ചലനശേഷി നഷ്ടപ്പെട്ട 30 കാരിയായ വീട്ടമ്മ വേദനതിന്ന് ദുരിത കിടക്കയില്‍

ബദിയഡുക്ക: ചലനശേഷി നഷ്ടപ്പെട്ട 30കാരിയായ വീട്ടമ്മ വേദനതിന്ന് ദുരിത കിടക്കയില്‍.  ചര്‍ളടുക്കയിലെ മുളിപ്പറമ്പില്‍ എസ്.സി. കോളനിയിലെ ക്വാര്‍ട്ടേഴ്‌സില്‍ താമസിക്കുന്ന നഫീസയാണ് കുടുംബത്തിന്റെ ദുരിതത്തിനൊപ്പം രോഗത്തോട് മല്ലടിച്ചുകഴിയുന്നത്.

കര്‍ണാടക ബെല്‍ത്തങ്ങാടിയില്‍ നിന്ന് ഒമ്പതുവര്‍ഷം മുമ്പാണ് നഫീസയുടെ കുടുംബം ബദിയഡുക്കയിലെത്തുന്നത്. നഫീസയെയും മൂന്ന് മക്കളെയും ഭര്‍ത്താവ് അബൂബക്കര്‍ ബദിയഡുക്ക ടൗണിലെ വാഹന സര്‍വീസ് സെന്ററില്‍ കൂലിക്ക് ജോലിയെടുത്താണ് കുടുംബത്തെ സംരക്ഷിക്കുന്നത്.

ഇതിനിടയിലാണ് നാലുവര്‍ഷം മുമ്പാണ് നഫീസക്ക് വയറുവേദന വന്നത്. പല സ്ഥലങ്ങളിലും കൊണ്ടുപോയി ചികിത്സിച്ചെങ്കിലും പൂര്‍ണമായും ഭേദപ്പെട്ടില്ല. രോഗം മൂര്‍ച്ഛിച്ച് നഫീസ തളരുകയായിരുന്നു. കഴിഞ്ഞ ഒമ്പതുമാസമായി രോഗം കൊണ്ട് മല്ലടിക്കുകയാണ് യുവതി. അരക്കെട്ടിനു താഴെ വ്രണമില്ലാത്ത സ്ഥലമില്ല. രണ്ടു കൈക്കും ചലനശേഷിയില്ല. കണ്ണുകള്‍ക്ക് നിറവിത്യാസം വന്നു. രോഗംമൂലമുള്ള കഷ്ടതകാരണം മരണമാണ് ഇതിനേക്കാള്‍ ഭേദമെന്ന് നഫീസ പറയുന്നു.

ഭാര്യയുടെ രോഗ്യം കാരണം കൂലിപ്പണിയെടുത്ത് ജീവിക്കുന്ന ഭര്‍ത്താവിന് ജോലിക്കുപോകാന്‍ പോലും സാധിക്കുന്നില്ല. കുടുംബക്കാര്‍ ആരും അടുത്തില്ലാത്തതിനാല്‍ ഉമ്മയുടെ ശുശ്രൂഷ നടത്താന്‍ കുട്ടികള്‍ക്ക് പഠനം നിര്‍ത്തേണ്ടിവന്നു. ഇങ്ങിനെ ദുരിതകഥ അറിഞ്ഞ ബാറഡുക്കയിലെ ഹനീഫ, സഹോദരന്‍ അബ്ദുര്‍ റഹ്മാന്‍, സുഹൃത്ത് സമീര്‍ എന്നിവര്‍ നഫീസ താമസിക്കുന്ന ക്വാര്‍ട്ടേഴ്‌സിലെത്തി ബദിയഡുക്ക സി എച്ച് സി ആശുപത്രിയിലെത്തിച്ചു.

വിവരമറിഞ്ഞ വിവിധ രാഷ്ട്രീയനേതാക്കളായ മാഹിന്‍ കേളോട്ട്, ജഗന്നാഥ ഷെട്ടി, ഹമീദ് പള്ളത്തടുക്ക. ഗംഗാധരന്‍ ഗോളിയടുക്ക, സുബൈര്‍ ബാപാലിപ്പൊനം, അശ്‌റഫ് കാടമന, സദന ബദിയഡുക്ക, നാരായണന്‍ പൊയ്യക്കണ്ടം, ബദിയടുക്ക വികസന ആക്ഷന്‍ കമ്മിറ്റി ഭാരവാഹികളായ ബി.എസ്. ഇബ്രാഹിം, ബി.എം. ഹനീഫ തുടങ്ങിയവര്‍ ആശുപത്രിയിലെത്തി രോഗത്തെയും ദുരിതത്തെയും കണ്ടറിഞ്ഞ് നഫീസയ്ക്ക് ആശ്വാസം പകര്‍ന്നു.

വിദഗ്ധ ചികിത്സ വേണമെന്ന ഡോക്ടറുടെ നിര്‍ദേശ പ്രകാരം നഫീസയെ പരിയാരം മെഡിക്കല്‍ കോളജാശുപത്രിയിലേക്ക് മാറ്റി.


എന്‍ഡോസള്‍ഫാന്‍ ദുരിതബാധിതര്‍ക്കായി ഡി.വൈ.എഫ്.ഐ. സംഭാവന ചെയ്ത ഇ.കെ. നായനാര്‍ ആശുപത്രിയിലെ ആംബുലന്‍സിലാണ് പരിയാരത്തെത്തിച്ചത്. അടിയന്തിര ചികിത്സക്കായി ബദിയഡുക്ക ടൗണിലെ കടകളില്‍ നിന്ന് ഒരു മണിക്കൂര്‍ കൊണ്ട് 13,000 രൂപ പിരിവെടുത്തു. വിവരമറിഞ്ഞെത്തിയവരും ആശുപത്രിയിലെത്തി സഹായിച്ചു.

നഫീസയുടെ ദുരിതാവസ്ഥയില്‍ ഉറവ വറ്റാത്ത ഉദാരമതികളുടെ സഹായം നഫീസയും വീട്ടുകാരും അഭ്യര്‍ത്ഥിച്ചു. ഭര്‍ത്താവ് അബൂബക്കറിന്റെ പേരില്‍ ഗ്രാമീണ്‍ ബാങ്ക് ബദിയഡുക്ക ശാഖയില്‍ അക്കൗണ്ട് തുടങ്ങിയിട്ടുണ്ട്. അക്കൗണ്ട് നമ്പര്‍ 90019782384. കൂടുതല്‍ വിവരങ്ങള്‍ക്ക് 9745386590 (അബ്ദുര്‍ റഹ്മാന്‍) എന്ന നമ്പറില്‍ ബന്ധപ്പെടണം.