മുസ്‌ലിം ലീഗിൻ്റെ കോട്ടയിൽ വിള്ളലുണ്ടാക്കാൻ സിപിഎമ്മിന് കഴിയുമോ? സമസ്ത സമ്മേളനത്തിന് അഭിവാദ്യമർപ്പിച്ച് ‘തളങ്കരയിലെ സഖാക്കൾ'; തദ്ദേശ തിരഞ്ഞെടുപ്പ് പ്രഖ്യാപനത്തിനുമുൻപേ രാഷ്ട്രീയം ചൂടുപിടിക്കുന്നു

കാസർകോട്: (KasargodVartha) അടുത്തുവരുന്ന തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പിന് മുന്നോടിയായി, സമസ്ത കേരള ജംഇയ്യത്തുൽ ഉലമയിലെ ഒരുവിഭാഗവും മുസ്‌ലിം ലീഗും തമ്മിലുള്ള തർക്കങ്ങൾ സംസ്ഥാനത്ത് തുടരുന്ന പശ്ചാത്തലത്തിൽ, സമസ്തയുടെ പ്രധാന സമ്മേളനത്തിന് അഭിവാദ്യമർപ്പിച്ച് തളങ്കരയിലെ 'സഖാക്കൾ'  സ്ഥാപിച്ച ഫ്ലെക്സ് ബോർഡ് രാഷ്ട്രീയ കേന്ദ്രങ്ങളിൽ വലിയ ചർച്ചയാകുന്നു. മുസ്‌ലിം ലീഗിന്റെ പരമ്പരാഗത വോട്ടുബാങ്കിനെ ലക്ഷ്യമിട്ടുള്ള സി.പി.എം. തന്ത്രപരമായ നീക്കമായാണ് ഈ ഫ്ലെക്സ് ബോർഡ് വിലയിരുത്തപ്പെടുന്നത്.

സമസ്ത ശതാബ്ദി സമ്മേളനത്തിന് അഭിവാദ്യം

തളങ്കര ഗവ. മുസ്ലിം വൊക്കേഷണൽ ഹയർസെക്കൻഡറി സ്കൂൾ ചുറ്റുമതിലിനോട് ചേർന്ന് സ്ഥപിച്ച ഫ്ലെക്സ് ബോർഡ് സമസ്തയുടെ നൂറാം വാർഷിക അന്താരാഷ്ട്ര മഹാസമ്മേളനത്തിനാണ് അഭിവാദ്യമർപ്പിക്കുന്നത്. 2026 ഫെബ്രുവരി 4, 5, 6, 7, 8 തീയതികളിൽ കാസർകോട് കുണിയയിലെ വരക്കൽ മുല്ലക്കോയ തങ്ങൾ നഗറിലാണ് ഈ മഹാസമ്മേളനം നടക്കുന്നത്.

ഫ്ലെക്സ് ബോർഡിൽ, ‘ആശംസകളോടെ... തളങ്കര സഖാക്കൾ’ എന്ന് താഴെ രേഖപ്പെടുത്തിയിട്ടുണ്ട്. കൂടാതെ, സമസ്തയുടെ ലോഗോയും സമ്മേളനത്തിൻ്റെ വിശദാംശങ്ങളും ഇതിൽ നൽകിയിട്ടുണ്ട് . മുസ്‌ലിം ലീഗുമായി സമവായമാകാതെ സമസ്തയിലെ ഒരു വിഭാഗം കടുത്ത അതൃപ്തിയിൽ നിൽക്കുന്ന സാഹചര്യത്തിൽ, ഈ സമ്മേളനത്തിന് സി.പി.എം. അനുഭാവികൾ പരസ്യമായി പിന്തുണ പ്രഖ്യാപിക്കുന്നത് രാഷ്ട്രീയമായി ഏറെ പ്രാധാന്യമർഹിക്കുന്നു.

ലീഗ്-സമസ്ത തർക്കത്തിൻ്റെ പശ്ചാത്തലം

സമസ്തയിലെ ഭിന്നതകളിൽ മുസ്‌ലിം ലീഗ് നേതൃത്വം ഉലയുന്ന സാഹചര്യമാണ് നിലവിൽ. തദ്ദേശ തിരഞ്ഞെടുപ്പിന് മുന്നോടിയായി സമസ്തയിലെ ലീഗ് വിരുദ്ധരെ അനുനയിപ്പിക്കാനുള്ള ലീഗിന്റെ ശ്രമങ്ങൾ പാതിവഴിയിലായതാണ് തർക്കങ്ങൾ വീണ്ടും മറനീക്കി പുറത്തുവന്നത്. സമസ്തയുടെ തീരുമാനങ്ങൾക്കെതിരെ പ്രവർത്തിക്കുന്ന സ്ഥപനങ്ങളെയും സംഘങ്ങളെയും ലീഗ് പലവിധേനയും പിന്തുണക്കുന്നു എന്നതണ് പ്രധാന ആരോപണം. മുസ്തഫൽ ഫൈസിയെ സസ്‌പെൻഡ് ചെയ്തതിലും സി.ഐ.സി. (കോ-ഓർഡിനേഷൻ ഓഫ് ഇസ്ലാമിക് കോളേജസ്) വിഷയങ്ങളിലുമുണ്ടായ തർക്കങ്ങളാണ് മറ്റൊരുവിധത്തിൽ ഭിന്നതകൾക്ക് വഴി വെച്ചത്.

ഈ സാഹചര്യത്തിൽ, സമസ്തയിലെ ലീഗ് വിരുദ്ധ പക്ഷം കടുത്ത അമർഷത്തിലാണ്. സമ്മേളനത്തിന്റെ നടത്തിപ്പിനായി ലീഗ് നേതാവ് എം.സി. മായിൻഹാജി ചെയർമാനായ കോ-ഓർഡിനേഷൻ കമ്മിറ്റി രൂപീകരിച്ചതിലെ അമിതാധികാരവും തർക്കങ്ങൾക്ക് കാരണമായിരുന്നു. ഈ സംഘർഷാവസ്ഥയിൽ, സി.പി.എം. അനുഭാവികൾ സമസ്തയ്ക്ക് പിന്തുണ പ്രഖ്യാപിക്കുന്നതിലൂടെ, മുസ്‌ലിം ലീഗിൻ്റെ പരമ്പരാഗത വോട്ടുബാങ്കിനുള്ളിൽ ഒരു വിള്ളൽ ഉണ്ടാക്കാനാണ് സി.പി.എം. ലക്ഷ്യമിടുന്നതെന്ന് രാഷ്ട്രീയ നിരീക്ഷകർ വിലയിരുത്തുന്നു. തളങ്കരയിലെ ഫ്ലെക്സ് ബോർഡ് സി.പി.എം. നേതൃത്വത്തിന്റെ അറിവോടെയുള്ള തന്ത്രപരമായ നീക്കമായാണ് കാണുന്നത്.

സമസ്തയിലെ തർക്കം തദ്ദേശ തിരഞ്ഞെടുപ്പിൽ മുസ്‌ലിം ലീഗിനെ ബാധിക്കുമോ? നിങ്ങളുടെ അഭിപ്രായം പങ്കുവെക്കുക.

Article Summary: CPIM targets Muslim League vote bank by supporting Samastha conference amidst their ongoing rift, sparking political debate.

 #KeralaPolitics #CPIM #MuslimLeague #Samastha #LocalElections #Kasaragod