ഗണേശോത്സവ നിമജ്ജന ഘോഷയാത്ര ഭക്തി സാന്ദ്രമായി

കാസര്‍കോട്:(www.kasargodvartha.com 03.09.2014) മല്ലികാര്‍ജുന ക്ഷേത്രത്തിലെ ഗണേശോത്സവത്തിന് സമാപനം കുറിച്ച് ചൊവ്വാഴ്ച രാത്രി നഗരത്തില്‍ നടന്ന നിമജ്ജന ഘോഷയാത്ര ഭക്തി സാന്ദ്രമായി. വഴിനീളെ ആരതി അര്‍പ്പിച്ച് നീങ്ങിയ ഘാഷയാത്ര മണിക്കൂറുകള്‍ പിന്നിട്ടാണ് നഗരം വലംവെച്ച് റയില്‍വേ സ്റ്റേഷനടുത്ത ശ്രീ വരദരാജ വെങ്കിട്ട രമണ ക്ഷേത്രത്തില്‍ സമാപിച്ചത്.

ചൊവ്വാഴ്ച വൈകിട്ട് ആറുമണിയോടെയാണ് ഘോഷയാത്ര മല്ലികാര്‍ജുന ക്ഷേത്രാങ്കണത്തില്‍ നിന്നും പുറപ്പെട്ടത്. ബുധനാഴ്ച പുലര്‍ചെയാണ് ശ്രീ ലക്ഷ്മി സരോവരത്തില്‍ വിഗ്രഹം നിമജ്ജനം ചെയ്തത്. വര്‍ണ ശബളമായ ഘോഷയാത്രയില്‍ നിശ്ചല ദൃശ്യങ്ങളും വേഷങ്ങളും അണിനിരന്നു. കരിമരുന്ന് പ്രയോഗങ്ങളും ഉണ്ടായി.

സ്ത്രീകളും കുട്ടികളുമടക്കം നൂറുകണക്കിനാളുകളാണ് ഘോഷയാത്ര കാണാന്‍ റോഡിന് ഇരുവശവും തടിച്ചുകൂടിയത്. കനത്ത പോലീസ് കാവലിലായിരുന്നു ഘോഷയാത്ര.