വ്യവസായ പാർക്കിൻ്റെ മറവിൽ ഗുരുവനംകുന്ന് ഇടിച്ച് മണ്ണുകടത്തുന്നതായി പരാതി; കുടിവെള്ളം മുട്ടി പ്രദേശവാസികള്‍

കാഞ്ഞങ്ങാട്: (KasargodVartha) ഗുരുവനംകുന്ന് ഇടിച്ച് മണ്ണ് കടത്തുന്നതായി പരാതി. വ്യവസായ പാർക്കിൻ്റെ മറവിൽ പ്രാദേശിക രാഷ്ട്രീയക്കാരുടെ ഒത്താശയോടെയാണ് കുന്നിടിച്ച് മണ്ണ് കടത്തുന്നതെന്ന് പ്രദേശവാസികൾ ആരോപിക്കുന്നു. ഇതിനകം തന്നെ കുന്നിടിച്ച് വൻതോതിൽ മണ്ണ് കടത്തിക്കഴിഞ്ഞു.

കിണറുകളിൽ വെള്ളം വറ്റുന്നു; ആശങ്കയിൽ കുടുംബങ്ങൾ

മണ്ണ് കടത്തിയതോടെ പ്രദേശത്തെ നൂറുകണക്കിന് കുടുംബങ്ങളുടെ കുടിവെള്ളം മുട്ടാനിടയുണ്ടെന്നാണ് ജനങ്ങൾ പറയുന്നത്. ശുദ്ധജല സംഭരണിയായിരുന്ന കുന്നിടിച്ചുനിരത്തൽ ശക്തമായതോടെ പാറക്കെട്ടുകൾ തകർന്ന് ജലസംഭരണ അറകളും ഇല്ലാതാകുകയാണെന്നാണ് ജനങ്ങൾ പറയുന്നത്. കഴിഞ്ഞ വർഷം ഇതേ സമയത്ത് മൂന്നും നാലും കോൽ വരെ വെള്ളമുണ്ടായിരുന്ന പല കിണറുകളിലും ഇത്തവണ വെള്ളത്തിൻ്റെ അളവ് രണ്ടുകോലിനും താഴെയായി മാറിയെന്ന് പ്രദേശവാസികൾ ചൂണ്ടിക്കാട്ടുന്നു.

വേനൽ ശക്തമാകുന്നതിന് മുൻപുതന്നെ ജലനിരപ്പ് താഴ്ന്നതോടെ ഗുരുവനംകുന്നിനെ ആശ്രയിച്ച് കഴിയുന്ന നൂറുകണക്കിന് കുടുംബങ്ങളാണ് ആശങ്കയിലായത്. മടിക്കൈ പഞ്ചായത്തിലെ മടിക്കൈ വില്ലേജിലും കാഞ്ഞങ്ങാട് നഗരസഭയിലെ പുതുക്കൈ വില്ലേജിലുമാണ് വ്യവസായ പാർക്ക് ഉൾപ്പെടുന്നത്. ഗുരുവനം, കാർത്തിക, ചാമക്കൊച്ചി, കൂലോം റോഡ്, അടുക്കത്ത് പറമ്പ്, മേക്കാട്ട്, കാലച്ചാംപൊതി, അരയി, നൂഞ്ഞി, വട്ടത്തോട്, പാലക്കാൽ തുടങ്ങിയ പ്രദേശങ്ങളിലെ കിണറുകളെയും ജലാശയങ്ങളെയും കുന്നിടിക്കൽ ബാധിച്ചു തുടങ്ങി.

കരാർ വ്യവസ്ഥ ലംഘിച്ച് മണ്ണുകടത്തുന്നതായി ആരോപണം

വ്യവസായ എസ്റ്റേറ്റിനായി സ്ഥലം നിരപ്പാക്കുന്നതിന് ആവശ്യമായ അളവിൽ മാത്രം മണ്ണെടുക്കുമെന്നാണ് അധികൃതർ ആദ്യം പറഞ്ഞിരുന്നത്. എന്നാൽ ഇപ്പോൾ ദിവസവും നൂറുകണക്കിന് ലോഡ് മണ്ണാണ് പ്രദേശത്തുനിന്ന് കടത്തുന്നത്. രണ്ടു മീറ്റർ താഴ്ചയിൽ മാത്രം മണ്ണെടുക്കാനാണ് അനുമതിയെന്നാണ് അധികൃതർ പറയുന്നത്. എന്നാൽ നിലവിൽ കുന്നിൻ്റെ എത്ര ഭാഗം താഴ്ത്തിയെന്ന ചോദ്യത്തിന് വ്യക്തമായ മറുപടി ലഭിക്കുന്നില്ല.

