ഇരിപ്പിടമുണ്ട്, മേൽക്കൂരയില്ല; ഹൊസങ്കടിയിൽ ബസ് കാത്ത് യാത്രക്കാർ പൊരിവെയിലത്ത്

കാസർകോട്: (KasargodVartha) മഞ്ചേശ്വരം ഹൊസങ്കടിയിലെ പടിഞ്ഞാറ് ഭാഗത്തുള്ള ബസ് യാത്രക്കാർക്ക് ബസ് കാത്തിരിപ്പ് കേന്ദ്രം ഇല്ലാത്തത് വലിയ ബുദ്ധിമുട്ടായി മാറുന്നു. പുതിയ ദേശീയപാതയുടെ നിർമാണം പൂർത്തിയാക്കിയപ്പോൾ നിർമാണ കമ്പനി അധികൃതർ ഇവിടെ യാത്രക്കാർക്കായി ഒരു ബസ് കാത്തിരിപ്പു കേന്ദ്രം നിർമിക്കാൻ തയ്യാറായില്ല.

തലപ്പാടി - മംഗളൂരു ഭാഗത്തേക്ക് പോകുന്ന യാത്രക്കാർക്കാണ് ബസ് കാത്തിരിപ്പ് ഷെൽട്ടർ ഇല്ലാത്തത് ദുരിതമാകുന്നത്. യാത്രക്കാരുടെ തിരക്ക് കണക്കിലെടുത്ത് നീളത്തിൽ ഒരു ഇരിപ്പിടം മാത്രം ഒരുക്കിയിട്ടുണ്ടെങ്കിലും, അതിന് മുകളിൽ മേൽക്കൂര നിർമിക്കാത്തതാണ് യാത്രക്കാരെ വലയ്ക്കുന്നത്.

ദുരിതത്തിലായി യാത്രക്കാർ

മഞ്ചേശ്വരത്തെ വളരെ തിരക്കേറിയ ടൗണുകളിലൊന്നാണ് ഹൊസങ്കടി. ഇവിടെ പടിഞ്ഞാറ് ഭാഗത്താണ് ഒട്ടുമിക്ക സർക്കാർ ഓഫീസുകളും സ്ഥിതിചെയ്യുന്നത്. അതിനാൽ തന്നെ വിദ്യാർഥികൾ അടക്കമുള്ള നാട്ടുകാരും, സർക്കാർ ജീവനക്കാരുമൊക്കെ ബസ് കാത്തു നിൽക്കുന്ന പ്രധാന കേന്ദ്രമാണിത്.

കൈക്കുഞ്ഞുമായി എത്തുന്ന സ്ത്രീകളും, പ്രായമായവരും ഇവിടെ വെയിലത്ത് തന്നെ നിൽക്കേണ്ട അവസ്ഥയാണ്. ഇതിൽ വിദഗ്ധ ചികിത്സയ്ക്കായി മംഗളൂരിലെ ആശുപത്രികളിലേക്ക് പോകുന്ന രോഗികളുമുണ്ട്. 

വെയിലത്ത് കാത്തുനിൽക്കുന്നതുമൂലം പലർക്കും ദേഹാസ്വാസ്ഥ്യം അനുഭവപ്പെടാറുമുണ്ട്. കാലവർഷം മാറി തുലാവർഷത്തിലേക്ക് പ്രവേശിക്കുന്ന സമയത്ത് ചൂടിൻ്റെ കാഠിന്യം വർധിച്ചതോടെ ബസ് കാത്തിരിപ്പ് കേന്ദ്രത്തിൻ്റെ അഭാവം വലിയ ബുദ്ധിമുട്ടാണ് സൃഷ്ടിക്കുന്നത്.

നാട്ടുകാരുടെ ആവശ്യം

അതേസമയം, ഇതിന് നേരെ എതിർവശത്ത് കാസർകോട് - ഉപ്പള - കുമ്പള ഭാഗങ്ങളിലേക്ക് പോകുന്ന ബസ് യാത്രക്കാർക്ക് ദേശീയപാത നിർമാണ കമ്പനി സുരക്ഷിതമായ ബസ് ഷെൽട്ടർ നിർമിച്ചു നൽകിയിട്ടുമുണ്ട്. ഈ വിവേചനം അവസാനിപ്പിച്ച്, മംഗളൂരു ഭാഗത്തേക്ക് പോകുന്ന യാത്രക്കാർക്കും വിശാലവും സൗകര്യപ്രദവുമായ പുതിയ ബസ് ഷെൽട്ടർ ഹൊസങ്കടിയിൽ അടിയന്തരമായി നിർമിക്കണമെന്നാണ് നാട്ടുകാരുടെ ശക്തമായ ആവശ്യം.

ഈ പ്രാദേശിക വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: Passengers heading to Thalappadi and Mangaluru from Hosangadi in Manjeshwar are facing severe difficulties due to the lack of a roofed bus shelter. Although a seating area is provided, the absence of a roof forces students, patients, and other commuters to stand under the scorching sun.

#KasargodVartha #Hosangadi #Manjeshwar #NationalHighway #KasaragodNews #BusShelterIssue #PublicGrievance #MalayalamNews #AparnaNews