കാസർകോട് പുതിയ ബസ് സ്റ്റാൻഡിലെ ബേക്കറിയിൽ തീപിടിത്തം; ഫയർഫോഴ്സ് ഇടപെടലിൽ ഒഴിവായത് വൻ ദുരന്തം; സാധനങ്ങളും കോഫി മേക്കറും കത്തിനശിച്ചു

കാസർകോട്: (KasargodVartha) കാസർകോട് പുതിയ ബസ് സ്റ്റാൻഡിൽ പ്രവർത്തിക്കുന്ന ബേക്കറിയിൽ തീപിടിത്തം. ഫയർഫോഴ്സിന്റെ സമയോചിതമായ ഇടപെടൽ കാരണം വൻ ദുരന്തം ഒഴിവായി. ഫെബ്രുവരി 24 ചൊവ്വാഴ്ച രാത്രി 12.20-ഓടെ ശ്രീലക്ഷ്മി ബേക്കറി ജ്യൂസ് ആൻഡ് കാന്റീൻ എന്ന കടയിലാണ് തീപിടിത്തമുണ്ടായത്.

പോലീസിന്റെ ഇടപെടൽ തുണയായി

കടയിൽ നിന്ന് തീയും പുകയും ഉയരുന്നത് ബസ് സ്റ്റാൻഡിൽ ഡ്യൂട്ടിയിലുണ്ടായിരുന്ന പോലീസുകാരുടെ ശ്രദ്ധയിൽപ്പെട്ടതാണ് വൻ അപകടം ഒഴിവാക്കാൻ കാരണമായത്. ഇവർ ഉടൻ തന്നെ തൊട്ടടുത്ത അഗ്നിരക്ഷാ നിലയത്തിൽ വിവരമറിയിക്കുകയായിരുന്നു. കാസർകോട് നിന്നുള്ള സീനിയർ ഫയർ ആൻഡ് റെസ്ക്യൂ ഓഫീസർ വി.എൻ. വേണുഗോപാലിന്റെ നേതൃത്വത്തിൽ രണ്ട് യൂണിറ്റ് അഗ്നിരക്ഷാ വാഹനങ്ങൾ അതിവേഗം സ്ഥലത്തെത്തി.

പൂട്ട് പൊളിച്ച് ഫയർഫോഴ്സ്

കടമുറി പൂട്ടിയ നിലയിലായിരുന്നതിനാൽ രക്ഷാപ്രവർത്തനത്തിന് തുടക്കത്തിൽ ചെറിയ തടസ്സമുണ്ടായി. എന്നാൽ സേനാംഗങ്ങൾ ഷിയേഴ്സ് ഉപയോഗിച്ച് പൂട്ട് മുറിച്ചുനീക്കി ഷട്ടർ തുറന്നാണ് അഗ്നിശമന പ്രവർത്തനം നടത്തിയത്. ബോവിക്കാനം സ്വദേശിയായ കെ. സതീഷ് കുമാറിന്റെ ഉടമസ്ഥതയിലുള്ള കടയിലാണ് തീപിടിത്തമുണ്ടായത്. രാത്രി 10 മണിയോടെ കട അടച്ച് നായിക്കാപ്പിലുള്ള ഭാര്യവീട്ടിലേക്ക് പോയ സമയത്തായിരുന്നു സംഭവം.

75,000 രൂപയുടെ നാശനഷ്ടം

തീപിടിത്തത്തിൽ ഇൻസ്റ്റന്റ് കോഫി മേക്കർ, സോഫ്റ്റ് ഡ്രിങ്ക്സ്, ബേക്കറി സാധനങ്ങൾ ഉൾപ്പെടെയുള്ളവ ഭാഗികമായി കത്തിനശിച്ചു. കടമുറിയുടെ മുകളിലേക്ക് കയറുന്ന മര ഏണിപ്പടികളിലും സാധനങ്ങൾ കുത്തിനിറച്ചിരുന്നതിനാൽ രക്ഷാപ്രവർത്തകർക്ക് മുകളിലേക്ക് കയറുന്നതിൽ ബുദ്ധിമുട്ട് നേരിട്ടു. മര ഏണിയുടെ ചില ഭാഗങ്ങളും കത്തിനശിച്ചിട്ടുണ്ട്. തീപിടിത്തത്തിൽ 75,000 രൂപയുടെ നഷ്ടം സംഭവിച്ചതായി കടയുടമ അറിയിച്ചു. തീ പടർന്നിരുന്നെങ്കിൽ സമീപത്തെ മറ്റ് കടകളിലേക്കും വ്യാപിച്ച് വലിയ ദുരന്തമുണ്ടാകുമായിരുന്നുവെന്ന് അധികൃതർ വ്യക്തമാക്കി.

മുന്നറിയിപ്പ് നൽകിയിരുന്നെന്ന് ഫയർഫോഴ്സ്

കഴിഞ്ഞ വർഷം ഈ കടയിൽ അഗ്നിരക്ഷാസേന പരിശോധന നടത്തുകയും പ്രാഥമിക അഗ്നിശമന ഉപകരണം സ്ഥാപിക്കണമെന്ന് നിർദേശിക്കുകയും ചെയ്തിരുന്നതായി ഉദ്യോഗസ്ഥർ അറിയിച്ചു.

എം. രമേശ്, വി.കെ. ഷൈജു, എച്ച്. ഉമേഷൻ, പി. രാജേഷ്, കെ.വി. ജിതിൻ കൃഷ്ണൻ, എം.എ. വൈശാഖ്, അതുൽ രവി, വൈശാഖ് പാർത്ഥസാരഥി, അശ്വിൻ എസ്.എം., വി. രാജു, പി.വി. രഞ്ജിത്ത്, പി.വി. പ്രസാദ് എന്നീ ഫയർഫോഴ്സ് അംഗങ്ങളും രക്ഷാപ്രവർത്തനത്തിൽ പങ്കെടുത്തു.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ, ഫേസ്ബുക്ക് പേജ് ഫോളോ ചെയ്യുക. ഈ വാർത്ത സുഹൃത്തുകൾക്കും വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: A major disaster was averted due to the timely intervention of the fire force after a bakery at Kasaragod New Bus Stand caught fire late Tuesday night.

#KasaragodNews #FireAccident #KeralaFireForce #KasaragodNewBusStand #KeralaNews #LocalNewsUpdate