കലവറയും കലാഘോഷവും; ഒമ്പത് വർഷത്തെ കാത്തിരിപ്പിനൊടുവിൽ കളിയാട്ട വിസ്മയം മെയ് 2, 3 തീയതികളിൽ

നീലേശ്വരം: (KasargodVartha) കടിഞ്ഞിക്കടവ് മുട്ടത്ത് തറവാട്ടിൽ ഒമ്പത് വർഷത്തെ ഇടവേളയ്ക്ക് ശേഷം മെയ് രണ്ട്, മൂന്ന് തീയതികളിൽ കളിയാട്ട മഹോത്സവം നടക്കും. കളിയാട്ടത്തിനുള്ള എല്ലാ ഒരുക്കങ്ങളും പൂർത്തിയായതായി ആഘോഷ കമ്മിറ്റി ഭാരവാഹികൾ വാർത്താ സമ്മേളനത്തിൽ അറിയിച്ചു.

കണ്ണൂർ ജില്ലയിലെ കുഞ്ഞിമംഗലം മുതൽ കർണാടക അതിർത്തിയോട് ചേർന്നുള്ള സോമേശ്വരം വരെയുള്ള പ്രദേശങ്ങളിലെ 11 ക്ഷേത്ര പരിധികളിൽ താമസിക്കുന്ന മുകയ സമുദായത്തിലെ പ്രധാനപ്പെട്ട തറവാട്ടുകാരാണ് മുട്ടത്ത് തറവാട്ടുകാർ.

മെയ് രണ്ടാം തീയതി ഉച്ചയ്ക്ക് 12 മണിക്ക് നീലേശ്വരം കടിഞ്ഞിക്കടവ് ശ്രീ ആര്യക്കര ഭഗവതി ക്ഷേത്രത്തിൽ നിന്നും ദീപവും തിരിയും കൊണ്ടുവരുന്നതോടെ കളിയാട്ട മഹോത്സവത്തിന് ആരംഭം കുറിക്കും. ഉത്സവത്തിന് മുന്നോടിയായി കഴിഞ്ഞ ഏപ്രിൽ 25 ന് കുലകൊത്തൽ ചടങ്ങും തുടർന്ന് തെയ്യക്കോലക്കാർക്കുള്ള അടയാളം നൽകുന്ന ചടങ്ങും നടന്നിരുന്നു.

മെയ് രണ്ടാം തീയതി ദീപവും തിരിയും കൊണ്ടുവന്ന ശേഷം നീലേശ്വരം ശ്രീ ആര്യക്കര ഭഗവതി ക്ഷേത്രത്തിൽ നിന്നും കലവറ ഘോഷയാത്ര നടക്കും. മുട്ടത്ത് തറവാട്ടുകാർക്ക് പുറമെ കാരക്കടവത്ത് തറവാട്ടുകാരും സമുദായത്തിലെ മറ്റു തറവാട്ടുകളിലെ സ്ത്രീകളടക്കമുള്ള നിരവധിപേർ കലവറ ഘോഷയാത്രയിൽ പങ്കുചേരും.

കലവറ ഘോഷയാത്രയ്ക്ക് ശേഷം വൈകിട്ട് നടക്കുന്ന സാംസ്കാരിക സമ്മേളനം പ്രമുഖ ഫോക്ക്‌ലോറിസ്റ്റ് രാഘവൻ പയ്യനാട് ഉദ്ഘാടനം ചെയ്യും. ചന്ദ്രൻ മുട്ടത്ത് ആമുഖ പ്രഭാഷണം നടത്തും. പഠനരംഗത്തും മറ്റ് വിവിധ മേഖലകളിലും മികച്ച നേട്ടങ്ങൾ കരസ്ഥമാക്കിയ കുട്ടികളെയും വ്യക്തികളെയും ചടങ്ങിൽ വെച്ച് അനുമോദിക്കും. 

തുടർന്ന് ബ്രോഷർ പ്രകാശനം നടക്കും. പ്രശസ്ത നാടൻ കലാ ഗവേഷകൻ രാഘവൻ പയ്യനാടാണ് ബ്രോഷർ പ്രകാശനം നിർവഹിക്കുന്നത്. ഇതിനു ശേഷം വിവിധ കലാപരിപാടികൾ അരങ്ങേറും.

വൈകിട്ട് ആറര മണിക്ക് ‘കാവൽ ദൈവങ്ങൾ’ എന്ന ഡോക്യുമെന്ററി പ്രദർശനവും തിരുവാതിര ഫ്യൂഷനും സംഘടിപ്പിച്ചിട്ടുണ്ട്.

രാത്രി 8 മണിക്ക് തിടങ്ങൽ നടക്കും. തുടർന്ന് ഉച്ചൂളിക്കടവത്ത് ഭഗവതി, ആയിറ്റി ഭഗവതി, മേച്ചേരി ചാമുണ്ഡി, വിഷ്ണുമൂർത്തി എന്നീ തെയ്യങ്ങളുടെ തോറ്റങ്ങൾ പുറപ്പെടും.

മെയ് മൂന്നാം തീയതി ശനിയാഴ്ച രാവിലെ ഒമ്പത് മണിക്ക് മേച്ചേരി ചാമുണ്ഡിയുടെ പുറപ്പാട് നടക്കും. 9.30 ന് ആയിറ്റി ഭഗവതിയുടെ പുറപ്പാടും രാവിലെ 11 മണിക്ക് വിഷ്ണുമൂർത്തിയുടെ പുറപ്പാടും ഉണ്ടാകും. ഉച്ചയ്ക്ക് 12 മണിക്കാണ് ഉച്ചൂളിക്കടവത്ത് ഭഗവതിയുടെ തിരുമുടി നിവരുന്നത്. തുടർന്ന് എല്ലാ ഭക്തജനങ്ങൾക്കും അന്നദാനം ഉണ്ടായിരിക്കും.

വാർത്താ സമ്മേളനത്തിൽ ആഘോഷ കമ്മിറ്റി ചെയർമാൻ കെ.വി.വിജയൻ, ജനറൽ കൺവീനർ മുട്ടത്ത് നാരായണൻ മാസ്റ്റർ, എം.കുഞ്ഞിരാമൻ, മുട്ടത്ത് രാഘവൻ മാസ്റ്റർ, സുരേഷ് കൊട്രച്ചാൽ, കുഞ്ഞിക്കണ്ണൻ മുട്ടത്ത്, ദാമോദരൻ മുട്ടത്ത്, കെ.വി.സുരേഷ്, രാമചന്ദ്രൻ വെങ്ങാട്ട് എന്നിവർ പങ്കെടുത്തു.

കടിഞ്ഞിക്കടവ് കളിയാട്ട മഹോത്സവത്തെക്കുറിച്ചുള്ള ഈ വാർത്ത ഷെയർ ചെയ്യൂ! അഭിപ്രായങ്ങളും പങ്കുവെക്കൂ.

Summary: After a nine-year gap, the Kaliyatta Mahotsavam will be held at Kadinjikkadavu Muttathu Tharavadu on May 2nd and 3rd. Preparations are complete, and the festival will feature a procession, cultural events, and performances of various Theyyams, including Uchoolikkadavath Bhagavathi.

#Kaliyattam, #KeralaCulture, #Nileshwaram, #Theyyam, #Festival, #Tradition