കക്കോട്ടികുളം നടപ്പാത നന്നാക്കണം: സുരക്ഷിത യാത്രയൊരുക്കാൻ മനുഷ്യാവകാശ കമ്മീഷൻ ഉത്തരവ്

കാസർകോട്: (KasargodVartha) നീലേശ്വരം നഗരസഭയിലെ ആറാം വാർഡിൽ പേരോൽ-പാലക്കാട് ലിങ്ക് റോഡിനോട് ചേർന്നുള്ള കക്കോട്ടികുളം നടപ്പാത നന്നാക്കി കാൽനടയാത്രക്കാർക്ക് സുരക്ഷിതമായ യാത്രാസൗകര്യം ഒരുക്കണമെന്ന് മനുഷ്യാവകാശ കമ്മീഷൻ നിർദ്ദേശം നൽകി.

ജുഡീഷ്യൽ അംഗം കെ. ബൈജുനാഥ് അധ്യക്ഷനായ കമ്മീഷൻ നീലേശ്വരം നഗരസഭാ സെക്രട്ടറിക്ക് നൽകിയ നിർദ്ദേശത്തിലാണ് നടപടിക്ക് ഉത്തരവായത്. നടപ്പാതയുടെ വീതി കൂട്ടുന്നതിനായി നഗരസഭ താത്പര്യം പ്രകടിപ്പിച്ചിരുന്നുവെങ്കിലും, സ്ഥലമുടമകൾ സൗജന്യമായി ഭൂമി വിട്ടുനൽകാൻ തയ്യാറാകാത്തതിനാൽ നടപടികൾക്ക് തടസ്സം നേരിട്ടതായി സെക്രട്ടറി കമ്മീഷനെ അറിയിച്ചു.

പരാതിക്കാരന്റെ ആവശ്യം ന്യായമാണെങ്കിലും സ്വകാര്യ സ്ഥലമുടമകളെ ഭൂമി വിട്ടുനൽകാൻ നിർബന്ധിക്കാൻ കഴിയില്ലെന്ന് കമ്മീഷൻ ഉത്തരവിൽ വ്യക്തമാക്കി.

300 മീറ്റർ നീളമുള്ള നടപ്പാത പൊട്ടിപ്പൊളിഞ്ഞ അവസ്ഥയിലാണെന്നും മഴക്കാലത്ത് അതുവഴി നടന്നുപോകാൻ ബുദ്ധിമുട്ടുണ്ടെന്നും ചൂണ്ടിക്കാട്ടി നീലേശ്വരം സ്വദേശി അമ്പു നായരും പ്രദേശവാസികളും ചേർന്ന് സമർപ്പിച്ച പരാതിയിലാണ് കമ്മീഷൻ നടപടി സ്വീകരിച്ചത്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ കമൻ്റ് ചെയ്യുക. ഈ വിഷയത്തിൽ നഗരസഭയുടെ ഭാഗത്ത് നിന്ന് കൂടുതൽ ശ്രദ്ധയുണ്ടാവേണ്ടേ? 

Article Summary: Human Rights Commission orders Nileshwaram Municipality to repair Kakkottikulam walkway.

#HumanRightsCommission #Kakkottikulam #Nileshwaram #Kasargod #WalkwayRepair #KeralaNews