ദേശീയപാതയ്ക്ക് ഭീഷണിയായി കല്ലങ്കൈയിലെ പഴയ സ്കൂൾ കെട്ടിടം

കല്ലങ്കൈ: (KasargodVartha) ഏത് നിമിഷവും ദേശീയപാതയിലേക്ക് തകർന്നുവീഴാവുന്ന നിലയിലുള്ള കല്ലങ്കൈ എ എൽ പി സ്കൂൾ കെട്ടിടം പൊളിച്ചുമാറ്റാൻ സ്കൂൾ അധികൃതർ നടപടി സ്വീകരിക്കണമെന്ന് ആവശ്യമുയരുന്നു.

ദേശീയപാതയുടെ സർവീസ് റോഡിന് അരികിൽ നിർമ്മിക്കുന്ന നടപ്പാതയ്ക്കായി നിർമ്മാണക്കമ്പനി അധികൃതർ മണ്ണെടുത്തപ്പോഴാണ് ഈ ഭാഗത്ത് മണ്ണിടിച്ചിൽ ഉണ്ടായത്. ഇതോടെയാണ് സ്കൂൾ കെട്ടിടം അപകട ഭീഷണിയിലായത്.

നേരത്തേ തന്നെ കെട്ടിടത്തിന് തകർച്ചാ ഭീഷണി നിലനിന്നിരുന്നതിനാൽ 'അൺഫിറ്റ്' ആയി പ്രഖ്യാപിച്ച് ക്ലാസ്സുകൾ നടത്താതെ ഒഴിച്ചിട്ടിരുന്നു. ഇതിന് പകരം പുതിയ കെട്ടിടം വന്നുവെങ്കിലും പഴയ ഓടുമേഞ്ഞ കെട്ടിടം അവിടെത്തന്നെ നിലനിന്നതാണ് ഇപ്പോൾ ദേശീയപാതയ്ക്ക് ഭീഷണിയായി മാറിയത്. 

മുന്നൂറിലധികം കുട്ടികളാണ് ഈ സ്കൂളിൽ പഠിക്കുന്നത്. കുട്ടികൾ കളിക്കുന്നത് ഈ കെട്ടിടത്തിന് സമീപത്തായതിനാൽ അധ്യാപകർക്കും രക്ഷിതാക്കൾക്കും വലിയ ആശങ്കയുണ്ട്. ദേശീയപാത സർവീസ് റോഡിന് മുകളിലായിട്ടാണ് സ്കൂൾ കെട്ടിടം നിൽക്കുന്നത്. 

നിർമ്മാണത്തിന്റെ ഭാഗമായി ഇവിടെനിന്ന് കെട്ടിടത്തിന് ഭീഷണിയാകുന്ന തരത്തിൽ നിർമ്മാണക്കമ്പനി അധികൃതർ മണ്ണെടുത്തിരുന്നു. ഇതേത്തുടർന്ന് കെട്ടിടം വലിയ അപകട ഭീഷണിയിലാണെന്ന് കണ്ടാൽത്തന്നെ മനസ്സിലാകും. 

ഇപ്പോൾ മണ്ണിടിച്ചിൽകൂടി ഉണ്ടായ സാഹചര്യത്തിൽ കെട്ടിടം ഏതു നിമിഷവും നിലംപതിക്കുമെന്ന കാര്യത്തിൽ നാട്ടുകാർക്ക് രണ്ടഭിപ്രായമില്ല. കെട്ടിടത്തിൽ ക്ലാസ്സുകൾ നടക്കുന്നില്ല എന്നത് മാത്രമാണ് രക്ഷിതാക്കൾക്ക് ഏക ആശ്വാസം. 

എന്നാൽ, ഇടിഞ്ഞുവീഴാൻ സാധ്യതയുള്ളത് ദേശീയപാതയിലേക്കാണ് എന്നതിനാൽ നാട്ടുകാർക്കും യാത്രക്കാർക്കും വലിയ ആശങ്കയുണ്ട്. ബസ്സുകളടക്കം ദിവസവും നൂറുകണക്കിന് വാഹനങ്ങളാണ് ഇതുവഴി കടന്നുപോകുന്നത്.

പ്രവർത്തനരഹിതമായി കിടക്കുന്ന കെട്ടിടം പൊളിച്ചുമാറ്റാൻ സ്കൂൾ അധികൃതർ അടിയന്തര നടപടി സ്വീകരിക്കണമെന്നാണ് നാട്ടുകാരുടെ ആവശ്യം.

ഈ വിഷയത്തിൽ നിങ്ങളുടെ അഭിപ്രായം എന്താണ്? കെട്ടിടം എത്രയും പെട്ടെന്ന് പൊളിച്ചുമാറ്റേണ്ടതുണ്ടോ? കമന്റ് ചെയ്യുക.

Article Summary: A dilapidated school building in Kallankai poses a serious threat to a national highway.

#Kallankai #SchoolBuilding #NationalHighway #KeralaNews #Kasargod #SafetyRisk