സിഐടിയു കൺസ്ട്രക്ഷൻ വർക്കേഴ്സ് ഫെഡറേഷൻ സംസ്ഥാന സമ്മേളനത്തിന് കാസർകോട്ട് തുടക്കമാകും; എളമരം കരീം ഉദ്ഘാടനം ചെയ്യും

കാസർകോട്: (KasargodVartha) കൺസ്ട്രക്ഷൻ വർക്കേഴ്സ് ഫെഡറേഷൻ (സിഐടിയു) സംസ്ഥാന സമ്മേളനം 2026 ഓഗസ്റ്റ് 16, 17 തീയതികളിൽ കാസർകോട് ജീവാസ് മാനസ ഓഡിറ്റോറിയത്തിൽ നടക്കുമെന്ന് ഭാരവാഹികൾ വാർത്താസമ്മേളനത്തിൽ അറിയിച്ചു. 14 ജില്ലകളിൽ നിന്നായി 419 പ്രതിനിധികളാണ് സമ്മേളനത്തിൽ പങ്കെടുക്കുക. സമ്മേളനത്തിന് മുന്നോടിയായുള്ള വിളംബര ജാഥ വെള്ളിയാഴ്ച (ഓഗസ്റ്റ് 14) വൈകിട്ട് നാല് മണിക്ക് കാസർകോട് പ്രസ് ക്ലബ് ജങ്ഷൻ കേന്ദ്രീകരിച്ച് നടക്കും.

ഉദ്ഘാടനവും പ്രതിനിധി സമ്മേളനവും

പ്രതിനിധി സമ്മേളനം ഞായറാഴ്ച രാവിലെ 10 മണിക്ക് ഷീലാ അലക്സ് – കെ ബാലകൃഷ്ണൻ നഗറിൽ വെച്ച് സിഐടിയു അഖിലേന്ത്യാ ജനറൽ സെക്രട്ടറി എളമരം കരീം ഉദ്ഘാടനം ചെയ്യും. ഫെഡറേഷൻ അഖിലേന്ത്യാ പ്രസിഡൻ്റ് സായി ബാബു, ജനറൽ സെക്രട്ടറി യു പി ജോസഫ്, കർണാടക സംസ്ഥാന സെക്രട്ടറി മഹന്തേഷ്, തമിഴ്നാട് സംസ്ഥാന സെക്രട്ടറി കുമാർ, സിഐടിയു സംസ്ഥാന സെക്രട്ടറിമാരായ ടി കെ രാജൻ, കെ മനോഹരൻ എന്നിവർ ചടങ്ങിൽ സംബന്ധിക്കും.

പ്രധാന ചർച്ചാവിഷയങ്ങൾ

സംസ്ഥാനത്ത് സിഐടിയുവിൽ അഫിലിയേറ്റ് ചെയ്ത ഏറ്റവും വലിയ ഫെഡറേഷനാണ് കൺസ്ട്രക്ഷൻ വർക്കേഴ്സ് ഫെഡറേഷൻ. നിലവിൽ ആറ് ലക്ഷത്തോളം അംഗങ്ങളുണ്ട്. ക്ഷേമനിധി ആനുകൂല്യങ്ങൾ സമയബന്ധിതമായി ലഭിക്കാത്തതും, നാല് ലക്ഷത്തോളം വരുന്ന പെൻഷൻകാർക്ക് കുടിശ്ശികയുള്ള 14 മാസത്തെ പെൻഷൻ ലഭിക്കാത്തതും നിർമാണ മേഖലയിലെ പ്രധാന പ്രതിസന്ധികളാണ്. ഇത്തരം ഗുരുതരമായ വിഷയങ്ങൾ സമ്മേളനത്തിൽ വിശദമായി ചർച്ച ചെയ്യും.

സെമിനാറുകളും സംഘാടക സമിതിയും

സമ്മേളനത്തിൻ്റെ ഭാഗമായി വിവിധ വിഷയങ്ങളിൽ ജില്ലയിൽ അഞ്ച്  സെമിനാറുകൾ സംഘടിപ്പിക്കുകയും പതാകദിനം ആചരിക്കുകയും ചെയ്തിരുന്നു. വാർത്താസമ്മേളനത്തിൽ സംഘാടക സമിതി ജനറൽ കൺവീനർ പി മണിമോഹൻ, വൈസ് ചെയർമാൻ ടി എം എ കരീം, ഫെഡറേഷൻ ജില്ലാ ട്രഷറർ ടി നാരായണൻ, ജില്ലാ ജോയിൻ്റ് സെക്രട്ടറി എ ആർ ധധ്യവാദ്, സിഐടിയു ജില്ലാ സെക്രട്ടറി കെ രവീന്ദ്രൻ എന്നിവർ സംബന്ധിച്ചു.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം 

Article Summary: The Construction Workers Federation (CITU) state conference will be held on August 16 and 17, 2026, at Jeevas Manasa Auditorium in Kasaragod. 

#CITUKerala #KasaragodNews #ConstructionWorkers #ElamaramKareem #TradeUnion #KeralaNews #MalayalamNews #AparnaNews