ളത്. അതിനെക്കുറിച്ച് പുറത്തേക്ക് വീമ്പുപറയേണ്ടതില്ലെന്നും ഹൃദയത്തിലേക്ക് നോക്കിയാൽ അവിടെ യഥാർഥ കല കണ്ടെത്താനാകുമെന്നും കാനായി ഓർമിപ്പിച്ചു.

കേരളം നന്നാകണമെന്ന ആഗ്രഹത്തോടെയാണ് താൻ ലണ്ടനിലെ പഠനത്തിന് ശേഷം കേരളത്തിലേക്ക് തിരിച്ചുവന്നതെന്നും അദ്ദേഹം പറഞ്ഞു. വിദേശത്ത് പോകുന്ന പലരും പിന്നീട് തിരിച്ചുവരുന്നില്ല. എന്നാൽ കേരളത്തിൽ തുടരാനും ഇവിടെ കലാരംഗത്ത് സജീവമായി പ്രവർത്തിക്കാനുമാണ് താൻ തീരുമാനിച്ചതെന്ന് കനായി വ്യക്തമാക്കി.

ഏറ്റവും ഉയരം കൂടിയ ശില്പവും ദുരിതങ്ങളുടെ നേർചിത്രവും

കാനായി കുഞ്ഞിരാമന്റെ ശ്രദ്ധേയമായ നിരവധി ശില്പങ്ങൾ കേരളത്തിന്റെ വിവിധ ഭാഗങ്ങളിലുണ്ട്. വിഖ്യാതമായ സാഗരകന്യക ഉൾപ്പെടെയുള്ള ശില്പങ്ങൾ 25 അടി വരെ ഉയരമുള്ളവയാണ്. എന്നാൽ കാസർകോട് ജില്ലാ പഞ്ചായത്ത് അങ്കണത്തിൽ സ്ഥാപിച്ചിരിക്കുന്ന ഈ പുതിയ ശില്പം കാനായിയുടെ കലാജീവിതത്തിലെ ഏറ്റവും ഉയരം കൂടിയ സൃഷ്ടിയാണെന്ന് ചടങ്ങിൽ ചൂണ്ടിക്കാണിക്കപ്പെട്ടു.

ജില്ലാ കലക്ടർ ശ്രീധന്യ സുരേഷ് ഈ ശില്പത്തിന്റെ സവിശേഷമായ പ്രത്യേകതകൾ വിശദീകരിച്ചു. ഒരു പ്രദേശത്തെ ജനജീവിതവും അവിടുത്തെ സംസ്കാരവും ഇത്തരം ശില്പങ്ങളിൽ എക്കാലവും പ്രതിഫലിക്കുന്നുണ്ട്. കാനായിയുടെ സാഗരകന്യകയിലും മലമ്പുഴയിലെ യക്ഷിയിലും ഇതിന്റെ വ്യത്യസ്ത തലങ്ങൾ ആർക്കും കാണാം. കൊറ്റ്രവൈ ദേവതയുടെ സങ്കൽപ്പത്തിന്റെ ശക്തമായ പ്രതിഫലനം മലമ്പുഴ യക്ഷിയിൽ കാണാമെങ്കിൽ, കാസർകോട് ജില്ലാ പഞ്ചായത്ത് അങ്കണത്തിലെ ഈ പുതിയ ശില്പം ഇവിടുത്തെ സാധാരണ ജനങ്ങളുടെയും അവരുടെ ജീവിതത്തിന്റെയും പ്രതിഫലനമാണെന്നും കലക്ടർ പറഞ്ഞു.

