ജൽ ജീവൻ പദ്ധതി പാളി; കോടികൾ ചെലവഴിച്ചിട്ടും കുടിവെള്ളമില്ലെന്ന് പരാതി, അന്വേഷണം വേണമെന്ന് ആവശ്യം

കാസർകോട്: (KasargodVartha) മുഴുവൻ ഗ്രാമീണ വീടുകളിലും കുടിവെള്ളം എത്തിക്കുക എന്ന ലക്ഷ്യത്തോടെ കേന്ദ്ര-സംസ്ഥാന സർക്കാറുകൾ കോടികൾ ചെലവഴിച്ച് നടപ്പിലാക്കിയ ജൽ ജീവൻ പദ്ധതി സമ്പൂർണ്ണ പരാജയമെന്ന് ആക്ഷേപം. ദീർഘവീക്ഷണമില്ലാതെയും കൃത്യമായ ആസൂത്രണമില്ലാതെയും പദ്ധതി നടപ്പിലാക്കാൻ ശ്രമിച്ചതാണ് തിരിച്ചടിയായത്. 

സിഎജി റിപ്പോർട്ടിൽ പറയുന്നതനുസരിച്ച് ഈ പദ്ധതിക്കായി 18,643 കോടി രൂപ ഇതിനകം ചെലവഴിച്ചിട്ടുണ്ട്. എന്നാൽ കരാറുകാർക്ക് പണം നൽകിയതല്ലാതെ പദ്ധതി പ്രകാരം ഒരു തുള്ളി വെള്ളം പോലും ഇതുവരെ പല പൈപ്പ് ലൈനുകൾ വഴിയും ലഭിച്ചിട്ടില്ല. പലയിടത്തും പൈപ്പുകൾ സ്ഥാപിച്ചതല്ലാതെ ജലസ്രോതസ്സുകൾ എവിടെയാണെന്ന് പോലും അധികൃതർക്ക് അറിയില്ല എന്നതാണ് വാസ്തവം. 2025-ൽ പൂർത്തിയാക്കേണ്ടിയിരുന്ന പദ്ധതിയുടെ കാലാവധി 2028 ഡിസംബർ വരെ കേന്ദ്ര സർക്കാർ നീട്ടി നൽകിയിട്ടുണ്ട്.

അംഗൻവാടികളിലും ദുരിതം

കുമ്പളയിലെ വിവിധ അംഗൻവാടികളിൽ പോലും പൈപ്പ് ലൈൻ സ്ഥാപിച്ചതല്ലാതെ കുടിവെള്ളം എത്തുന്നില്ല. പലയിടത്തും ഇതിനകം കുടിവെള്ള ലഭ്യതയുള്ള അംഗൻവാടികളിൽ പോലും അനാവശ്യമായി ടാപ്പുകൾ സ്ഥാപിച്ചിട്ടുണ്ട്. 

മാത്രമല്ല, പദ്ധതിയുടെ പേരിൽ അംഗൻവാടി ജീവനക്കാരോട് അമിത നിരക്ക് ഈടാക്കാൻ അധികൃതർ ശ്രമിക്കുന്നതായും പരാതിയുണ്ട്. മുമ്പും സമാനമായ രീതിയിൽ കുമ്പളയിലെ വിവിധ പ്രദേശങ്ങളിൽ പൈപ്പ് ലൈൻ സ്ഥാപിച്ചതല്ലാതെ വെള്ളം എത്തിയിരുന്നില്ലെന്നും, അവയെല്ലാം പിന്നീട് നശിച്ചുപോയെന്നും നാട്ടുകാർ ചൂണ്ടിക്കാട്ടുന്നു.

ഉപഭോക്താക്കൾ മുഖം തിരിക്കുന്നു

നേരത്തെ ജൽ ജീവൻ പദ്ധതി സൗജന്യമാണെന്നായിരുന്നു വാഗ്ദാനമെങ്കിലും, വെള്ളം ടാപ്പുകളിൽ വരാതെ തന്നെ ചിലയിടങ്ങളിൽ അമിത നിരക്കുള്ള ബില്ലുകൾ വന്ന് തുടങ്ങിയതോടെ ഉപഭോക്താക്കൾ വലിയ ആശങ്കയിലാണ്. കണക്ഷൻ വിച്ഛേദിക്കാൻ പലരും പരക്കം പായുകയാണ്. പദ്ധതിയുടെ പാളിച്ചകളെപ്പറ്റി സമഗ്രമായ അന്വേഷണം നടത്തണമെന്നാവശ്യപ്പെട്ട് വിവിധ സംഘടനകളും രംഗത്തെത്തിയിട്ടുണ്ട്. 

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകൾക്കായി ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമന്റായി രേഖപ്പെടുത്താം.

Article Summary: The Jal Jeevan Mission, aimed at providing tap water to all rural homes, has faced severe criticism in Kasaragod and other areas for failing to deliver water despite heavy expenditure. While authorities claim significant progress in pipe laying, residents complain of dry taps, high bills, and lack of foresight, leading to demands for a comprehensive investigation.

#JalJeevanMission #KasargodNews #WaterCrisis #CorruptionAllegation #KeralaDevelopment #PublicGrievance #AparnaNews