പിഎംശ്രീ പദ്ധതി: സിപിഐയെ മുഖ്യമന്ത്രി പിണറായി ഉറക്കിക്കിടത്തിയിരിക്കുന്നുവെന്ന് ജെബി മേത്തർ

കാസർകോട്: (KasargodVartha) പി എം ശ്രീ പദ്ധതിയുടെ കാര്യത്തിൽ സി പി ഐയെ മുഖ്യമന്ത്രി പിണറായി വിജയൻ ഉറക്കിക്കിടത്തിയിരിക്കുകയാണെന്ന് മഹിളാ കോൺഗ്രസ് സംസ്ഥാന പ്രസിഡണ്ട് ജെബി മേത്തർ എം പി പറഞ്ഞു. കാസർകോട് ഗസ്റ്റ്ഹൗസിൽ മാധ്യമപ്രവർത്തകരോട് സംസാരിക്കുകയായിരുന്നു അവർ. പി എം ശ്രീ കേരളത്തിൽ പിണറായിയുടെ പ്രൈവറ്റ് പ്രോജക്ടാണെന്നും അവർ രൂക്ഷമായി ആരോപിച്ചു.

മോദി, മോൾ, മണി

പിണറായി വിജയൻ കാണുന്നത് മോദി, മോൾ, മണി (പണം) മാത്രമാണെന്ന് ജെബി മേത്തർ വിമർശിച്ചു. 1031 എൻഡോസൾഫാൻ ദുരിതബാധിതരെ പട്ടികയിൽ ഉൾപ്പെടുത്തുമെന്ന് മുഖ്യമന്ത്രി പിണറായി വിജയൻ നിയമസഭയിൽ പറഞ്ഞിരുന്നുവെങ്കിലും ഇന്നുവരെ അത് നടപ്പായിട്ടില്ലെന്നും അവർ ചൂണ്ടിക്കാട്ടി.

പി ആർ വർക്ക് വിമർശനം

പി ആർ വർക്കിനായി കോടികൾ ചെലവഴിക്കുന്ന സർക്കാർ ദുരിതബാധിതരോട് യാതൊരു ഉത്തരവാദിത്തവും കാണിക്കുന്നില്ലെന്നും ജെബി മേത്തർ എം പി കുറ്റപ്പെടുത്തി. ഈ വിഷയത്തിൽ സർക്കാരിൻ്റെ ഭാഗത്തുനിന്ന് തികഞ്ഞ അവഗണനയാണ് ഉണ്ടാകുന്നതെന്നും അവർ അഭിപ്രായപ്പെട്ടു.

ഫർഹ ഫാത്തിമയ്‌ക്കെതിരെ നടപടി

വനിതാ മാധ്യമപ്രവർത്തകയ്ക്കെതിരായ അധിക്ഷേപപരാമർശത്തിൽ മഹിളാ കോൺഗ്രസ് നേതാവ് ഫർഹ ഫാത്തിമയ്ക്കെതിരെ നടപടി സ്വീകരിക്കുമെന്ന് സംസ്ഥാന അധ്യക്ഷ ജെബി മേത്തർ എം പി അറിയിച്ചു. ‘സ്ത്രീകൾക്കെതിരായ മോശം പരാമർശങ്ങൾ ഒരിക്കലും അംഗീകരിക്കാനാകില്ല. അത് ആരാണ് നടത്തിയാലും തെറ്റാണ്’ എന്ന് അവർ വ്യക്തമാക്കി. ‘രാഹുൽ മാങ്കുട്ടത്തിലിനെ പിന്തുണയ്ക്കുന്ന സമീപനം ആരും സ്വീകരിക്കരുത്. പാർട്ടി തീരുമാനം അംഗീകരിക്കണം’ എന്നും ജെബി മേത്തർ കൂട്ടിച്ചേർത്തു.

പി എം ശ്രീ പദ്ധതിയെക്കുറിച്ചും എൻഡോസൾഫാൻ ദുരിതബാധിതരെക്കുറിച്ചുമുള്ള ജെബി മേത്തറിൻ്റെ വിമർശനങ്ങളെക്കുറിച്ച് നിങ്ങളുടെ അഭിപ്രായം പങ്കുവെക്കുക.

Article Summary: Jebi Mather MP criticizes CM Pinarayi over PM Sree and Endosulfan victims' neglect.

#JebiMather #KeralaPolitics #PMSree #EndosulfanVictims #MahilaCongress #LDF