അനധികൃത മീൻപിടിത്തം: 2 ബോട്ടുകൾക്ക് ഫിഷറീസ് വകുപ്പ് 5 ലക്ഷം രൂപ പിഴയിട്ടു
● മറൈൻ എൻഫോഴ്സ്മെൻ്റും ഫിഷറീസ് വകുപ്പും സംയുക്തമായി നടത്തിയ പട്രോളിംഗിലാണ് ബോട്ടുകൾ പിടിയിലായത്.
● മൊഗ്രാൽ തീരത്തുവെച്ചാണ് നൈറ്റ് ട്രോളിംഗ് കണ്ടെത്തിയത്.
● നിയമലംഘനം നടന്നത് 12 നോട്ടിക്കൽ മൈലിനുള്ളിൽ വെച്ചാണ്.
● കർണാടക ബോട്ടുകളായ വൈറ്റ് സ്റ്റോൺ, എം പി എച്ച് ഡയമണ്ട് എന്നിവയുടെ ഉടമകൾക്കാണ് പിഴ വിധിച്ചത്.
● കേരള സമുദ്ര മത്സ്യബന്ധന നിയന്ത്രണ നിയമപ്രകാരമാണ് പിഴ ചുമത്തിയത്.
കാസർകോട്: (KasargodVartha) അനധികൃതമായി മീൻപിടിത്തം നടത്തിയ രണ്ട് ബോട്ടുകൾ പിടികൂടി ഫിഷറീസ് വകുപ്പ് അഞ്ച് ലക്ഷം രൂപ പിഴ ഈടാക്കി. മറൈൻ എൻഫോഴ്സ്മെൻ്റും ഫിഷറീസ് വകുപ്പും സംയുക്തമായി നടത്തിയ രാത്രികാല പട്രോളിംഗിനിടെയാണ് ബോട്ടുകൾ പിടിയിലായത്.
വ്യാഴാഴ്ച (16.10.2025) രാത്രി മൊഗ്രാൽ തീരത്ത് നിന്ന് 12 നോട്ടിക്കൽ മൈലിനുള്ളിൽ നൈറ്റ് ട്രോളിംഗ് നടത്തിയതിനെ തുടർന്നാണ് അധികൃതർ നടപടിയെടുത്തത്. കേരള സമുദ്ര മത്സ്യബന്ധന നിയന്ത്രണ നിയമപ്രകാരമുള്ള അഡ്ജുഡിക്കേഷൻ നടപടികൾക്ക് ശേഷമാണ് പിഴ വിധിച്ചത്.
ഫിഷറീസ് ഡെപ്യൂട്ടി ഡയറക്ടർ കെ എ ലബീബ് ആണ് കർണാടക ബോട്ടുകളായ വൈറ്റ് സ്റ്റോൺ, എം പി എച്ച് ഡയമണ്ട് എന്നിവയുടെ ഉടമകൾക്ക് പിഴ വിധിച്ചത്.
ഫിഷറീസ് അസിസ്റ്റൻ്റ് ഡയറക്ടർ തസ്നിം ബീഗത്തിൻ്റെ നിർദേശാനുസരണം കാഞ്ഞങ്ങാട് ഫിഷറീസ് എക്സ്റ്റൻഷൻ ഓഫീസർ കെ എസ് ടെസ്സിയുടെ നേതൃത്വത്തിലുള്ള സംഘമാണ് ബോട്ടുകൾ പിടികൂടിയത്. മറൈൻ എൻഫോഴ്സ്മെൻ്റ് വിംഗിലെ സിപിഒ അർജുൻ, കോസ്റ്റൽ പൊലീസ് ഉദ്യോഗസ്ഥരായ ഗിരീഷ്കുമാർ, ജെയ്സൺ സിറിയക്, സുഭാഷ് വി കെ, റെസ്ക്യൂ ഗാർഡ്മാരായ അജീഷ് കുമാർ, ശിവകുമാർ, മനു, ജയദേവൻ, ശശി, എഞ്ചിൻ ഡ്രൈവർമാരായ അഷ്റഫ്, ഇക്ബാൽ എന്നിവരും സംഘത്തിൽ ഉണ്ടായിരുന്നു.
നിയമലംഘനം നടത്തുന്ന ബോട്ടുകൾക്കെതിരെ തുടർന്നും ശക്തമായ നടപടികൾ തുടരുമെന്ന് കാസർകോട് ഫിഷറീസ് ഡെപ്യൂട്ടി ഡയറക്ടർ അറിയിച്ചു.
അനധികൃത മീൻപിടിത്തത്തിനെതിരെ ശക്തമായ നടപടി ആവശ്യമുണ്ടോ? നിങ്ങളുടെ അഭിപ്രായം കമൻ്റ് ചെയ്യുക.
Article Summary: Fisheries Department fines two boats 5 lakh rupees for illegal night trawling.
#IllegalFishing #FisheriesDept #Kasaragod #NightTrawling #Fine #MarineEnforcement
