സര്‍ക്കാര്‍ അറിയിപ്പുകള്‍ 19.10.12
Oct 20, 2012, 17:41 IST
ജില്ലയിലെ എല്ലാ തദ്ദേശസ്ഥാപനങ്ങളും നവംബര്‍ മാസത്തില്‍ ഓരോ പ്രോജക്ട് എങ്കിലും നിര്‍വഹണഘട്ടത്തില്‍ എത്തിക്കണമെന്ന് ജില്ലാ ആസൂത്രണ സമിതി യോഗം നിര്‍ദേശിച്ചു. പ്രോജക്ട് എന്‍ട്രി ഇപ്പോള്‍ നടന്നുവരികയാണ്. തദ്ദേശസ്ഥാപനങ്ങളുടെ വാര്‍ഷിക പദ്ധതി രൂപീകരണ പ്രവര്‍ത്തനങ്ങള്‍ യോഗം വിലയിരുത്തി. പദ്ധതി ഫണ്ട് വിനിയോഗവും യോഗം ചര്‍ച ചെയ്തു. ചെറുവത്തൂര്‍, വലിയ പറമ്പ്, കള്ളാര്‍, ഈസ്റ്റ് എളേരി, കുറ്റിക്കോല്‍ ഗ്രാമപഞ്ചായത്തുകളും കാഞ്ഞങ്ങാട്, നീലേശ്വരം, കാറഡുക്ക ബ്ലോക്ക് പഞ്ചായത്തുകളും പദ്ധതി വിഹിതം ചെലവഴിച്ചിട്ടില്ലെന്ന് ആസൂത്രണ സമിതി യോഗം വിലയിരുത്തി.
ബളാല്‍ ഗ്രാമപഞ്ചായത്തിന്റെ 680.39 ലക്ഷം രൂപയുടെയും ബദിയടുക്ക ഗ്രാമപഞ്ചായത്തിന്റെ 1553.3 ലക്ഷം രൂപയുടെയും നീര്‍ത്തട പ്രോജക്ടുകള്‍ക്ക് ആസൂത്രണ സമിതി യോഗം ആംഗീകാരം നല്‍കി. ബളാല്‍ പഞ്ചായത്തിലെ വെള്ളരിക്കുണ്ട്, അത്തിക്കടവ്, ബദിയടുക്ക പഞ്ചായത്തിലെ ചെടേക്കല്‍, കടാര്‍, കാരിക്കാര്‍, പെര്‍ഡാല, കുക്കുംകൂടല്‍ നിടുഗള, കുഞ്ചാര്‍ വോന്തിച്ചാല്‍, പള്ളത്തടുക്ക, ബര്‍ല നീര്‍ത്തട പദ്ധതികള്‍ക്കും ഇതോടെ അംഗീകാരമായി.
നീര്‍ത്തടങ്ങള്‍ കുളങ്ങള്‍ കിണറുകള്‍ എന്നിവ സംരക്ഷിക്കുന്നതിനും ഉപയോഗയോഗ്യമാക്കുന്നതിനും തദ്ദേശസ്ഥാപനങ്ങള്‍ നടപടിയെടുക്കണമെന്ന് യോഗം നിര്‍ദ്ദേശിച്ചു.
യോഗത്തില്‍ അഡ്വ. പി.പി. ശ്യാമളാദേവി അദ്ധ്യക്ഷത വഹിച്ചു. ജില്ലാ കളക്ടര്‍ പി.എസ്. മുഹമ്മദ് സഗീര്‍, ജില്ലാ ആസൂത്രണ സമിതി അംഗങ്ങളായ കെ.ബി. മുഹമ്മദ് കുഞ്ഞി, നസീറ അഹ്മദ്, ഓമന രാമചന്ദ്രന്‍, ഫരീദാസക്കീര്‍ അഹ്മദ്, എ. ജാസ്മിന്‍, കെ. സുജാത, എം. തിമ്മയ്യ, പാദൂര്‍ കുഞ്ഞാമു, പി. ജനാര്‍ദനന്‍, പി.കുഞ്ഞിരാമന്‍, ജില്ലാ പ്ലാനിംഗ് ഓഫീസര്‍ കെ. ജയ, ജില്ലാതല ഉദ്യോഗസ്ഥര്‍, ഗ്രാമ-ബ്ലോക്ക് പഞ്ചായത്ത് പ്രസിഡണ്ടുമാര്‍, മുനിസിപ്പല്‍ പ്രതിനിധികള്‍ എന്നിവര്‍ പങ്കെടുത്തു.
