യുവ സംരംഭകത്വത്തിന് കരുത്തുപകരാൻ ഐഇഡിസി ഉച്ചകോടി കാസർകോട് എൽബിഎസ് എഞ്ചിനീയറിംഗ് കോളേജിൽ ആരംഭിച്ചു; ഇന്ത്യയിലെ ആദ്യ ‘ഇന്നൊവേഷൻ ട്രെയിൻ’ പ്രധാന ആകർഷണം

കാസർകോട്: (KasargodVartha) കേരളത്തിലെ യുവസംരംഭകത്വ ചരിത്രത്തിൽ പുതിയ അധ്യായം കുറിച്ചുകൊണ്ട് കാസർകോട് എൽ.ബി.എസ് എഞ്ചിനീയറിംഗ് കോളേജിൽ ഐ.ഇ.ഡി.സി ഉച്ചകോടിക്ക് ആവേശകരമായ തുടക്കമായി. ഉന്നത വിദ്യാഭ്യാസ മന്ത്രി ആർ ബിന്ദുവിന്റെ അഭാവത്തിൽ ഉദുമ എംഎൽഎ സി എച്ച് കുഞ്ഞമ്പു ഉച്ചകോടി ഉദ്ഘാടനം ചെയ്തു. കാസർകോട് എംഎൽഎ എൻ എ നെല്ലിക്കുന്ന്, ജില്ലാ കളക്ടർ കെ ഇമ്പശേഖരൻ, സ്റ്റാർട്ടപ്പ് മിഷൻ സിഇഒ അനൂപ് അംബിക തുങ്ങിയവർ ഉദ്ഘാടന ചടങ്ങിൽ പങ്കെടുത്തു.

കേരള സ്റ്റാർട്ടപ്പ് മിഷൻ സംഘടിപ്പിക്കുന്ന ഏഷ്യയിലെ തന്നെ ഏറ്റവും വലിയ യുവസംരംഭക സംഗമങ്ങളിലൊന്നായ ഈ ഉച്ചകോടി, ക്യാമ്പസിനെ ആശയങ്ങളുടെയും പുതുമകളുടെയും വേദിയാക്കി മാറ്റിയിരിക്കുകയാണ്. സംസ്ഥാനത്തുടനീളമുള്ള 550-ലധികം കോളേജ് ഐ.ഇ.ഡി.സികളിൽ നിന്നായി ആയിരക്കണക്കിന് വിദ്യാർത്ഥികളും യുവസംരംഭകരും സ്റ്റാർട്ടപ്പ് സ്ഥാപകരും വ്യവസായ വിദഗ്ധരും ഈ സംഗമത്തിൽ പങ്കെടുക്കുന്നുണ്ട്. 

വിദ്യാർത്ഥികളിൽ സംരംഭകത്വ ചിന്തകൾ വളർത്തുന്നതിനും പ്രായോഗികമായ ആശയങ്ങൾ പങ്കുവെക്കുന്നതിനുമുള്ള മികച്ച പ്ലാറ്റ്‌ഫോമായാണ് ഉച്ചകോടി വിഭാവനം ചെയ്തിരിക്കുന്നത്. വനിതാ സംരംഭകർക്ക് പ്രത്യേക പ്രാധാന്യം നൽകുന്ന സെഷനുകൾ, സ്റ്റാർട്ടപ്പ് എക്സ്പോ, കരകൗശല സ്റ്റാളുകൾ എന്നിവ പരിപാടിയുടെ മാറ്റ് കൂട്ടുന്നു.

ഇന്ത്യയിലെ ആദ്യത്തെ ചാർട്ട് ചെയ്ത ‘ഇന്നൊവേഷൻ ട്രെയിൻ’ ആണ് ഇത്തവണത്തെ ഉച്ചകോടിയുടെ ഏറ്റവും വലിയ സവിശേഷത. ഞായറാഴ്ച, (ഡിസംബർ 21) ഉച്ചയ്ക്ക് രണ്ടിന് തിരുവനന്തപുരം സെൻട്രൽ സ്റ്റേഷനിൽ നിന്ന് യാത്ര ആരംഭിച്ച ട്രെയിൻ വിവിധ ജില്ലകളിലൂടെ സഞ്ചരിച്ച് തിങ്കളാഴ്ച രാവിലെ കാസർകോട് എത്തി. എൽ.ബി.എസ് കോളേജിലെ ഉച്ചകോടിയോടനുബന്ധിച്ചാണ് ട്രെയിൻ യാത്ര സമാപിച്ചത്. പ്രാദേശിക പ്രശ്നങ്ങൾ തിരിച്ചറിയാനും അവയ്ക്ക് പ്രായോഗികമായ പരിഹാരങ്ങൾ കണ്ടെത്താനും സഹായിക്കുന്ന ചലനാത്മകമായ ഒരു ഐഡിയേഷൻ സോണായിട്ടാണ് ഈ ട്രെയിൻ പ്രവർത്തിച്ചത്.

