പൊതുശ്മശാനം യാഥാർത്ഥ്യമാക്കണം; ചെമ്മനാട് പഞ്ചായത്ത് സെക്രട്ടറിയോട് മനുഷ്യാവകാശ കമ്മീഷൻ

കാസർകോട്: (KasargodVartha) ചെമ്മനാട് പഞ്ചായത്തിൽ, നിലവിൽ ശ്മശാനത്തിനായി കണ്ടെത്തിയ സ്ഥലത്ത് ആവശ്യമായ നിയമാനുസൃത അനുമതികൾ ലഭ്യമാക്കി പൊതുശ്മശാനം യാഥാർത്ഥ്യമാക്കാനുള്ള നടപടികൾ ത്വരിതപ്പെടുത്തണമെന്ന് മനുഷ്യാവകാശ കമ്മീഷൻ ജുഡീഷ്യൽ അംഗം കെ ബൈജുനാഥ് ഉത്തരവിട്ടു.

ചെമ്മനാട് ഗ്രാമപഞ്ചായത്ത് സെക്രട്ടറി ഇതുസംബന്ധിച്ച് സ്വീകരിക്കുന്ന നടപടികൾ ഒരു മാസത്തിനുള്ളിൽ കമ്മീഷനെ അറിയിക്കണമെന്നും ഉത്തരവിൽ പറഞ്ഞു. പഞ്ചായത്ത് അധികൃതർ അപേക്ഷ സമർപ്പിക്കുന്ന മുറയ്ക്ക് നിയമപ്രകാരം ആവശ്യമായ അനുമതികൾ കാലതാമസം കൂടാതെ നൽകണമെന്ന് കമ്മീഷൻ ജില്ലാ കളക്ടർക്കും നിർദ്ദേശം നൽകി.

കളനാട് വില്ലേജ് പരിധിയിലെ മൊട്ടയിൽ സമുദായ ശ്മശാനം പ്രവർത്തിക്കുന്ന സ്ഥലത്തിന് സമീപം പൊതുശ്മശാനം നിർമ്മിക്കുന്നതിന്റെ സാധ്യതകൾ പരിശോധിച്ചുവരികയാണെന്ന് പഞ്ചായത്ത് സെക്രട്ടറി കമ്മീഷനെ അറിയിച്ചിരുന്നു. സ്ഥലം പരിശോധിച്ച് റിപ്പോർട്ട് നൽകാൻ കളനാട് വില്ലേജ് ഓഫീസർക്ക് നിർദ്ദേശം നൽകിയിട്ടുണ്ടെന്നും പഞ്ചായത്ത് സെക്രട്ടറി കമ്മീഷനെ അറിയിച്ചിട്ടുണ്ട്.

കുന്നുപാറയിൽ ശ്മശാനത്തിനായി സ്ഥലം വാങ്ങിയെങ്കിലും അനുമതി ലഭിക്കാത്തതിനാൽ തുടർനടപടികൾ സ്വീകരിച്ചില്ലെന്ന് റിപ്പോർട്ടിൽ പറയുന്നു. പഞ്ചായത്ത് കൃഷിഭവന് സമീപം ശ്മശാനം നിർമ്മിക്കാൻ ആലോചിച്ചെങ്കിലും 50 മീറ്റർ ദൂരപരിധിയിൽ സ്ഥാപനങ്ങളുണ്ടെന്ന കാരണത്താൽ ജില്ലാ കളക്ടർ അപേക്ഷ പരിഗണിച്ചില്ല. ശിവപുരത്ത് സ്ഥലം കണ്ടെത്തിയെങ്കിലും ക്ഷേത്രകമ്മിറ്റിയുടെയും പൊതുജനങ്ങളുടെയും എതിർപ്പുണ്ടായതിനെ തുടർന്ന് ആ നടപടിയും നടന്നില്ല.

ഗ്രാമപഞ്ചായത്തിന് കീഴിലുള്ള എല്ലാ പൗരന്മാർക്കും അടിസ്ഥാന സൗകര്യങ്ങൾ ഉറപ്പാക്കേണ്ടത് പഞ്ചായത്തിന്റെ ഭരണഘടനാപരവും നിയമപരവുമായ ബാധ്യതയാണെന്ന് കെ ബൈജുനാഥ് ഉത്തരവിൽ പറഞ്ഞു.

ഭരണഘടനയിലെ 21-ാം അനുച്ഛേദ പ്രകാരം ആത്മാഭിമാനത്തോടെ ജീവിക്കാനുള്ള അവകാശം അന്ത്യഘട്ടത്തിലും സംരക്ഷിക്കപ്പെടണമെന്ന് കമ്മീഷൻ നിരീക്ഷിച്ചു. കളനാട് വില്ലേജ് പരിധിയിലെ ചന്ദ്രശേഖരൻ തലക്കളായി സമർപ്പിച്ച പരാതിയിലാണ് മനുഷ്യാവകാശ കമ്മീഷന്റെ നടപടി.

ഈ വാർത്ത നിങ്ങളുടെ സുഹൃത്തുക്കളുമായി പങ്കുവെക്കൂ

Article Summary: Human Rights Commission orders Chemmanad panchayat to build public crematorium within one month.

#HumanRightsCommission #Chemmanad #Crematorium #Kasargod #Kerala #Panchayat