കാണാതായ 30 കാരിയേയും 17 കാരനെയും ഒരാഴ്ചയായിട്ടും കണ്ടെത്താനായില്ല

ഹൊസങ്കടി: (www.kasargodvartha.com 10.07.2014) ഹൊസങ്കടിയില്‍ നിന്ന് കാണാതായ 30 കാരിയേയും 17 കാരനേയും ഒരാഴ്ചയായിട്ടും കണ്ടെത്തിനായില്ല. മൂന്ന് കുട്ടികളുടെ മാതാവായ യുവതിയേയും നിര്‍മ്മാണത്തൊഴിലാളിയായ യുവാവിനേയുമാണ് കാണാതായത്.

ഹൊസങ്കടി മജ്ബയലില്‍ ഇലി ക്വാര്‍ട്ടേഴ്‌സില്‍ താമസിക്കുന്ന ആമിനയെ(30)യും മജ്ബയല്‍ സ്‌കൂളിന് സമീപം താമസിക്കുന്ന ലോഹിതാക്ഷനെ (17)യുമാണ് കാണാതായത്.  ആമിനയെ കാണാതായതു സംബന്ധിച്ച് സഹോദരന്‍ ഷാഫി നല്‍കിയ പരാതിയില്‍ പോലീസ് കേസെടുത്ത് അന്വേഷണം നടത്തിയെങ്കിലും കണ്ടെത്താന്‍ കഴിഞ്ഞില്ല.

മഞ്ചേശ്വരത്തേക്കെന്ന് പറഞ്ഞ് വീട്ടില്‍ നിന്നിറങ്ങിയ ആമിന പിന്നീട് തിരിച്ച് വന്നില്ലെന്നാണ് പരാതിയില്‍ പറയുന്നത്. ആമിനക്ക് മൂന്ന് മക്കളുണ്ട്. മറ്റൊരു സംഭവത്തിലാണ് ലോഹിതാക്ഷനേയും കാണാതായത്.  ഇരുവരും ഒരുമിച്ച് പോയിരിക്കാനാണ് സാധ്യതയെന്നാണ് പോലീസ് സംശയിക്കുന്നത്.

പതിവുപോലെ രാവിലെ എട്ട് മണിയോടെ ജോലിക്ക് പോയ ലോഹിതാക്ഷ പിന്നീട് തിരിച്ചു വന്നില്ലെന്നാണ് വീട്ടുകാര്‍ പോലീസില്‍ നല്‍കിയ പരാതിയില്‍ പറയുന്നത്.