വിദ്യാര്‍ത്ഥികള്‍ക്ക് പ്രബന്ധ മത്സരം
നവംബര്‍ 16ന് ദേശീയ മാധ്യമദിനം ആചരിക്കുന്നതിന്റെ ഭാഗമായി കേരള പ്രസ് അക്കാദമി കോളേജ്, പ്ലസ്ടുതല വിദ്യാര്‍ത്ഥികള്‍ക്ക് വേണ്ടി പ്രബന്ധ മത്സരം നടത്തുന്നു. പത്രസ്വാതന്ത്ര്യം ഇന്ത്യയില്‍ എന്നതാണ് വിഷയം. അഞ്ചു ഫുള്‍സ്‌കാപ്പ് പേജില്‍ കവിയാത്ത പ്രബന്ധങ്ങള്‍ ഒക്‌ടോബര്‍ 31ന് മുമ്പ് സെക്രട്ടറി, കേരള പ്രസ് അക്കാദമി, കാക്കനാട്, കൊച്ചി - 682 030 എന്ന വിലാസത്തില്‍ ലഭിക്കണം. വിദ്യാലയ മേധാവിയുടെ ഒപ്പോടെ വേണം ലേഖനം അയക്കാന്‍. കവറിനുപുറത്ത് ലേഖന മത്സരം എന്ന് എഴുതിയിരിക്കണം. കൂടുതല്‍ വിവരങ്ങള്‍ക്ക് ഫോണ്‍ നമ്പര്‍: 04842422275, 2422068.
കാവ് സംരക്ഷണത്തിന് ധനസഹായം
കാവ് സംരക്ഷണത്തിന് ധനസഹായം ആവശ്യമുള്ള വ്യക്തികളോ സംഘടനകളോ തങ്ങളുടെ അവകാശം തെളിയിക്കുന്ന സര്‍ട്ടിഫിക്കറ്റ് സഹിതം വനം വകുപ്പിന്റെ അപേക്ഷാ ഫോറത്തില്‍ അപേക്ഷ സമര്‍പിക്കണം. ജീര്‍ണാവസ്ഥയിലുള്ള കാവുകള്‍ക്കും ധനസഹായം ലഭ്യമാണ്. അപേക്ഷ കാസര്‍കോട് സാമൂഹ്യ വനവല്‍കരണ വിഭാഗം ഡിവിഷന്‍ ആഫീസില്‍ ലഭ്യമാണ്. കൂടുതല്‍ വിവരങ്ങള്‍ക്ക് ഫോണ്‍: 04994256910.
ജില്ലാ വികസന സമിതി യോഗം
ജില്ലാ വികസന സമിതി യോഗം ഒക്‌ടോബര്‍ 31ന് ഉച്ചയ്ക്ക് മൂന്ന് മണിക്ക് കളക്ടറേറ്റ് മിനി കോണ്‍ഫറന്‍സ് ഹാളല്‍ ചേരും.
അംഗന്‍വാടി വര്‍ക്കര്‍ ഹെല്‍പ്പര്‍ ഒഴിവ്
സാമൂഹ്യക്ഷേമ വകുപ്പിന്റെ കീഴില്‍ പ്രവര്‍ത്തിക്കുന്ന ഐ.സി.ഡി.എസ് നീലേശ്വരം അഡീഷണല്‍ പ്രോജക്ടിന്റെ പരിധിയില്‍ വരുന്ന പിലിക്കോട്, പടന്ന, തൃക്കരിപ്പൂര്‍, വലിയപറമ്പ് ഗ്രാമപഞ്ചായത്തുകളിലെ അംഗന്‍വാടികളില്‍ ഭാവിയില്‍ വരാന്‍ സാദ്ധ്യതയുള്ള അംഗന്‍വാടി വര്‍ക്കര്‍മാരുടെയും ഹെല്‍പര്‍മാരുടെയും ഒഴിവിലേക്ക് അപേക്ഷ ക്ഷണിച്ചു.
