പെന്‍ഷനായെത്തിയ വയോധികന് പഞ്ചായത്തില്‍ നിന്നും ലഭിച്ച മറുപടി കേട്ട് ഞെട്ടി; മരിച്ചതിനാല്‍ പെന്‍ഷനില്ലെന്ന് അധികൃതര്‍

ബദിയടുക്ക: (www.kasargodvartha.com 21.08.2018) പെന്‍ഷനായെത്തിയ വയോധികന് പഞ്ചായത്തില്‍ നിന്നും ലഭിച്ച മറുപടി കേട്ട് ഞെട്ടി. മരിച്ചതിനാല്‍ പെന്‍ഷനില്ലെന്നാണ് അധികൃതര്‍ അറിയിച്ചത്. മൂക്കാംപാറയിലെ അബ്ദുര്‍ റഹ് മാനാണ് പെന്‍ഷന്‍ തുക കിട്ടാതെ പോയത്. നാലു മാസത്തിലൊരിക്കലാണ് പെന്‍ഷന്‍ തുക ലഭിക്കുന്നത്. പെന്‍ഷന്‍ തുകയായ 4,400 രൂപ വാങ്ങാനായി പഞ്ചായത്തിലെത്തിയപ്പോഴാണ് ഇത്തരമൊരു മറുപടി ലഭിച്ചത്.

പഞ്ചായത്തില്‍ പെന്‍ഷന്‍ വാങ്ങുന്നവരില്‍ ഒമ്പത് പേര്‍ മരിച്ചതിനാല്‍ പെന്‍ഷന്‍ തടഞ്ഞുവെച്ചിട്ടുണ്ടെന്നും 18ന് അന്വേഷണം നടത്തി മറുപടി അയക്കണമെന്നായിരുന്നു സാമ്പത്തിക വിഭാഗത്തിന്റെ ഇമെയില്‍ സന്ദേശം വന്നത്. ഒറ്റ ദിവസം കൊണ്ട് അന്വേഷണം നടത്തി മറുപടി നല്‍കാനായില്ല. മരിച്ച ഒമ്പത് പേരില്‍ അഞ്ച് പേരും പെന്‍ഷന്‍ വാങ്ങാന്‍ വന്നതോടെയാണ് സത്യാവസ്ഥ ബോധ്യമായത്. പെന്‍ഷന്‍ വാങ്ങിക്കുന്നവര്‍ മരിച്ചാല്‍ ആധാര്‍ കാര്‍ഡും മരണ വിവരവും നല്‍കി മരണം രജിസ്റ്റര്‍ ചെയ്യണം. ഇതൊന്നും ചെയ്യാതെ മരിച്ചുവെന്ന കാരണം പറഞ്ഞ് പെന്‍ഷന്‍ മുടങ്ങിയതെന്ന ചോദ്യമാണ് പെന്‍ഷന്‍കാരുടേത്.