തെങ്ങ് കയറ്റ തൊഴിലാളിയെ കിട്ടാനില്ല: കര്‍ഷകര്‍ ദുരിതത്തില്‍

കാസര്‍കോട്: ജില്ലയില്‍ തെങ്ങുകയറ്റ തൊഴിലാളി ക്ഷാമം രൂക്ഷമായതോടെ കേര കര്‍ഷകര്‍ ദുരിതത്തിലായി. ജില്ലയിലെ പല ഭാഗങ്ങളിലും തെങ്ങുകയറ്റ തൊഴിലാളി ക്ഷാമം രൂക്ഷമായിരിക്കുകയാണ്. കാസര്‍കോട് താലൂക്കിലെ വിവിധ പ്രദേശങ്ങളിലും തൊഴിലാളികളെ കിട്ടാനില്ലാത്ത അവസ്ഥയാണ്. പള്ളിക്കര, ഉദുമ, മേല്‍പ്പറമ്പ്, ചെമ്മനാട്, കാസര്‍കോട് നഗരസഭ മധൂര്‍ ചെങ്കള, മൊഗ്രാല്‍ പുത്തൂര്‍ തുടങ്ങിയ സ്ഥലങ്ങളില്‍ തൊഴിലാളികളെ കിട്ടാത്തതിനാല്‍ തേങ്ങകള്‍ ഉണങ്ങി വീഴുകയാണ്. നേരത്തെ തെങ്ങ് ഒന്നിനു അഞ്ചു രൂപ മുതല്‍ പതിനഞ്ചു രൂപ വരെയായിരുന്നു തെങ്ങ് കയറ്റ തൊഴിലാളികള്‍ ഈടാക്കിയിരുന്നത്. ഇപ്പോള്‍ ഉള്ള തൊഴിലാളികള്‍ ഇരുപത് രൂപമുതല്‍ മുപ്പത് രൂപ വരെ ഈടാക്കുന്നു. ഇത്രയും തുക കൊടുത്താല്‍ തന്നെ തൊഴിലാളികളെ കിട്ടാത്ത അവസ്ഥയാണ്.