എൻഡോസൾഫാൻ ദുരിതബാധിത പ്രദേശങ്ങൾ നേരിട്ട് സന്ദർശിച്ച അനുഭവവും കുടുംബങ്ങളെ നേരിൽ കണ്ട വിവരവും കാനായി വേദിയിൽ വികാരഭരിതനായി പങ്കുവെച്ചു. അവരുടെ ദുരിത ജീവിതവും അതിജീവനവുമാണ് ഈ ശില്പത്തിൽ പ്രമേയമായത്. ദുരിതബാധിതരായ ആളുകളെയും അമ്മമാരെയും സന്ദർശിച്ചപ്പോൾ അവരുടെ ജീവിതത്തിലെ വേദനയും കണ്ണീരും നേരിട്ട് മനസ്സിലാക്കാൻ കഴിഞ്ഞു. അമ്മമാരുടെ ദുരിതവും മക്കളുടെ വേദനയും തന്നെ ഏറെ സ്വാധീനിച്ചുവെന്ന് അദ്ദേഹം പറഞ്ഞു. അതുകൊണ്ടുതന്നെ, അധികം അലങ്കാരങ്ങളോ സങ്കീർണമായ വിശദാംശങ്ങളോ ഇല്ലാത്ത തികച്ചും ലളിതമായ ശില്പമാണ് താൻ ഇവിടെ ഒരുക്കിയിരിക്കുന്നതെന്നും കാനായി വ്യക്തമാക്കി.

മനുഷ്യൻ എന്നും ആഗ്രഹിക്കുന്ന ഒന്നാണ് യഥാർഥ സ്വാതന്ത്ര്യം. രാഷ്ട്രീയത്തോട് തനിക്ക് യാതൊരു എതിർപ്പുമില്ലെന്നും അദ്ദേഹം പറഞ്ഞു. സാഗരകന്യക, യക്ഷി തുടങ്ങിയ തന്റെ പ്രശസ്ത ശില്പങ്ങളുടെ നിർമാണത്തിന് നേരിട്ട എതിർപ്പുകളെക്കുറിച്ചും അദ്ദേഹം വിശദീകരിച്ചു. പ്രത്യേകിച്ച് യക്ഷിയുടെ നഗ്നശില്പം ഒരുക്കിയപ്പോൾ പൊതുസമൂഹത്തിൽ നിന്ന് നേരിട്ട ശക്തമായ എതിർപ്പുകളെക്കുറിച്ചും കാനായി ഓർമിപ്പിച്ചു. 

എങ്കിലും കലയുടെ സമ്പൂർണ സ്വാതന്ത്ര്യത്തിൽ വിശ്വസിച്ചാണ് അത്തരം സൃഷ്ടികൾ നടത്തിയതെന്ന് അദ്ദേഹം തറപ്പിച്ചു പറഞ്ഞു. ശില്പങ്ങളിൽ അശ്ലീലമില്ലെന്നും അത് കാണുന്നവരുടെ മനസ്സിലാണുള്ളതെന്നും അദ്ദേഹം അഭിപ്രായപ്പെട്ടു. കാസർകോട് ജില്ലയിൽ വിക്ടിംസ്, ഫ്രീഡം എന്നീ ശില്പങ്ങൾ ഒരുക്കാൻ കഴിഞ്ഞതിൽ അതിയായ സന്തോഷമുണ്ടെന്നും കാനായി കൂട്ടിച്ചേർത്തു.

കാസർകോട് ഫൈൻ ആർട്സ് കോളജ് വേണം

മലബാറിൽ ഒരു ഫൈൻ ആർട്സ് കോളജ് പോലുമില്ലാത്തത് സാംസ്കാരിക രംഗത്തെ വലിയ കുറവാണെന്നും വടക്കൻ കേരളത്തിൽ സർക്കാർ മേഖലയിൽ ഒരു ഫൈൻ ആർട്സ് കോളജ് ജില്ലയിൽ സ്ഥാപിക്കണമെന്നത് തന്റെ വലിയ ആഗ്രഹമാണെന്നും കാനായി ചൂണ്ടിക്കാട്ടി. അതിനാവശ്യമായ എല്ലാ പിന്തുണയും നൽകുമെന്നും ഇതിനായി രാഷ്ട്രീയ ഭേദമന്യേ എല്ലാവരും ഒറ്റക്കെട്ടായി ശ്രമിക്കണമെന്നും അദ്ദേഹം അഭ്യർഥിച്ചു. 

