ദുരൂഹത നീങ്ങുന്നു: ദുബൈയിൽ കാസർകോട് സ്വദേശി ഷഫീഖ് മുങ്ങിമരിച്ചതായി പോസ്റ്റ്‌മോർട്ടം റിപ്പോർട്ട്; മൃതദേഹം നാട്ടിലെത്തിക്കും

ദുബൈ: (KasargodVartha) കാസർകോട് മഞ്ചേശ്വരം സ്വദേശി മുഹമ്മദ് ഷഫീഖിനെ (25) ദുബൈ പോർട്ട് റാഷിദിന് സമീപം കടലിൽ മരിച്ച നിലയിൽ കണ്ടെത്തിയ സംഭവത്തിൽ പുതിയ വിവരങ്ങൾ പുറത്ത്. പോസ്റ്റ്‌മോർട്ടം റിപ്പോർട്ട് പ്രകാരം ഷഫീഖ് മുങ്ങിമരിച്ചതായാണ് പ്രാഥമിക സൂചന. ശരീരത്തിൽ മറ്റ് പരിക്കുകളൊന്നും കണ്ടെത്താൻ സാധിച്ചിട്ടില്ലെന്നാണ് വിവരം.

സംഭവത്തിൽ ദുബൈ പോലീസ് വിശദമായ അന്വേഷണം നടത്തിവരുന്നു. റൂമിലെ സഹവാസികളുമായി തർക്കമുണ്ടായതിനെ തുടർന്ന് കാണാതായ ഷഫീഖിൻ്റെ മൃതദേഹം ഡിസംബർ 7-നാണ് കണ്ടെത്തിയത്.

സിസിടിവി ദൃശ്യങ്ങളും സുഹൃത്തുക്കളുടെ മൊഴിയും

ഷഫീഖിൻ്റെ മരണം സംബന്ധിച്ച ദുരൂഹത നീക്കാനുള്ള ശ്രമത്തിലാണ് ദുബൈ പോലീസ്. സംഭവസ്ഥലത്തേക്കുള്ളതും മറ്റ് സി.സി.ടി.വി. ദൃശ്യങ്ങളും പോലീസ് പരിശോധിച്ചു.

● സി.സി.ടി.വി. ദൃശ്യങ്ങൾ: ഷഫീക്ക് ഒറ്റയ്ക്ക് നടന്നുപോകുന്നതിൻ്റെ ദൃശ്യങ്ങൾ പോലീസിന് ലഭിച്ചിട്ടുണ്ട്.

● സുഹൃത്തുക്കളുടെ മൊഴി: റൂമിലെ തർക്കത്തിന് ശേഷം പുറത്തുപോയ ഷഫീഖ്, ഒരുപക്ഷേ നീന്താൻ ഇറങ്ങിയപ്പോൾ മുങ്ങിപ്പോയതാകാം എന്നാണ് സുഹൃത്തുക്കളുടെ പറയുന്നത്. ഈ സാധ്യതയും പോലീസ് പരിശോധിക്കുന്നു.

ബന്ധുക്കളുടെ പരാതിയെ തുടർന്ന് പോലീസ് കസ്റ്റഡിയിലെടുത്തവരെ ചോദ്യം ചെയ്തു വിട്ടയച്ചതായാണ് വിവരം.

മൃതദേഹം നാട്ടിലേക്ക് കൊണ്ടുവരുന്നു

പോലീസ് ഇൻക്വസ്റ്റ് നടപടിക്രമങ്ങളും ഫോറൻസിക് പരിശോധനകളും വിശദമായ പോസ്റ്റ്മോർട്ടവും പൂർത്തിയാക്കിയ സാഹചര്യത്തിൽ മൃതദേഹം നാട്ടിലേക്ക് കൊണ്ടുവരുന്നതിനുള്ള നടപടികൾ വേഗത്തിലാക്കി.

● യാത്ര: മൃതദേഹം രാത്രി (ഡിസംബർ 11) 11.30-ന് പുറപ്പെടുന്ന എയർ ഇന്ത്യ എക്‌സ്‌പ്രസ് വിമാനത്തിൽ നാട്ടിലേക്ക് അയക്കും.

● ലാൻഡിങ്: വെള്ളിയാഴ്ച പുലർച്ചെ മംഗളൂരിൽ വിമാനം എത്തിച്ചേരുമെന്ന് ദുബൈ കെ.എം.സി.സി. സംസ്ഥാന എമർജൻസി വിങ് ഭാരവാഹികൾ അറിയിച്ചു. 

● ഖബറടക്കം: മംഗ്ലൂൂരിൽ നിന്ന് മൃതദേഹം ആംബുലൻസിൽ പഞ്ചത്തെ വീട്ടിലെത്തിച്ച് ഇച്ചിലങ്കോട് മാലിക് ദീനാർ ജുമാമസ്ജിദ് ഖബർസ്ഥാനിൽ ഖബറടക്കും.

മഞ്ചേശ്വരം മംഗൽപാടി പഞ്ചം സ്വദേശികളായ ഹസൈനാർ, സഫിയ എന്നിവരുടെ ഏക മകനാണ് അവിവാഹിതനായ മുഹമ്മദ് ഷഫീഖ്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കൂ.

Article Summary: Post-mortem report suggests drowning for Kasaragod native Shafeeq in Dubai. Body being sent home.

 #DubaiDeath #KasargodNews #Drowning #Shafeeq #PostMortem #GulfNews