പടക്കക്കടയ്ക്കു സമീപത്തെ ഇരുമ്പിന്റെ വൈദ്യുതി പോസ്റ്റ് ദ്രവിച്ച് വീഴാറായ നിലയില്‍; പരാതി നല്‍കിയിട്ടും നടപടിയെടുക്കാതെ അധികൃതര്‍

കാസര്‍കോട്: (www.kasargodvartha.com 11.11.2017) നഗരത്തില്‍ പടക്കക്കടയ്ക്കു സമീപത്തെ ഇരുമ്പിന്റെ വൈദ്യുതി പോസ്റ്റ് ദ്രവിച്ച് വീഴാറായ നിലയില്‍. പരാതി നല്‍കിയിട്ടും നടപടിയെടുക്കാതെ അധികൃതര്‍ അനാസ്ഥ കാണിക്കുകയാണെന്ന് വ്യാപാരികള്‍ പറയുന്നു. കാസര്‍കോട് നായക്‌സ് റോഡിലാണ് അപകടാവസ്ഥയില്‍ പോസ്റ്റ് സ്ഥിതിചെയ്യുന്നത്.



സമീപത്ത് പടക്കക്കട അടക്കം നിരവധി വ്യാപാര സ്ഥാപനങ്ങളാണ് പ്രവര്‍ത്തിക്കുന്നത്. ദിനംപ്രതി നൂറുകണക്കിന് വാഹനങ്ങള്‍ കടന്നുപോകുന്ന റോഡരികിലാണ് പോസ്റ്റുള്ളത്. ഒന്നു ചെറുതായി വാഹനങ്ങള്‍ തട്ടിയാല്‍ പോലും തകര്‍ന്നുവീഴാന്‍ പാകത്തിലാണ് പോസ്റ്റുള്ളത്. അടിഭാഗം പൂര്‍ണമായും ദ്രവിച്ച് തുരുമ്പെടുത്തിരിക്കുകയാണ്.

കഴിഞ്ഞ വ്യാഴാഴ്ച തന്നെ സമീപത്തെ വ്യാപാരികള്‍ വൈദ്യുതി വകുപ്പ് അധികൃതര്‍ക്ക് രേഖാമൂലം പരാതി നല്‍കിയെങ്കിലും ഇതുവരെ പോസ്റ്റ് മാറ്റി സ്ഥാപിക്കാന്‍ നടപടി സ്വീകരിച്ചിട്ടില്ല. ഇതിനെതിരെ വ്യാപാരികളില്‍ പ്രതിഷേധം ശക്തമായിട്ടുണ്ട്.