'പുരോഗതിയെന്നാൽ പ്രകൃതിയെ നശിപ്പിക്കലല്ല, കലാപഠനം പ്രകൃതിയെ അറിയാൻ ആവശ്യമാണ്' എന്ന ആശയവും അദ്ദേഹം മുന്നോട്ടുവച്ചു. 'കല മാത്രമാണ് മനുഷ്യനെ നല്ല മനുഷ്യനാക്കാൻ കഴിയുന്നത്' എന്ന സന്ദേശവും അദ്ദേഹം പങ്കുവെച്ചു. ഫൈൻ ആർട്സ് കോളജ് സ്ഥാപിക്കണമെന്നാവശ്യപ്പെട്ടുള്ള പ്രത്യേക നിവേദനം സാബു എബ്രഹാം മുഖ്യമന്ത്രിക്ക് സമർപ്പിക്കുമെന്നും വേദിയിൽ അറിയിച്ചു.

കാസർകോടിന്റെ വികസനം കേവലം കെട്ടിടങ്ങളും റോഡുകളും മാത്രം കേന്ദ്രീകരിച്ചാകരുതെന്ന് കാനായി ഓർമിപ്പിച്ചു. കൃത്രിമമായി എന്തെങ്കിലും നിർമിക്കുന്നതോ സൃഷ്ടിക്കുന്നതോ അല്ല യഥാർഥ വികസനം. ജനങ്ങളുടെ ജീവിതത്തിൽ മാറ്റമുണ്ടാക്കുന്നതാണ് യഥാർഥ വികസനം. ജനങ്ങളുടെ വികസനമാണ് ലക്ഷ്യമാക്കേണ്ടത്. ഈ ശില്പം ഒരു ഒറ്റപ്പെട്ട സൃഷ്ടിയല്ലെന്നും, കലയുടെ അനന്തമായ ഒരു യാത്രയുടെ ഭാഗമാണെന്നും ആ യാത്രയിൽ സമൂഹത്തിലെ എല്ലാവരും പങ്കാളികളാകണമെന്നും കാനായി അഭ്യർഥിച്ചു.

കാനായിയുടെ കലാജീവിതത്തിൽ പത്നി നളിനിയുടെ നിർണായക പങ്കും ചടങ്ങിൽ പ്രത്യേകം പരാമർശിക്കപ്പെട്ടു. കാനായിയുടെ കലാജീവിതത്തിലുടനീളം നളിനിയുടെ വലിയ പിന്തുണയും പ്രചോദനവും എപ്പോഴുമുണ്ടായിരുന്നുവെന്ന് ചടങ്ങിൽ സംസാരിച്ച മുൻ ജില്ലാ പഞ്ചായത്ത് പ്രസിഡന്റ് ബേബി ബാലകൃഷ്ണൻ ഓർമിപ്പിച്ചു.

ചടങ്ങിലെ പ്രമുഖ സാന്നിധ്യങ്ങൾ

കാസർകോട് എംഎൽഎ കല്ലട്ര മാഹിൻ അധ്യക്ഷത വഹിച്ച ചടങ്ങിൽ മുൻ മന്ത്രി ഇ. ചന്ദ്രശേഖരൻ, കാസർകോട് ജില്ലാ പൊലീസ് മേധാവി നിതിൻ രാജ്, നേതാവ് ഉദുമ എംഎൽഎ കെ. നീലകണ്ഠൻ, മുൻ എം.പി പി. കരുണാകരൻ, മുൻ എം.എൽ.എ കെ. കുഞ്ഞിരാമൻ എന്നിവർ വിശിഷ്ടാതിഥികളായി പങ്കെടുത്തു. ജില്ലാ പഞ്ചായത്ത് വൈസ് പ്രസിഡന്റ് കെ. കെ. സോയ, ചെങ്കള പഞ്ചായത്ത് പ്രസിഡന്റ് വസന്തൻ അജക്കോട് എന്നിവർക്ക് പുറമെ ബ്ലോക്ക് പഞ്ചായത്ത് പ്രസിഡന്റുമാരായ അബ്ദുല്ല കുഞ്ഞി ചെർക്കള, സി. എം. മീനാ കുമാരി, കെ. സുജാത, സി. ബാലൻ, സി. ബിന്ദു എന്നിവരും സംബന്ധിച്ചു.

