ആരിക്കാടി ടോൾ പ്ലാസയിലെ പോലീസ് അതിക്രമം; ഒരാഴ്ചയ്ക്കകം റിപ്പോർട്ട് നൽകാൻ മനുഷ്യാവകാശ കമ്മീഷൻ ഉത്തരവ്

കാസർകോട്: (KasargodVartha) കുമ്പള ആരിക്കാടി ടോൾ പ്ലാസയിൽ വാഹനങ്ങൾ നിയന്ത്രിക്കാൻ ഉപയോഗിക്കുന്ന ബൂം ബാരിയർ പതിച്ച് കാറിന് തകരാർ സംഭവിച്ചത് ചോദ്യം ചെയ്ത കുടുംബത്തിന് നേരെ കുമ്പള പോലീസ് അതിക്രമം നടത്തിയതായി പരാതി. സംഭവത്തിൽ മനുഷ്യാവകാശ ലംഘനങ്ങൾ നടന്നിട്ടുണ്ടോ എന്ന് അന്വേഷിക്കാൻ മനുഷ്യാവകാശ കമ്മീഷൻ ഉത്തരവിട്ടു. കാസർകോട് ജില്ലാ പോലീസ് മേധാവി അന്വേഷണം നടത്തി ഒരാഴ്ചയ്ക്കകം റിപ്പോർട്ട് സമർപ്പിക്കണമെന്ന് കമ്മീഷൻ ജുഡീഷ്യൽ അംഗം കെ. ബൈജുനാഥ് നിർദ്ദേശിച്ചു.

ഇക്കഴിഞ്ഞ ബുധനാഴ്ചയാണ് കേസിനാസ്പദമായ സംഭവമുണ്ടായത്. ആശുപത്രി ജീവനക്കാരനായ മുഹമ്മദ് റിയാസും കുടുംബവും സഞ്ചരിച്ചിരുന്ന കാറിലേക്ക് ബൂം ബാരിയർ വീഴുകയായിരുന്നു. ടോൾ ഓൺലൈനായി നൽകിയ ശേഷം വാഹനം മുന്നോട്ടെടുത്തപ്പോഴാണ് ഈ അപകടമുണ്ടായത്. ഇത് ചോദ്യം ചെയ്ത റിയാസും ടോൾ ജീവനക്കാരും തമ്മിൽ വാക്കുതർക്കമുണ്ടായി. സ്ഥലത്തെത്തിയ കുമ്പള പോലീസ് റിയാസിനെ കാറിൽ നിന്നും വലിച്ചിറക്കി കസ്റ്റഡിയിലെടുക്കുകയായിരുന്നു.

വാഹനത്തിൽ റിയാസിനൊപ്പം വയോധികയും ആറുമാസം പ്രായമുള്ള കുഞ്ഞും ഉണ്ടായിരുന്നു. ഇവരെ രണ്ടു മണിക്കൂറോളം കാറിലിരുത്തി പോലീസ് മാനസീകമായി പീഡിപ്പിച്ചതായാണ് പരാതിയിൽ പറയുന്നത്. മാധ്യമ വാർത്തകളുടെ അടിസ്ഥാനത്തിൽ മനുഷ്യാവകാശ പ്രവർത്തകനായ അഡ്വ. വി. ദേവദാസ് സമർപ്പിച്ച പരാതിയിലാണ് കമ്മീഷൻ നടപടി സ്വീകരിച്ചത്. ആരിക്കാടി ടോൾ പിരിവിനെതിരെ നാട്ടുകാർ ഇതിനകം തന്നെ ശക്തമായ പ്രക്ഷോഭത്തിലാണ്.

ഈ കേസ് ഫെബ്രുവരി 11-ന് കാസർകോട് കളക്ടറേറ്റ് കോൺഫറൻസ് ഹാളിൽ നടക്കുന്ന കമ്മീഷന്റെ സിറ്റിംഗിൽ പരിഗണിക്കും. കുടുംബത്തിന് നേരെയുണ്ടായ പോലീസ് അതിക്രമത്തിൽ വലിയ പ്രതിഷേധമാണ് പ്രാദേശികമായി ഉയർന്നിട്ടുള്ളത്.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത സുഹൃത്തുകൾക്കും കുടുംബാംഗങ്ങൾക്കും വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: The Kerala Human Rights Commission has ordered an investigation into the alleged police atrocities against a family at the Arikady toll plaza after a barrier fell on their car.

#KasaragodNews #ArikadyTollPlaza #KeralaHumanRightsCommission #PoliceAtrocity #KumblaPolice #JusticeForFamily #TollProtest