അതാത് പഞ്ചായത്തുകളിലെ സ്ഥിരതാമസക്കാരായ വനിതകള്‍ക്ക് അപേക്ഷിക്കാം. 2012 ജനുവരി ഒന്നിന് 18 വയസ്സ് പൂര്‍ത്തിയായവരും 46 വയസ്സ് കവിയാത്തവരും ആയിരിക്കണം അപേക്ഷകര്‍. വര്‍ക്കര്‍ തസ്തികയിലേക്ക് അപേക്ഷിക്കുന്നവര്‍ എസ്.എസ്.എല്‍.സി പാസായിരിക്കേണ്ടതും, ഹെല്‍പര്‍ തസ്തികയിലേക്ക് അപേക്ഷിക്കുന്നവര്‍ എസ്.എസ്.എല്‍.സി പാസാകാത്തവരും എഴുത്തും വായനയും അറിയുന്നവരും ആയിരിക്കണം.
അപേക്ഷയുടെ മാതൃക കാലിക്കടവിലുള്ള ശിശുവികസന പദ്ധതി ഓഫീസില്‍ നിന്നും അതാത് പഞ്ചായത്ത് ഓഫീസുകളില്‍ നിന്നും, നീലേശ്വരം ബ്ലോക്ക് പഞ്ചായത്തില്‍ നിന്നും ലഭിക്കും. ഹൈക്കോടതിയുടെ നിര്‍ദേശത്തെ തുടര്‍ന്ന് നിയമന നടപടികള്‍ മരവിപ്പിച്ചതിനാല്‍ പരിഗണിക്കപ്പെടാതിരുന്ന 2009ലെ അപേക്ഷകര്‍ വീണ്ടും അപക്ഷിക്കേണ്ടതാണ്. നവംബര്‍ 15ന് വൈകുന്നേരം നാലുമണി വരെ അപേക്ഷ കാലിക്കടവില്‍ പ്രവര്‍ത്തിക്കുന്ന ഐ.സി.ഡി.എസ് ഓഫീസില്‍ സ്വീകരിക്കുന്നതാണ്.
പെന്‍ഷന്‍ രേഖകള്‍ ഹാജരാക്കണം
മൊഗ്രാല്‍ പുത്തൂര്‍ ഗ്രാമപഞ്ചായത്തില്‍ നിന്ന് ദേശീയ വാര്‍ധക്യകാല പെന്‍ഷന്‍ കൈപ്പറ്റുന്ന ഗുണഭോക്താക്കളില്‍ 80 വയസ്സ് കഴിഞ്ഞവരും വികലാംഗ പെന്‍ഷന്‍ കൈപ്പറ്റുന്ന ഗുണഭോക്താക്കളില്‍ 80 ശതമാനം വികലാംഗത്വം ഉള്ളവരും അസ്സല്‍ രേഖകളും പകര്‍പും ഒക്‌ടോബര്‍ 31നകം ഗ്രാമ പഞ്ചായത്തില്‍ സമര്‍പിക്കണം.
എക്‌സൈസ് വാഹന ലേലം മാറ്റി
കാസര്‍കോട് എക്‌സൈസ് ഡിവിഷനിലെ വിവിധ അബ്കാരി കേസുകളില്‍ ഉള്‍പെട്ട് സര്‍ക്കാരിലേക്ക് കണ്ടുകെട്ടിയ വാഹനങ്ങളുടെ ലേലം ബക്രീദ് അവധി ആയതിനാല്‍ ഒക്‌ടോബര്‍ 27ല്‍ നിന്ന് 30 ലേക്ക് മാറ്റി.