നിരപ്പാക്കൽ പ്രവൃത്തി ഏറ്റെടുത്ത കെപിസിസിഎൽ ആണ് മണ്ണ് നീക്കം ചെയ്യുന്നത്. മണ്ണ് മലബാർ സിമൻ്റ്സിലേക്കാണ് കൊണ്ടുപോകുന്നതെന്നും പറയുന്നു. സർക്കാർ ഭൂമിയിൽനിന്ന് മണ്ണെടുത്ത് മറ്റൊരു പൊതുമേഖലാ സ്ഥാപനത്തിലേക്ക് കൊണ്ടുപോകുന്നതിനെക്കുറിച്ച് പ്രദേശവാസികള്‍ ചോദ്യമുയർത്തുമ്പോൾ, സ്ഥലം നിരപ്പാക്കുന്നതിൻ്റെ ഭാഗമായാണ് മണ്ണ് നീക്കുന്നതെന്നാണ് അധികൃതരിൽനിന്ന് ലഭിക്കുന്ന മറുപടി.

82 ഏക്കറിൽ വ്യവസായ എസ്റ്റേറ്റും പുതിയ റോഡും

ആദ്യ പിണറായി സർക്കാരിൻ്റെ കാലത്താണ് കാഞ്ഞങ്ങാട് വ്യവസായ എസ്റ്റേറ്റിന് രൂപരേഖ തയ്യാറാക്കിയത്. ഇതിനായി ഗുരുവനംകുന്നിലെ 82 ഏക്കർ റവന്യൂ ഭൂമി വ്യവസായ വകുപ്പിന് കൈമാറി. 92 അപേക്ഷകരിൽനിന്ന് 32 പേരെ തിരഞ്ഞെടുത്ത് സ്ഥലം അനുവദിച്ചു. ഒരു വ്യവസായത്തിന് അഞ്ചേക്കർ വരെ ഭൂമി അനുവദിച്ചിട്ടുണ്ട്. ഭക്ഷ്യോത്പാദന കേന്ദ്രങ്ങൾ മുതൽ പ്ലൈവുഡ് കമ്പനികൾ വരെയുള്ള സംരംഭങ്ങൾ പട്ടികയിലുണ്ട്. സെൻ്റിന് 10,800 രൂപ നിരക്കിലാണ് സ്ഥലം അനുവദിച്ചത്. അനുവദിച്ച തുകയുടെ ഒരു ഭാഗം ആദ്യം അടയ്ക്കുകയും ശേഷിക്കുന്ന തുക നാലുവർഷത്തിനുള്ളിൽ അടച്ചുതീർക്കുകയും ചെയ്യണമെന്ന വ്യവസ്ഥയിലായിരുന്നു ഭൂമി അനുവദിച്ചത്.

നേരത്തെ കേന്ദ്രീയ വിദ്യാലയത്തിൻ്റെ ഭാഗത്തുനിന്നുള്ള റോഡിലൂടെയായിരുന്നു ഗുരുവനംകുന്നിന് മുകളിലേക്ക് എത്തിയിരുന്നത്. ഇപ്പോൾ കൂലോം റോഡ് ഭാഗത്തുനിന്ന് വ്യവസായ എസ്റ്റേറ്റിലേക്ക് പുതിയ വഴിയൊരുക്കിയിട്ടുണ്ട്. ഈ റോഡിലൂടെയാണ് കുന്നിൽനിന്നുള്ള മണ്ണ് കടത്തുന്നത്. മെക്കാഡം ടാറിങ് ഉൾപ്പെടെ 2.71 കോടി രൂപയുടെ റോഡ് നിർമാണ പദ്ധതിയും നടപ്പാക്കാനിരിക്കുകയാണ്.

വ്യവസായ എസ്റ്റേറ്റ് യാഥാർഥ്യമാകുന്നതോടെ തൊഴിലും സാമ്പത്തിക വളർച്ചയും ഉണ്ടാകുമെന്ന പ്രതീക്ഷ ജനങ്ങൾക്കുണ്ടെങ്കിലും, കുടിവെള്ള സുരക്ഷ ഉറപ്പാക്കണമെന്നാണ് പ്രധാന ആവശ്യം. ശാസ്ത്രീയ പഠനം നടത്തണമെന്നും മണ്ണെടുപ്പിൻ്റെ പരിധി വ്യക്തമാക്കണമെന്നും നാട്ടുകാർ ആവശ്യപ്പെടുന്നു. വിഷയത്തിൽ ജില്ലാ ഭരണകൂടം നടപടിയെടുക്കുന്നില്ലെന്നാണ് ഉയർന്നുവരുന്ന പ്രധാന വിമർശനം.

കൂടുതല്‍ വാർത്തകളും വിശേഷങ്ങളും അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് കമൻ്റായി രേഖപ്പെടുത്തുക. 

Article Summary: Residents protest against alleged illegal soil excavation at Guruvanamkunnu for an industrial park, causing water scarcity.

#Guruvanamkunnu #KanhangadNews #EnvironmentalIssue #KeralaNews #IndustrialPark #WaterScarcity #MalayalamNews #KasaragodNews #RenuNews