കൃഷി, മത്സ്യബന്ധനം, പൊതുസേവനങ്ങൾ, കാലാവസ്ഥാ വ്യതിയാനം, ആരോഗ്യസംരക്ഷണം, വിദ്യാഭ്യാസം, ഉപജീവനം തുടങ്ങിയ സുപ്രധാന മേഖലകളിലെ വെല്ലുവിളികൾക്ക് പരിഹാരം കാണുന്ന ഏകദേശം 200 പുതിയ ആശയങ്ങൾ ഈ ഉദ്യമത്തിലൂടെ രൂപപ്പെടുമെന്നാണ് പ്രതീക്ഷിക്കുന്നത്. ഇത്തരത്തിൽ തിരഞ്ഞെടുക്കപ്പെടുന്ന ആശയങ്ങൾക്ക് കേരള സ്റ്റാർട്ടപ്പ് മിഷൻ്റെ (കെ.എസ്.യു.എം) നേതൃത്വത്തിൽ വിദഗ്ധ മെൻ്റർഷിപ്പ്, പ്രൂഫ് ഓഫ് കോൺസെപ്റ്റ് വികസനം, ഇൻക്യൂബേഷൻ സൗകര്യങ്ങൾ എന്നിവ ഉറപ്പാക്കും.

ഉച്ചകോടിയോടനുബന്ധിച്ച് ഞായറാഴ്ച, (ഡിസംബർ 21) കാസർകോട് കേരള കേന്ദ്ര സർവകലാശാലയിൽ ഐ.ഇ.ഡി.സി നോഡൽ ഓഫീസർമാരുടെ സംസ്ഥാനതല യോഗവും നടന്നു. ഐ.ഇ.ഡി.സി പ്രവർത്തനങ്ങളുടെ നിലവിലെ പുരോഗതി വിലയിരുത്തുന്നതിനൊപ്പം ഭാവിയിലെ സംരംഭകത്വ പദ്ധതികളെക്കുറിച്ചും മികച്ച മാതൃകകളെക്കുറിച്ചും യോഗത്തിൽ വിശദമായ ചർച്ചകളാണ് നടന്നത്.

നിരവധി വിജ്ഞാനപ്രദമായ മത്സരങ്ങളും സംവാദങ്ങളും ഉച്ചകോടിയുടെ ഭാഗമായി ഒരുക്കിയിട്ടുണ്ട്. വൺ ടാങ്ക്, ഫിയർഫ്രോഗ് ഹൊറർ ഗെയിം ഡെവലപ്‌മെന്റ് ചാലഞ്ച്, ടെൻ സൂപ്പർ ഗേൾസ്, എ.ഐ ഹാക്കതോൺ, ടൂറിസം ഐഡിയതോൺ എന്നിവ ഇതിൽ പ്രധാനപെട്ടവയാണ്. കൂടാതെ സ്റ്റാർട്ടപ്പ് എക്സ്പോ സ്റ്റാളുകൾ പുതിയ സാങ്കേതികവിദ്യകളെ പരിചയപ്പെടാൻ അവസരമൊരുക്കും. കേരളത്തിലെ യുവസംരംഭക സമൂഹത്തിന് കൃത്യമായ ദിശാബോധം നൽകാൻ ഈ ഉച്ചകോടി സഹായിക്കുമെന്ന് കേരള സ്റ്റാർട്ടപ്പ് മിഷൻ പ്രതിനിധികൾ വ്യക്തമാക്കി.

ഈ വാർത്ത നിങ്ങളുടെ സുഹൃത്തുക്കളുമായി പങ്കുവെക്കൂ. 

Article Summary: IEDC Summit 2025 begins in Kasaragod featuring India's first Innovation Train.

#IEDCSummit2025 #InnovationTrain #Kasaragod #StartupKerala #Entrepreneurship #LBSCollege