പട്ടികവര്‍ഗ യുവതികള്‍ക്ക് ഓട്ടോറിക്ഷയ്ക്ക് ധനസഹായം
തൊഴില്‍ രഹിതരായ പട്ടികവര്‍ഗ യുവതികള്‍ക്ക് സൗജന്യമായി ഓട്ടോറിക്ഷ നല്‍കുന്ന പദ്ധതി പ്രകാരം തല്‍പ്പരരായ പട്ടികവര്‍ഗ യുവതികളില്‍ നിന്നും അപേക്ഷ ക്ഷണിച്ചു. അപേക്ഷകര്‍ 18നും 40നും ഇടയില്‍ പ്രായമുള്ള പട്ടികവര്‍ഗത്തില്‍പെട്ട വനിതകളായിരിക്കണം. ഈ പദ്ധതിയുടെ ഗുണഭോക്താക്കളായി തെരഞ്ഞെടുക്കപ്പെടുന്ന യുവതികള്‍ക് ജില്ലയിലെ എംപാനല്‍ ചെയ്ത ഡ്രൈവിംഗ് സ്‌കൂളുകളില്‍ നിന്നും പരിശീലനം നേടുന്നതിനുള്ള സൗകര്യം നല്‍കുന്നതാണ്. ഡ്രൈവിംഗ് പരിശീലനം 2012 ഡിസംബര്‍ 15നും ഫെബ്രുവരി 15നും ഇടയില്‍ പൂര്‍ത്തിയാക്കേണ്ടതാണ്.
നിശ്ചിത മാതൃകയിലുള്ള അപേക്ഷ വിദ്യാനഗര്‍ സിവില്‍ സ്റ്റേഷനില്‍ പ്രവര്‍ത്തിക്കുന്ന ട്രൈബല്‍ ഡെവലപ്‌മെന്റ് ഓഫീസ്, മാലക്കല്ല്, പെര്‍ള, വിദ്യാനഗര്‍ എന്നിവിടങ്ങളില്‍ പ്രവര്‍ത്തിക്കുന്ന ട്രൈബല്‍ എക്‌സറ്റന്‍ഷന്‍ ഓഫീസുകളില്‍ പ്രവത്തി സമയങ്ങളില്‍ ലഭിക്കും. അപേക്ഷയോടൊപ്പം ജാതി, വരുമാനം, വയസ്സ്, വിദ്യാഭ്യാസ യോഗ്യത, ഡ്രൈവിംഗ് ലൈസന്‍സ്, ബാഡ്ജ് (ഉണ്ടെങ്കില്‍) എന്നിവയുടെ സാക്ഷ്യപ്പെടുത്തിയ പകര്‍പ് കൂടി ഹാജരാക്കണം. അപേക്ഷകള്‍ നവംബര്‍ 15നകം കാസര്‍കോട് ട്രൈബല്‍ ഡെവലപ്‌മെന്റ് ഓഫീസില്‍ ഹാജരാക്കേണ്ടതാണ്. കൂടുതല്‍ വിവരങ്ങള്‍ 04994-255466.
ജില്ലാതല സമാധാന സമിതി യോഗം
ജില്ലാതല സമാധാന സമിതി യോഗം നവംബര്‍ രണ്ടിന് രാവിലെ 11 മണിക്ക് ജില്ലാ കളക്ടറുടെ അദ്ധ്യക്ഷതയില്‍ കളക്ടറേറ്റ് മിനി കോണ്‍ഫറന്‍സ് ഹാളില്‍ ചേരും.
വിമുക്ത ഭടന്മാരുടെ കുട്ടികള്‍ക്ക് സ്‌കോളര്‍ഷിപ്പ്
പ്രൊഫഷണല്‍ കോഴ്‌സുകള്‍ക്ക് 2012-13 അദ്ധ്യയനവര്‍ഷം പ്രവേശനം കിട്ടിയ വിമുക്ത ഭടന്മാരുടെ കുട്ടികള്‍ക്കും യുദ്ധ സമാന സാഹചര്യങ്ങളില്‍ മരിച്ച ജവാന്മാരുടെ വിധവകള്‍ക്കും പ്രധാനമന്ത്രിയുടെ സ്‌കോളര്‍ഷിപ്പിന് അപേക്ഷിക്കാം. അപേക്ഷയും അനുബന്ധ രേഖകളും ബന്ധപ്പെട്ട ജില്ലാ സൈനികക്ഷേമ ആഫീസുകളില്‍ നവംബര്‍ 15ന് മുന്‍പായി സമര്‍പിക്കേണ്ടതാണ്. വിശദ വിവരങ്ങള്‍ക്ക് ജില്ലാ സൈനിക ക്ഷേമ ആഫീസുമായി ബന്ധപ്പെടണം. www.desw.gov.in എന്ന വെബ്‌സൈറ്റില്‍ കൂടുതല്‍ വിവരങ്ങള്‍ ലഭ്യമാണ്.
