കാടുമൂടി നശിക്കുന്ന കുമ്പളയിലെ ഏക്കർ കണക്കിന് റെയിൽവേ ഭൂമി; ഉപയോഗശൂന്യമായ സ്ഥലത്ത് ഉന്നത വിദ്യാഭ്യാസ കേന്ദ്രം സ്ഥാപിക്കണമെന്ന് ആവശ്യം

കാസർകോട്: (KasargodVartha) കുമ്പള റെയിൽവേ സ്റ്റേഷൻ പരിസരത്ത് കാടുമൂടിക്കിടക്കുന്ന ഏക്കർ കണക്കിന് റെയിൽവേ ഭൂമി ഉപയോഗപ്പെടുത്തി കേന്ദ്ര ഉന്നത വിദ്യാഭ്യാസ കേന്ദ്രം സ്ഥാപിക്കണമെന്ന ആവശ്യം ശക്തമാകുന്നു. റെയിൽവേ വികസനത്തിൽ അധികൃതർ പൂർണമായും മുഖം തിരിക്കുന്ന സാഹചര്യത്തിലാണ് ഈ നിർദേശം ഉയർന്നുവന്നിരിക്കുന്നത്. വർഷങ്ങളായി യാതൊരു വികസനവുമില്ലാതെ കിടക്കുന്ന ഈ പ്രദേശം നിലവിൽ ഇഴജന്തുക്കളുടെ താവളമായി മാറിയിരിക്കുകയാണ്. കാടുമൂടിയും വലിയ തേക്ക് മരങ്ങൾ വളർന്നുനിൽക്കുന്നതും സമീപപ്രദേശത്ത് താമസിക്കുന്ന വീട്ടുകാർക്ക് വലിയ അപകട ഭീഷണിയാണ് ഉയർത്തുന്നത്.

ഉന്നത വിദ്യാഭ്യാസ കേന്ദ്രം അനിവാര്യം

എസ്എസ്എൽസിയും പ്ലസ് ടുവും കഴിഞ്ഞാൽ കാസർകോട് ജില്ലയിലെ വിദ്യാർഥികൾ ഉപരിപഠനത്തിനായി ഏറെ ആശ്രയിക്കുന്നത് മംഗളൂരിലെ സ്വകാര്യ ഉന്നത വിദ്യാഭ്യാസ സ്ഥാപനങ്ങളെയാണ്. ജില്ലയിലെ വിദ്യാഭ്യാസ മേഖലയിലെ ഈ പിന്നാക്കാവസ്ഥയ്ക്ക് പരിഹാരം കാണാൻ കുമ്പളയിലെ റെയിൽവേ ഭൂമി പ്രയോജനപ്പെടുമെന്നാണ് ചൂണ്ടിക്കാണിക്കപ്പെടുന്നത്. കേന്ദ്ര സർക്കാരിന് കീഴിൽ ഡിഗ്രി പഠനവും ബിരുദാനന്തര കോഴ്സുകളുമടങ്ങിയ വലിയൊരു കോളജ് ഇവിടെ സ്ഥാപിച്ചാൽ അത് ജില്ലയിലെ വിദ്യാർഥികൾക്ക് ഏറെ ഉപകാരപ്രദമാകും. നിലവിൽ കാസർകോട് ജില്ലയിലുള്ളത് പെരിയയിലെ ഏക സർവകലാശാലയായ സെൻട്രൽ യൂണിവേഴ്സിറ്റി മാത്രമാണ്. കൂടുതൽ വിദ്യാർഥികൾക്ക് ഉപരിപഠന സൗകര്യം ഒരുക്കാൻ കുമ്പളയിലെ സ്ഥലം വിനിയോഗിക്കാമെന്ന നിർദേശത്തിന് വലിയ സ്വീകാര്യതയാണ് ലഭിക്കുന്നത്.

കേന്ദ്ര-സംസ്ഥാന മന്ത്രിമാർക്ക് നിവേദനം നൽകും

കാടുമൂടിക്കിടക്കുന്ന ഈ റെയിൽവേ ഭൂമിയുടെ വിഷയം അധികൃതരുടെ ശ്രദ്ധയിൽപ്പെടുത്താൻ വിപുലമായ ഇടപെടലുകൾക്കാണ് ഒരുങ്ങുന്നത്. ഇത് സംബന്ധിച്ച് കേന്ദ്ര റെയിൽവേ, വിദ്യാഭ്യാസ മന്ത്രിമാർക്കും റെയിൽവേ ചുമതലയുള്ള സംസ്ഥാന മന്ത്രി സി പി ജോണിനും ജനപ്രതിനിധികൾക്കും നിവേദനം നൽകാൻ മൊഗ്രാൽ ദേശീയവേദി എക്സിക്യൂട്ടീവ് യോഗം തീരുമാനിച്ചു. യോഗത്തിൽ പ്രസിഡൻ്റ് എ എം സിദ്ദീഖ് റഹ്മാൻ അധ്യക്ഷത വഹിച്ചു. ജനറൽ സെക്രട്ടറി പി എം മുഹമ്മദ് കുഞ്ഞി ടൈൽസ് സ്വാഗതം പറഞ്ഞു. ഭാരവാഹികളായ കെ പി മുഹമ്മദ് സ്മാർട്ട്, വിജയകുമാർ, ബി എ മുഹമ്മദ് കുഞ്ഞി, മുഹമ്മദ് അഷ്റഫ് സാഹിബ് എന്നിവർ സംസാരിച്ചു.

എം എ മൂസ, ടി കെ അൻവർ, എം എം റഹ്മാൻ, ഖാദർ മൊഗ്രാൽ, മുഹമ്മദ് അബ്ക്കോ, എം ജി എ റഹ്മാൻ, റിയാസ് കരീം, ടി കെ ജാഫർ, എച്ച് എം കരീം, അഷ്റഫ് പെർവാഡ്, മുർഷിദ് കെ വി, അബ്ദുല്ലക്കുഞ്ഞി നട്പ്പളം, എം എസ് മുഹമ്മദ് കുഞ്ഞി, ടി എ ജലാൽ, എ എച്ച് ഇബ്രാഹിം, അബ്ദുല്ല കുഞ്ഞി കോട്ടക്കുന്ന്, വിശ്വനാഥൻ, കെ മുഹമ്മദ് കുഞ്ഞി നാങ്കി എന്നിവർ ചർച്ചയിൽ പങ്കെടുത്തു. ട്രഷറർ എം എ അബൂബക്കർ സിദ്ദീഖ് നന്ദി പറഞ്ഞു.

ഈ പ്രധാനപ്പെട്ട വാർത്ത നിങ്ങളുടെ സുഹൃത്തുക്കൾക്കും പങ്കുവെക്കുക. കൂടുതൽ പ്രാദേശിക വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: A strong demand has been raised to establish a central higher education centre on the unused, overgrown railway land in Kumbla, Kasaragod, to help local students who currently rely on Mangalore for higher studies.

#Kumbla #KasaragodNews #RailwayLand #HigherEducation #KeralaNews #AparnaNews