ക്രിസ്മസിനെ വരവേൽക്കാൻ നാടും നഗരവും ഒരുങ്ങി; കാഞ്ഞങ്ങാട് വിപണിയിൽ വൻ തിരക്ക്

കാഞ്ഞങ്ങാട്: (KasargodVartha) സമാധാനത്തിന്റെയും സന്തോഷത്തിന്റെയും പ്രതീകമായി ലോകമെമ്പാടുമുള്ള ക്രൈസ്തവ വിശ്വാസികൾ വ്യാഴാഴ്ച ക്രിസ്മസ് ആഘോഷിക്കുന്നു. ലോകരക്ഷകനായി യേശുക്രിസ്തു ഭൂമിയിൽ അവതരിച്ചതിന്റെ ഓർമ്മ പുതുക്കുന്ന സുദിനമാണ് ക്രിസ്മസ്.

നക്ഷത്ര വിളക്കുകളും ക്രിസ്മസ് മരങ്ങളും കരോൾ ഗാനങ്ങളും ചേർന്നൊരുക്കുന്ന ആവേശം ഈ ആഘോഷത്തിന് സമാനതകളില്ലാത്ത ഭംഗി നൽകുന്നു. മഞ്ഞു വീഴുന്ന ഡിസംബറിലെ തണുത്ത രാത്രികളിൽ ബെത്‌ലഹേമിലെ ഒരു പുൽക്കൂടിൽ യേശുക്രിസ്തു ജനിച്ചതിന്റെ ഓർമ്മ പുതുക്കലാണ് ഈ ക്രിസ്മസ് ദിനം.

ജില്ലയിൽ ക്രിസ്മസിനെ വരവേൽക്കാൻ നാടും നഗരവും ഒരുങ്ങിക്കഴിഞ്ഞു. സ്കൂളുകൾ ബുധനാഴ്ച മുതൽ അടച്ചതോടെ കാഞ്ഞങ്ങാട്ടും കാസർകോട്ടും ക്രിസ്മസ് വിപണി സജീവമായി. മലയോര മേഖലകൾ ഉൾക്കൊള്ളുന്ന കാഞ്ഞങ്ങാട് ബുധനാഴ്ച വലിയ തിരക്കാണ് അനുഭവപ്പെട്ടത്. 

നക്ഷത്രങ്ങൾ, പുൽക്കൂടുകൾ, ക്രിസ്മസ് തൊപ്പികൾ എന്നിവ വാങ്ങാൻ കടകളിൽ വൻ ജനത്തിരക്കായിരുന്നു. ഇത്തവണ പേപ്പർ നക്ഷത്രങ്ങളും ഫൈബർ നക്ഷത്രങ്ങളുമാണ് വിപണിയിൽ പ്രധാനമായും ഇടംപിടിച്ചിട്ടുള്ളത്. ഓരോ വർഷവും രൂപവും ഭാവവും മാറ്റിയാണ് നക്ഷത്രങ്ങളും പുൽക്കൂടുകളും വിപണിയിൽ എത്തുന്നത്. വലിപ്പത്തിനനുസരിച്ചാണ് ഇവയുടെ വില. കഴിഞ്ഞ ഒരാഴ്ചയായി വലിയ തോതിലുള്ള വിൽപ്പന നടക്കുന്നുണ്ടെന്ന് വ്യാപാരികൾ പറയുന്നു.

വ്യാഴാഴ്ച ക്രിസ്മസ് കേക്കിനായി ബേക്കറികളിലായിരിക്കും തിരക്ക് അനുഭവപ്പെടുക. ഇതിനായി വിവിധ നിറങ്ങളിലും മാതൃകകളിലുമുള്ള കേക്കുകൾ ബേക്കറികളിൽ സജ്ജമായിട്ടുണ്ട്.

ജില്ലയിലെ വിവിധ ഭാഗങ്ങളിൽ ബുധനാഴ്ച രാത്രിയോടെ ക്രിസ്മസ് കരോൾ സംഘടിപ്പിച്ചു. ഉത്തരേന്ത്യയിൽ ക്രിസ്മസ് ആഘോഷങ്ങൾക്കെതിരെ സംഘപരിവാർ നടത്തുന്ന ആക്രമണങ്ങളെ അപലപിക്കാനുള്ള വേദി കൂടിയാവുകയാണ് കേരളത്തിലെ ക്രിസ്മസ് കരോളുകൾ. വിവിധ സംഘടനകൾ ഇതിന് നേതൃത്വം നൽകിവരുന്നുണ്ട്.

ഈ ക്രിസ്മസ് സന്തോഷം നിങ്ങളുടെ പ്രിയപ്പെട്ടവരിലേക്കും എത്തിക്കാൻ ഈ വാർത്ത ഷെയർ ചെയ്യൂ. 

Article Summary: Christmas celebrations begin in Kasaragod with busy markets and carols.

#Christmas2025 #KasaragodNews #ChristmasCelebration #Kanhangad #KeralaChristmas #FestivalSeason