അനധികൃതമായി പ്രവര്‍ത്തിക്കുന്ന സ്ഥാപനത്തില്‍ ആരോഗ്യ വകുപ്പ് റെയ്ഡ് നടത്തി; കയറ്റുമതിക്കായി ബാരലുകളില്‍ സൂക്ഷിച്ച പോത്തിന്റെ അവശിഷ്ടങ്ങള്‍ കണ്ടെടുത്തു

മൊഗ്രാല്‍ പുത്തൂര്‍: (www.kasargodvartha.com 22/01/2017) എരിയാല്‍ പാലത്തിനടുത്ത് അനധികൃതമായി പ്രവര്‍ത്തിക്കുന്ന സ്ഥാപനത്തില്‍ ആരോഗ്യ വകുപ്പ് റെയ്ഡ് നടത്തി. കയറ്റുമതിക്കായി ബാരലുകളില്‍ സൂക്ഷിച്ചു വെച്ചിരുന്ന പോത്തിന്റെ അവശിഷ്ടങ്ങള്‍ കണ്ടെടുത്തു. മൊഗ്രാല്‍പുത്തൂര്‍ പ്രാഥമികാരോഗ്യ കേന്ദ്രത്തിലെ ഹെല്‍ത്ത് ഇന്‍സ്‌പെക്ടര്‍ ബി. അഷ്‌റഫ്, ജൂനിയര്‍ എച്ച് ഐമാരായ കെ. ജയറാം, എ.പി സുന്ദരന്‍ എന്നിവരുടെ നേതൃത്വത്തിലാണ് റെയ്ഡ് നടത്തിയത്.

ബാരലുകളില്‍ ഉപ്പിട്ട് സൂക്ഷിച്ചുവെച്ച നിലയിലാണ് പോത്തിന്റെ കുടലുകളും മറ്റ് അവശിഷ്ടങ്ങളും കണ്ടെത്തിയത്. കഴുകി ഉപ്പിട്ട് വെച്ച് സൂക്ഷിക്കുന്ന അവശിഷ്ടങ്ങള്‍ കണ്ണൂരിലെത്തിച്ച ശേഷം ഇവിടെ നിന്നും ചെന്നൈയിലേക്ക് കയറ്റി അയക്കുകയാണ് ചെയ്യുന്നതെന്ന് അധികൃതര്‍ പറഞ്ഞു. ഇത്തരം അവശിഷ്ടങ്ങളാണ് ഷവര്‍മ്മ, പഫ്‌സ് എന്നിവയും സോപ്പ്, ഫെയ്‌സ് ക്രീം തുടങ്ങിയ ഉത്പ്പന്നങ്ങള്‍ ഉണ്ടാക്കാനും നിര്‍മ്മിക്കുന്നതെന്നും അധികൃതര്‍ സൂചിപ്പിച്ചു.

പോത്തിന്റെ അവശിഷ്ടങ്ങള്‍ കണ്ടെത്തിയ സ്ഥാപനത്തിന് പേരോ ലൈസന്‍സോ ഇല്ലെന്നും അധികൃതര്‍ വ്യക്തമാക്കി. ഇവിടെ ജോലി ചെയ്യുന്നതെല്ലാം തന്നെ അന്യ സംസ്ഥാന തൊഴിലാളികളാണെന്നും അധികൃതര്‍ പറഞ്ഞു. തികച്ചും വൃത്തിഹീനമായി ലൈസന്‍സൊന്നുമില്ലാതെ പ്രവര്‍ത്തിക്കുന്ന ഈ സ്ഥാപനം അടച്ചുപൂട്ടാന്‍ നോട്ടീസ് നല്‍കിയതായും അധികൃതര്‍ അറിയിച്ചു.