അനിശ്ചിതത്വത്തിന് വിരാമം; ജില്ലാ പഞ്ചായത്ത് ചിറ്റാരിക്കാൽ ഡിവിഷനിൽ കവിത കൃഷ്ണനെ സ്ഥാനാർത്ഥിയായി പ്രഖ്യാപിച്ച് സിപിഎം

കാസർകോട്: (KasargodVartha) ജില്ലാ പഞ്ചായത്ത് ചിറ്റാരിക്കാൽ ഡിവിഷനിലെ സ്ഥാനാർത്ഥിയെ പ്രഖ്യാപിച്ചതോടെ സിപിഎമ്മിലെ അനിശ്ചിതത്വത്തിന് വിരാമമായി. ബാലസംഘത്തിലൂടെ പൊതുസംഘടനാ പ്രവർത്തനത്തിലേക്ക് കടന്നുവന്ന കവിത കൃഷ്ണനെയാണ് പാർട്ടി മത്സരരംഗത്തേക്ക് കൊണ്ടുവന്നത്.

ബാലസംഘത്തിന്റെ യൂണിറ്റ് തലം മുതൽ സംഘടനാ ചുമതലകൾ നിർവഹിച്ചു വന്ന കവിത, വേനൽത്തുമ്പിന്റെ കലാകാരികൂടിയായിരുന്നു. ബാലസംഘത്തിന്റെയും എസ്എഫ്ഐയുടെയും പനത്തടി ഏരിയ പ്രസിഡന്റ്, സെക്രട്ടറി ചുമതലകൾ ഇവർ നിർവഹിച്ചിട്ടുണ്ട്. ബാലസംഘം ജില്ലാ ജോയിന്റ് സെക്രട്ടറിയായും പ്രവർത്തിച്ചിട്ടുണ്ട്.

നിലവിൽ ബാലസംഘം ജില്ലാ കോഡിനേറ്റർ-സംസ്ഥാന കമ്മിറ്റി അംഗം, എസ്എഫ്ഐ ജില്ലാ സെക്രട്ടറിയേറ്റ് അംഗം, കണ്ണൂർ യൂണിവേഴ്സിറ്റി യൂണിയൻ ജനറൽ സെക്രട്ടറി എന്നീ സ്ഥാനങ്ങൾ കവിത കൃഷ്ണൻ വഹിക്കുന്നു.

പനത്തടി ഏരിയയിലെ ബാനമാണ് കവിതയുടെ സ്വദേശം. പനത്തടി പാർട്ടി ഏരിയ കമ്മിറ്റി അംഗം ബാനം കൃഷ്ണന്റെയും കെ വി ലക്ഷ്മിയുടെയും മകളാണ് 23-കാരിയായ കവിത കൃഷ്ണൻ.

കാലിച്ചാനടുക്കം എസ്എൻഡിപി യോഗം ആർട്സ് ആൻഡ് സയൻസ് കോളേജിൽ നിന്നും ബി കോം ബിരുദം നേടിയ കവിത, നിലവിൽ തളിപ്പറമ്പ് ഇൻസ്റ്റിറ്റ്യൂട്ട് ഓഫ് പബ്ലിക് പോളിസി ആൻഡ് ലീഡർഷിപ്പിൽ രണ്ടാം വർഷ എംഎ സോഷ്യൽ എൻ്റർപ്രണർഷിപ്പ് ആൻഡ് ഡെവലപ്മെൻ്റ് വിദ്യാർത്ഥിനിയാണ്.

ചിറ്റാരിക്കാൽ ഡിവിഷനിലെ സിപിഎം സ്ഥാനാർത്ഥിയെക്കുറിച്ചുള്ള ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായങ്ങൾ കമൻ്റ് ചെയ്യുക. 

Article Summary: CPM announced Kavitha Krishnan, a student leader, as their candidate for the Chittarikkal Division of Kasargod District Panchayat.

#KasaragodElections #CPMKerala #KavithaKrishnan #DistrictPanchayat #Chittarikkal #KeralaPolitics