മാടക്കാല്‍ തൂക്കുപാലം പുനര്‍നിര്‍മിക്കണം: ഡി.വൈ.എഫ്.ഐ

കാസര്‍കോട്: മാടക്കാല്‍ തൂക്കുപാലം എത്രയുംപെെട്ടന്ന് പുനര്‍നിര്‍മിക്കാന്‍ സര്‍ക്കാര്‍ അടിയന്തിര നടപടി സ്വീകരിക്കണമെന്ന് ഡി.വൈ.എഫ്.ഐ ജില്ലാ സെക്രട്ടറിയേറ്റ് ആവശ്യപ്പെട്ടു. പാലം തകര്‍ന്ന ശേഷം കലക്ടര്‍ വിളിച്ചുചേര്‍ത്ത യോഗത്തില്‍ ആറുമാസത്തിനുള്ളില്‍ പുതിയ പാലം നിര്‍മിക്കുമെന്ന് കെല്‍ എഞ്ചിനീയര്‍മാര്‍ അടങ്ങുന്ന സംഘം ഉറപ്പ് നല്‍കിയിരുന്നു.

പുതിയ പാലം നിര്‍മിക്കുംവരെ താല്‍ക്കാലിക യാത്രാസൗകര്യം ഒരുക്കുമെന്ന ഉറപ്പും നല്‍കുകയുണ്ടായി. എന്നാല്‍ പ്രഖ്യാപനങ്ങള്‍ ജലരേഖയായി മാറി. തകര്‍ന്ന പാലത്തിന്റെ അവശിഷ്ടങ്ങള്‍ നീക്കം ചെയ്യാത്തത് മത്സ്യത്തൊഴിലാളികള്‍ക്ക് വലിയ ഭീഷണിയാണ് ഉയര്‍ത്തുന്നത്. ക്രമക്കേടുകളെ കുറിച്ചുള്ള വിജിലന്‍സ് അന്വേഷണത്തിന്റെ വിശദാംശങ്ങള്‍ ഇതുവരെ വെളിപ്പെടുത്തിയിട്ടില്ല.

പുതിയ പാലത്തിന് തുക അനുവദിക്കാന്‍ സര്‍ക്കാര്‍ തയ്യാറായില്ല എന്ന വാദമുന്നയിച്ച് കെല്‍ പാലത്തിന്റെ പുനര്‍നിര്‍മാണത്തില്‍ നിന്നും പിന്‍മാറിയിരിക്കുകയാണ്. കേരള സര്‍ക്കാറിന്റേയും കെല്ലിന്റേയും നിലപാട് ജനങ്ങളോടുള്ള വഞ്ചനയും അഴിമതിക്കാരെ സംരക്ഷിക്കുന്നതുമാണെന്ന് ഡി.വൈ.എഫ്.ഐ ആരോപിച്ചു.

ജനങ്ങളെ തെറ്റിദ്ധരിപ്പിക്കാന്‍ യു.ഡി.എഫ് നടത്തുന്ന കള്ളപ്രചാരണങ്ങള്‍ അഴിമതിക്കാരെ പ്രോത്സാഹിപ്പിക്കുന്നതാണ്. ജനങ്ങളെ വെല്ലുവിളിക്കുന്ന സര്‍ക്കാരിന്റേയും കെല്ലിന്റേയും നടപടിക്കെതിരെ ഡി.വൈ.എഫ്.ഐ ശക്തമായ പ്രക്ഷോഭം ഉയര്‍ത്തികൊണ്ടുവരുമെന്ന് ജില്ലാ സെക്രട്ടറിയേറ്റ് മുന്നറിയിപ്പ് നല്‍കി.