അയോഡിന്‍ അപര്യാപ്തത വിവിധ രോഗങ്ങള്‍ക്ക് കാരണമാകുന്നതായി ശില്പശാല
സംസ്ഥാന അയോഡിന്‍ അപര്യാപ്ത രോഗ നിയന്ത്രണ സെല്ലിന്റെ നേതൃത്വത്തില്‍ ജില്ലയിലെ ആരോഗ്യ പ്രവര്‍ത്തകര്‍, ഹൈസ്‌കൂള്‍ അധ്യാപകര്‍, സിഡിപിഒ, ഐസിഡിഎസ് സൂപ്പര്‍വൈസര്‍മാര്‍ എന്നിവര്‍ക്ക് പരിശീലന പരിപാടി സംഘടിപ്പിച്ചു. കുട്ടികളില്‍ താഴ്ന്ന ബുദ്ധി നിലവാരം, ശൈശവാവസ്ഥയിലുള്ള പഠനശേഷിക്കുറവ്, മാനസിക വളര്‍ചാക്കുറവ്, വളര്‍ച മുരടിക്കല്‍, സംസാരത്തിനും കേള്‍വിക്കും ഉണ്ടാകുന്ന വൈകല്യങ്ങള്‍, ഗര്‍ഭിണികളില്‍ ഗര്‍ഭം അലസല്‍, ചാപിള്ള ജനനം, ഗര്‍ഭസ്ഥ ശിശുവിന്റെ വളര്‍ചാതടസം, പ്രായപൂര്‍ത്തിയായവരില്‍ ഉന്മേഷമില്ലായ്മ, പെട്ടെന്നുള്ള ക്ഷീണം, ഉല്പാദനശേഷിക്കുറവ് എന്നിവയാണ് അയോഡിന്റെ കുറവ് മൂലമുണ്ടാകുന്ന തകരാറുകള്‍.
ദിവസേനയുള്ള ആഹാരത്തില്‍ 150 മുതല്‍ 200 വരെ മൈക്രോഗ്രാം അടങ്ങിയിരിക്കണമെന്ന് പഠനങ്ങള്‍ വ്യക്തമാക്കുന്നതായി പരിശീലനപരിപാടിയില്‍ ചൂണ്ടിക്കാട്ടി. കാസര്‍കോട് ഗവ.ഗസ്റ്റ് ഹൗസില്‍ നടന്ന ശില്പശാല ഡെപ്യൂട്ടി ജില്ലാ മെഡിക്കല്‍ ഓഫീസര്‍ ഡോ.എം.സി.വിമല്‍രാജ് ഉദ്ഘാടനം ചെയ്തു. ജില്ലാ ഇന്‍ഫര്‍മേഷന്‍ ഓഫീസര്‍ കെ. അബ്ദുര്‍ റഹ്മാന്‍ അദ്ധ്യക്ഷത വഹിച്ചു. ഐസിഡി സെല്ല് ടെക്‌നിക്കല്‍ ഓഫീസര്‍ ഡോ. അനിതാ മോഹന്‍, ഡോ. വി. സുരേശന്‍, ഡോ. എം. കുഞ്ഞിരാമന്‍ എന്നിവര്‍ ക്ലാസ്സെടുത്തു. ജില്ലാ മാസ് മീഡിയ ഓഫീസര്‍ എം. രാമചന്ദ്രന്‍ സ്വാഗതവും, ഡെപ്യൂട്ടി ജില്ലാ മാസ് മീഡിയ ഓഫീസര്‍ വിന്‍സെന്റ് ജോണ്‍ നന്ദിയും പറഞ്ഞു.
Tags
Share this story
