നിലവിളി കേട്ടെത്തി; സൈക്കിൾ ചെയിനിൽ കുടുങ്ങിയ കുട്ടിയുടെ രക്ഷകരായത് അഗ്നിരക്ഷാ സേന

കാസർകോട്: (KasargodVartha) സൈക്കിൾ ഓടിക്കുന്നതിനിടെ ചെയിനിൽ കാൽ കുടുങ്ങിയ ആറു വയസ്സുകാരനെ അഗ്നിരക്ഷാ സേന രക്ഷപ്പെടുത്തി. തളങ്കര ജദീദ് റോഡിലെ സാലിമിന്റെ മകൻ ഹാത്തിമിനാണ് അപകടം സംഭവിച്ചത്. 

തിങ്കളാഴ്ച ഉച്ചയ്ക്ക് 2.30-ഓടെയായിരുന്നു സംഭവം. സൈക്കിൾ ഓടിച്ചു കളിക്കുന്നതിനിടെ വീഴ്ച സംഭവിച്ചപ്പോൾ ഹാത്തിമിന്റെ കാൽ സൈക്കിൾ ചെയിനിൽ കുടുങ്ങുകയായിരുന്നു.

കുട്ടിയുടെ നിലവിളി കേട്ട് വീട്ടുകാരും സമീപവാസികളും ഓടിയെത്തി കാൽ പുറത്തെടുക്കാൻ ശ്രമിച്ചെങ്കിലും സാധിച്ചില്ല. തുടർന്ന് അഗ്നിരക്ഷാ സേനയെ വിവരമറിയിച്ചു. വേദനകൊണ്ട് പുളയുന്ന കുട്ടിയുടെ കാലിൽ നിന്ന് കട്ടർ ഉപയോഗിച്ച് ചെയിൻ മുറിച്ചുമാറ്റിയാണ് രക്ഷാപ്രവർത്തനം നടത്തിയത്. കാലിന് മുറിവേറ്റതിനെ തുടർന്ന് കുട്ടിയെ ഉടൻതന്നെ ആശുപത്രിയിൽ പ്രവേശിപ്പിച്ചു.

സീനിയർ ഫയർ ആൻഡ് റെസ്ക്യൂ ഓഫീസർ വി. എൻ. വേണുഗോപാലിന്റെ നേതൃത്വത്തിലുള്ള സേനാംഗങ്ങളായ രമേശൻ എം., രാജേഷ് പി. ടി., അമൽരാജ്, ജിതിൻ കൃഷ്ണൻ കെ. വി., വൈശാഖ് എം. എ., ഹോം ഗാർഡ് രാജു വി. എന്നിവർ രക്ഷാപ്രവർത്തനത്തിൽ പങ്കെടുത്തു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Summary: A six-year-old boy's leg got trapped in a bicycle chain while riding in Kasargod. The Fire and Rescue Service arrived after locals' attempts failed and successfully cut the chain to free the child, who was then hospitalized for injuries.

#KeralaNews, #Kasargod, #FireRescue, #BicycleAccident, #ChildSafety, #HeroicRescue