വെള്ളിക്കോത്ത് രമേശ് ചെന്നിത്തല പ്രസംഗിക്കേണ്ട സ്റ്റേജിന് തീവെപ്പ്

കാഞ്ഞങ്ങാട്: വെള്ളിക്കോത്ത് കെ.പി.സി.സി. പ്രസിഡന്റ് രമേശ് ചെന്നിത്തല പ്രസംഗിക്കേണ്ട സ്റ്റേജ് തീവെച്ച് നശിപ്പിച്ചു. ബുധനാഴ്ച പുലര്‍ചെ അഞ്ചു മണിയോടെയാണ് സംഭവം. വെള്ളിക്കോത്തു നിന്ന് ബുധനാഴ്ച രാവിലെ ആരംഭിക്കുന്ന ഗാന്ധി സ്മൃതി യാത്രയുടെ ഉദ്ഘാടന ചടങ്ങിനായി ഒരുക്കിയതായിരുന്നു സ്‌റ്റേജ്. രമേശ് ചെന്നിത്തലയാണ് പരിപാടി ഉദ്ഘാടനം ചെയ്യേണ്ടത്. അജാനൂര്‍ മണ്ഡലം കോണ്‍ഗ്രസ് കമ്മിറ്റിയാണ് പരിപാടിക്കു വേണ്ട സ്റ്റേജൊരുക്കിയത്.

രാത്രി വൈകും വരെ ഇവിടെ പോലീസ് കാവലുണ്ടായിരുന്നു. പുലര്‍ചെ അഞ്ചു മണിയോടെയാണ് അവര്‍ പോയത്. അതിനു ശേഷമാണ് തീവെപ്പുണ്ടായത്. സ്റ്റേജിനു കെട്ടിയ കര്‍ട്ടനില്‍ തീ കൊളുത്തുകയും തീ പടര്‍ന്ന് സ്റ്റേജ് തകരുകയുമായിരുന്നു. സി.പി.എം-കോണ്‍ഗ്രസ് സംഘര്‍ഷം പതിവായ വെള്ളിക്കോത്ത് സി.പി.എം ആണോ സംഭവത്തിനു പിന്നിലെന്ന് പോലീസ് സംശയിക്കുന്നു. സംഭവത്തെകുറിച്ച് ഹൊസ്ദുര്‍ഗ് പോലീസ് സ്ഥലത്തെത്തി അന്വേഷണം ആരംഭിച്ചു.