ബലിപെരുന്നാള്‍ ആഘോഷത്തിന് നാടൊരുങ്ങി

മൈലാഞ്ചി ചോപ്പണിഞ്ഞ്‌ ... പെരുന്നാള്‍ ആഘോഷത്തിന് മുന്നോടിയായിതളങ്കര പള്ളിക്കാലിലെ മുഹമ്മദിന്റെ വീട്ടില്‍ മൈലാഞ്ചി അണിയുന്ന കുട്ടികള്‍

കാസര്‍കോട്: ത്യാഗത്തിന്റെയും സഹനത്തിന്റെയും ഓര്‍മയില്‍ ബലിപെരുന്നാള്‍ വീണ്ടും സമാഗതമായി. പെരുന്നാളിനെ വരവേല്‍ക്കാന്‍ നാടും നഗരവും ഒരുങ്ങി നില്‍ക്കുന്നു. വെള്ളിയാഴ്ചയാണ് ബലിപെരുന്നാള്‍. ജില്ലയിലെ പ്രധാന നഗരങ്ങളായ കാസര്‍കോട്ടും കാഞ്ഞങ്ങാട്ടും അഭൂതപൂര്‍വമായ ജനത്തിരക്കാണ് അനുഭവപ്പെടുന്നത്.

പെരുന്നാളിന് അണിയാന്‍ വസ്ത്രവും ചെരുപ്പും മൈലാഞ്ചിയും വാങ്ങാന്‍ സ്ത്രീകളും കുട്ടികളും അടക്കമുള്ളവരുടെ നിറഞ്ഞ സാന്നിദ്ധ്യമാണ് കടകളിലും വഴിയോരങ്ങളിലും ദൃശ്യമാകുന്നത്. കഴിഞ്ഞ ദിവസങ്ങളില്‍ കടകള്‍ രാത്രി ഏറെ വൈകുംവരെ പ്രവര്‍ത്തിച്ചു. വവഴിവാണിഭവും പൊടിപൊടിച്ചു. ചാറ്റല്‍മഴയും ചുട്ടുപൊള്ളുന്ന വെയിലും കൂസാതെയാണ് തെരുവുകച്ചവടം നടക്കുന്നത്.

തകൃതിയായ ഒരുക്കം.... പെരുന്നാള്‍ തലേന്ന് കാസര്‍കോട് നഗരത്തില്‍ സജീവമായ തെരുവ് കച്ചവടം

തുണിത്തരങ്ങള്‍, ചെരുപ്പുകള്‍, ഫാന്‍സി സാധനങ്ങള്‍, തൊപ്പി, മൈലാഞ്ചി തുടങ്ങിയവ റോഡരികില്‍ നിരന്ന് കിടക്കുന്നു. കടകളിലും സാധനങ്ങള്‍ പ്രദര്‍ശിപ്പിച്ച് ആളുകളെ ആകര്‍ഷിക്കുകയാണ്. കുറഞ്ഞ വിലക്ക് സാധനങ്ങള്‍ ലഭ്യമാകുന്നു എന്നതിനാല്‍ വഴിവാണിഭക്കാര്‍ ആവശ്യക്കാര്‍ക്ക് ആശ്വാസമേകുന്നു. അഞ്ചു രൂപമുതല്‍ 15 രൂപ വരെ മൈലാഞ്ചിക്ക് റോഡരികില്‍ ഈടാക്കുന്നു. ചെരിപ്പിനും വസ്ത്രങ്ങള്‍ക്കും സുഗന്ധ ദ്രവ്യങ്ങള്‍ക്കും തെരുവ് കച്ചവടക്കാരില്‍ വിലക്കുറവ് ഉള്ളതായി ആളുകള്‍ പറയുന്നു.

ഈ വസ്തുത മനസ്സിലാക്കി മറ്റുവ്യാപാരികളും ഇളവ് പ്രഖ്യാപിച്ച് ആളുകളെ ആകര്‍ഷിക്കുകയാണ്. 50 ശതമാനം വരെ ഇളവ് പ്രദര്‍ശിപ്പിച്ചാണ് കടകളിലേക്ക് ആളുകളെ ആകര്‍ഷിക്കുന്നത്. പഴങ്ങളും യഥേഷ്ടം കടകളില്‍ വില്‍പനക്കെത്തിയിട്ടുണ്ട്. വാഹനത്തിരക്കുമൂലം നഗരം വീര്‍പുമുട്ടുന്ന സ്ഥിതിയാണ് രണ്ട് ദിവസമായി ദൃശ്യമാകുന്നത്. ഗതാഗത നിയന്ത്രണത്തിന് പോലീസ് രംഗത്തുണ്ട്. പലപ്പോഴും മിനുട്ടുകളോളം ഗതാഗതക്കുരുക്ക് അനുഭവപ്പെടുന്നു.


കോഴി-ഇറച്ചി കടകളില്‍ നല്ല തിരക്കാണ് കാണുന്നത്. പള്ളികളും മുസ്ലിം ഭവനങ്ങളും പ്രാര്‍ത്ഥനകളാല്‍ മുഖരിതമാണ്. പെരുന്നാള്‍ ദിവസം ജില്ലയിലെ പ്രധാനകേന്ദ്രങ്ങളില്‍ ഈദ് നിസ്‌ക്കാരം നടക്കും.