ഉദുമ ബേക്കല്‍ ഭാഗങ്ങളില്‍ അക്രമം അഴിച്ചുവിട്ടത് സി.പി.എം: കല്ലട്ര മാഹിന് ഹാജി
Aug 2, 2012, 21:42 IST
രാവിലെ എട്ട് മണിക്ക് മൗവ്വലില്‍ നിന്നും തച്ചങ്ങാട്ടേക്ക് ബൈക്കില്‍ പോകുകയായിരുന്ന രണ്ട് ലീഗ് പ്രവര്‍ത്തകരെ തച്ചങ്ങാട്ട് തടഞ്ഞുവെച്ച് മര്‍ദ്ദിക്കുകയും ബൈക്കിന്റെ താക്കോല്‍ സി.പി.എം പ്രവര്‍ത്തകര്‍ കൈവശപ്പെടുത്തി ബൈക്ക് പിടിച്ചുവെച്ചതുമാണ്‌ പ്രശ്നങ്ങള്‍ക്ക് തുടക്കം.
മര്‍ദ്ദനമേറ്റ് തിരിച്ചുപോയ ലീഗ് പ്രവര്‍ത്തകര്‍ അല്‍പം കഴിഞ്ഞ് മൂന്ന് പേരേയും കൂട്ടി ബൈക്കിന്റെ താക്കോല്‍ വാങ്ങാന്‍ പോയപ്പോള്‍ ഇവരെ വീണ്ടും സി.പി.എം പ്രവര്‍ത്തകര്‍ അക്രമിക്കുകയായിരുന്നു. അതിനിടെ അരവത്തുവെച്ച് നേതാവിന് മര്‍ദ്ദനമേറ്റു എന്നാരോപിച്ച് സി.പി.എം പ്രവര്‍ത്തകര്‍ പ്രതിഷേധ പ്രകടനം നടത്തി. പ്രകടനമായിട്ടെത്തിയ സി.പി.എം പ്രവര്‍ത്തകര്‍ മവ്വലിലെ ലീഗ് ഓഫീസ് തകര്‍ക്കുകയും പിന്നീട് തച്ചങ്ങാട്ടെത്തി പ്രിയദര്‍ശിനി മന്ദിരം എറിഞ്ഞ് തകര്‍ക്കുകയുമായിരുന്നു. ഇതിനിടയിലാണ്‌ ഡി.വൈ.എഫ്.ഐ പ്രവര്‍ത്തകനായ മനോജ് കുഴഞ്ഞ് വീണത്. വെള്ളം ആവശ്യപ്പെട്ട മനോജിന് തൊട്ടടുത്ത വീട്ടില്‍ നിന്നും വെള്ളം വാങ്ങികൊടുത്ത് സി.പി.എം പ്രവര്‍ത്തകര്‍ നേരത്തേ തടഞ്ഞുവെച്ച സ്വിഫ്റ്റ് കാറില്‍ ഉദുമയിലെ ആശുപത്രിയില്‍ എത്തിക്കുകയായിരുന്നുവെന്ന്‌ കല്ലട്ര മാഹിന് ഹാജി ചൂണ്ടിക്കാട്ടി.
ആശുപത്രിയില്‍ എത്തിച്ചപ്പോള്‍ ഡോക്ടര്‍ സി.പി.എം പ്രവര്‍ത്തകരെ അറിയിച്ചത് ഹൃദയാഘാതം മൂലം മരിച്ചുവെന്നാണ്‌. പിന്നീട് വൈകിട്ട് മൂന്ന് മണിയോടെയാണ് മനോജിനെ ലീഗ് പ്രവര്‍ത്തകര്‍ ചവിട്ടി കൊന്നതാണെന്നുള്ള പ്രചരണം നടത്തി ഇതിന്റെ പേരില്‍ ഹര്‍ത്താല്‍ പ്രഖ്യാപിച്ചതെന്ന് കല്ലട്ര മാഹിന് ഹാജി പറഞ്ഞു. വിദഗ്ദ്ധ പോസ്റ്റ് മോര്‍ട്ടത്തിലൂടെ ഇക്കാര്യം തെളിയുമ്പോള്‍ സി.പി.എമ്മിന്‌ ജനങ്ങളോട് മറുപടി പറയേണ്ടിവരുമെന്ന് അദ്ദേഹം കൂട്ടിച്ചേര്‍ത്തു.
Keywords: Kasaragod, Kallatra Mahin Haji, Uduma, Bekal, Thachangad, CPM, IUML.
Tags
Share this story
