മട്ടലായി അപകടത്തിൽ അന്വേഷണം തുടങ്ങി: മന്ത്രി ഇടപെടുന്നു; കളക്ടർ ഉടൻ സ്ഥലത്തെത്തും

ചെറുവത്തൂർ: (KasargodVartha) ജില്ലയിലെ ചെറുവത്തൂർ മട്ടലായി ദേശീയപാത നിർമ്മാണത്തിനിടെയുണ്ടായ മണ്ണിടിച്ചിലിൽ ഒരു തൊഴിലാളി മരിക്കുകയും മറ്റ് തൊഴിലാളികൾക്ക് പരിക്കേൽക്കുകയും ചെയ്ത സംഭവത്തിൽ വനം-വന്യജീവി വകുപ്പ് മന്ത്രി എ.കെ. ശശീന്ദ്രൻ അടിയന്തര നടപടിക്ക് നിർദ്ദേശം നൽകി.

ഉന്നത ഉദ്യോഗസ്ഥരിൽ നിന്ന് വിവരങ്ങൾ തേടിയ മന്ത്രി, ജില്ലാ കളക്ടറുമായും ജില്ലാ പോലീസ് മേധാവിയുമായും സംസാരിച്ചു. അപകടത്തെക്കുറിച്ച് അന്വേഷണം നടത്താൻ പോലീസിന് നിർദ്ദേശം നൽകി. 

സ്ഥലം സന്ദർശിക്കാൻ ജില്ലാ കളക്ടറോടും മന്ത്രി ആവശ്യപ്പെട്ടു. പരിക്കേറ്റവർക്ക് അടിയന്തര വൈദ്യസഹായം ലഭ്യമാക്കുന്നതിനും മന്ത്രി നിർദ്ദേശം നൽകി.
പിലിക്കോട് മട്ടലായി ദേശീയപാത നിർമ്മാണത്തിനിടെയുണ്ടായ അപകടത്തെ തുടർന്ന് ജില്ലാ കളക്ടർ കെ. ഇമ്പശേഖരൻ ഇന്ന് (തിങ്കളാഴ്ച) വൈകീട്ട് 3.30 ന് അപകടസ്ഥലം സന്ദർശിക്കും.

സംഭവത്തിൽ പോലീസ് അന്വേഷണം ആരംഭിച്ചിട്ടുണ്ടെന്ന് ജില്ലാ ഭരണകൂടം അറിയിച്ചു. കഴിഞ്ഞ മഴക്കാലത്ത് കളക്ടർ ഈ പ്രദേശം സന്ദർശിക്കുകയും ആവശ്യമായ സുരക്ഷാ മുന്നറിയിപ്പുകൾ നൽകുകയും ചെയ്തിരുന്നു. മണ്ണിടിച്ചിലിനുള്ള സാധ്യത കളക്ടർക്ക് ബോധ്യപ്പെട്ടതിൻ്റെ അടിസ്ഥാനത്തിലായിരുന്നു ഈ മുന്നറിയിപ്പ്.

ഇതിന് സമീപമുള്ള ചെറുവത്തൂർ വീരമലക്കുന്നിനും സമാനമായ മുന്നറിയിപ്പ് നൽകിയിരുന്നു. കഴിഞ്ഞ വർഷം വീരമലക്കുന്നിന് സമീപമുള്ള നിർമ്മാണ സ്ഥലത്തും സമാനമായ അപകടം സംഭവിച്ചിരുന്നു. അന്ന് മണ്ണിനടിയിൽപ്പെട്ട തൊഴിലാളിയെ മറ്റ് തൊഴിലാളികൾ ഉടൻ തന്നെ രക്ഷപ്പെടുത്തിയതിനാലാണ് ജീവൻ നഷ്ടപ്പെടാതിരുന്നത്.

Summary: Following the accident at the national highway construction site in Pilicode Mattalai, District Collector K. Imbashekaran will visit the location today at 3:30 PM. The district administration has informed that the police have started an investigation into the incident. The Collector had previously issued safety warnings for the area.

#MattalaiAccident, #DistrictCollector, #SafetyMeasures, #KeralaNews, #Landslide, #ConstructionSafety