വികസനകാര്യ സ്റ്റാൻഡിങ് കമ്മിറ്റി അധ്യക്ഷ ഇർഫാന ഇഖ്‌ബാൽ, പൊതുമരാമത്ത് സ്റ്റാൻഡിങ് കമ്മിറ്റി അധ്യക്ഷ ഒക്ലാവ് കൃഷ്ണൻ, ആരോഗ്യ വിദ്യാഭ്യാസ സ്റ്റാൻഡിങ് കമ്മിറ്റി അധ്യക്ഷൻ എം. മനു, ക്ഷേമകാര്യ സ്റ്റാൻഡിങ് കമ്മിറ്റി അധ്യക്ഷ റീന തോമസ്, ജില്ലാ പഞ്ചായത്ത് അംഗങ്ങളായ പി. ബി. ഷഫീഖ്, ഹർഷാദ് വൊർക്കാടി, കെ. സബീഷ്, രാമപ്പ എന്നിവരും സന്നിഹിതരായിരുന്നു.

മഞ്ചേശ്വര ഗ്രാമപഞ്ചായത്ത് അസോസിയേഷൻ പ്രസിഡന്റ് കെ. ബി. മുഹമ്മദ് കുഞ്ഞി, രാഷ്ട്രീയകക്ഷി പ്രതിനിധികളായ പി. കെ. ഫൈസൽ, ഹരീഷ് ബി. നമ്പ്യാർ, അഹമ്മദലി കുമ്പള, ജെറ്റോ ജോസഫ്, നാഷണൽ അബ്ദുല്ല, ഷിനോജ് ചാക്കോ, വി. കെ. രവീന്ദ്രൻ എന്നിവർ വിവിധ പാർട്ടികളെ പ്രതിനിധീകരിച്ച് സംസാരിച്ചു.

മുൻ ജില്ലാ പഞ്ചായത്ത് പ്രസിഡന്റുമാരായ ഇ. പത്മാവതി, എ. ജി. സി. ബഷീർ, പി. പി. ശ്യാമളാദേവി എന്നിവരും വേദിയിലുണ്ടായിരുന്നു. ജില്ലാ പഞ്ചായത്ത് സെക്രട്ടറി എസ്. ബിജു ചടങ്ങിൽ റിപ്പോർട്ട് അവതരിപ്പിച്ചു. ഫിനാൻസ് ഓഫീസർ നൃപൻ ദാസ് നന്ദി പ്രകാശിപ്പിച്ചു. ചടങ്ങിൽ കാനായി കുഞ്ഞിരാമന്റെ പത്നി നളിനി, ദേശീയ ചലച്ചിത്ര പുരസ്കാര ജേതാവ് രൂപശ്രീ വോർക്കാടി എന്നിവരും സന്നിഹിതരായിരുന്നു.

ലഘുചിത്ര പ്രദർശനവും സമർപ്പണവും

അനാച്ഛാദന ചടങ്ങിന്റെ ഭാഗമായി ജില്ലാ പഞ്ചായത്ത് സെമിനാർ ഹാളിൽ 'കാനായി പെൺ കുതിപ്പിന്റെ ശില്പങ്ങൾ' എന്ന പേരിൽ നടന്ന ഡോക്യുമെന്ററി പ്രദർശനത്തിന്റെ ഉദ്ഘാടനവും ശില്പി കാനായി കുഞ്ഞിരാമൻ തന്നെ നിർവഹിച്ചു. സംവിധായകൻ എ. ടി. മോഹൻ രാജ്, എഴുത്തുകാരൻ എൻ. സന്തോഷ് കുമാർ, മാധ്യമപ്രവർത്തകൻ വി.വി. പ്രഭാകരൻ എന്നിവർ ഡോക്യുമെന്ററി പ്രദർശന വേദിയിൽ സംസാരിച്ചു. 18 വർഷത്തെ കാത്തിരിപ്പിനൊടുവിൽ ഉയർന്ന കാനായിയുടെ ശില്പങ്ങൾ കാസർകോടിന്റെ കലാ-സാംസ്കാരിക രംഗത്തിന് പുതിയൊരു അടയാളമായി മാറുകയാണ്.

കാസർകോടിന്റെ സാംസ്കാരിക മാറ്റങ്ങളെക്കുറിച്ചുള്ള ഈ വാർത്ത സുഹൃത്തുക്കൾക്കും ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: Kanayi Kunhiraman's new sculptures unveiled at Kasaragod District Panchayat.

#KasargodVartha #KanayiKunhiraman #KasaragodNews #SculptureUnveiling #EndosulfanVictims #FineArtsCollege