ചെമ്പകത്തണൽ 2: നെക്രാജയിൽ നിർധന കുടുംബത്തിന് കൂട്ടായ്മ നിർമിച്ച വീടിൻ്റെ താക്കോൽദാനം ഓഗസ്റ്റ് 23-ന്

കാസർകോട്: (KasargodVartha) അശരണരും നിർധനരുമായ കുടുംബങ്ങൾക്ക് കൈത്താങ്ങായി പ്രവർത്തിക്കുന്ന ചെമ്പകം പൂക്കുമിടം ചാരിറ്റി ആൻഡ് കൾച്ചറൽ ഫോറത്തിൻ്റെ നേതൃത്വത്തിൽ നെക്രാജയിലെ ചന്ദ്രമ്പാറ ചാത്തപ്പാടിയിൽ നിർമിച്ച വീടിൻ്റെ താക്കോൽ കൈമാറ്റം 2026 ഓഗസ്റ്റ് 23 ഞായറാഴ്ച നടക്കുമെന്ന് സംഘാടകർ വാർത്താസമ്മേളനത്തിൽ അറിയിച്ചു.

രാവിലെ ഓൻപത് മണിക്ക് നടക്കുന്ന ചടങ്ങിൽ സിപിഎം സംസ്ഥാന കമ്മിറ്റി അംഗം പി ജയരാജൻ താക്കോൽ കൈമാറും. സിപിഎം കാസർകോട് ജില്ലാ കമ്മിറ്റി സെക്രട്ടറി എം രാജഗോപാൽ വിശിഷ്ടാതിഥിയാകും. സിപിഎം കാസർകോട് ഏരിയ സെക്രട്ടറി ടിഎംഎ കരീം, കാസർകോട് ജില്ലാ പഞ്ചായത്ത് മുൻ വൈസ് പ്രസിഡൻ്റ് ഷാനവാസ് പാദൂർ തുടങ്ങിയവർ ചടങ്ങിൽ പങ്കെടുക്കും.

ചെമ്പകത്തണൽ ഭവനപദ്ധതി

അരികുവൽക്കരിക്കപ്പെടുന്ന കുടുംബങ്ങൾക്ക് സുരക്ഷിതമായ ഭവനം ഒരുക്കുകയെന്ന ലക്ഷ്യത്തോടെ ആരംഭിച്ച ചെമ്പകത്തണൽ വീട് പദ്ധതിയുടെ ആദ്യ വീട് 2023-ൽ മുന്നാട് ജയപുരത്തെ ഒരു കുടുംബത്തിന് കൈമാറിയിരുന്നു. പദ്ധതിയുടെ 2-ാം ഘട്ടമായ 'ചെമ്പകത്തണൽ 2'-ൻ്റെ പ്രാരംഭ പ്രവർത്തനങ്ങൾ 2025 ഓഗസ്റ്റിലാണ് ആരംഭിച്ചത്. ഇതിൻ്റെ ഭാഗമായി ലഭിച്ച 40-ഓളം അപേക്ഷകളിൽ നിന്ന് പ്രത്യേക നിർമാണ കമ്മിറ്റി 10 കുടുംബങ്ങളെ നേരിട്ട് സന്ദർശിച്ച് സ്ഥിതിഗതികൾ വിലയിരുത്തി.

ഇതിൽ ഏറ്റവും അർഹതപ്പെട്ട കുടുംബത്തെ കണ്ടെത്തിയാണ് നെക്രാജ ചന്ദ്രമ്പാറ ചാത്തപ്പാടിയിൽ വീട് നിർമിക്കാൻ തീരുമാനിച്ചത്. 2026 മേയിൽ ആരംഭിച്ച വീടിൻ്റെ നിർമാണം ഓഗസ്റ്റിൽ പൂർത്തീകരണ ഘട്ടത്തിലെത്തി. സുരക്ഷിതമായൊരു വീടെന്ന സ്വപ്നം യാഥാർഥ്യമാക്കുന്നതിൽ സംഘടനയിലെ അംഗങ്ങളും ജിസിസി കമ്മിറ്റിയും നിർണായക പങ്കുവഹിച്ചു.

ജീവകാരുണ്യ പ്രവർത്തനങ്ങളിൽ മാതൃക

2018-ൽ രൂപീകൃതമായ ചെമ്പകം പൂക്കുമിടം ചാരിറ്റി ആൻഡ് കൾച്ചറൽ ഫോറം, പുരോഗമന ആശയങ്ങളോട് ആഭിമുഖ്യമുള്ള സമാനമനസ്കരായ നാട്ടിലും വിദേശത്തുമുള്ളവരുടെ കൂട്ടായ്മയാണ്. രജിസ്റ്റർ ചെയ്ത സംഘടനയായി പ്രവർത്തിക്കുന്ന കൂട്ടായ്മയുടെ പ്രധാന പ്രവർത്തനമേഖല ജീവകാരുണ്യ പ്രവർത്തനങ്ങളാണ്.

നിർധനരായ നിരവധി പേർക്ക് ചികിത്സാ സഹായവും കുട്ടികളുടെ വിദ്യാഭ്യാസ ചെലവുകൾക്കുള്ള സഹായവും സംഘടന ഇതിനകം നൽകിയിട്ടുണ്ട്. സംഘടനയുടെ ജിസിസി കമ്മിറ്റി കഴിഞ്ഞ മൂന്ന് വർഷമായി ദുബൈയിൽ മൂന്ന് മാസത്തിലൊരിക്കൽ രക്തദാന ക്യാമ്പുകളും സംഘടിപ്പിച്ചുവരുന്നുണ്ട്. ഓരോ ക്യാമ്പിലും 50-ഓളം പേർ പങ്കെടുക്കാറുണ്ട്.

വാർത്താസമ്മേളനത്തിൽ ഫോറം രക്ഷാധികാരി ടിഎംഎ കരീം പാണലം, ചെയർമാൻ ജഗദീഷ് ആറാട്ടുകടവ്, വൈസ് ചെയർപേഴ്സൺ വിജിത കൊപ്പൽ, ട്രഷറർ ശ്യാം പാടി, ജിസിസി കമ്മിറ്റി അംഗം സന്തോഷ് കോടോത്ത്, ചെമ്പകത്തണൽ നിർമാണ കമ്മിറ്റി അംഗം പുരുഷു അമെയ് എന്നിവർ പങ്കെടുത്തു.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: Chembakam Pookkumidam Charity and Cultural Forum is handing over a newly constructed house to a poor family in Nekraje, Kasaragod, under its 'Chembakathanal 2' project on August 23, 2026.

#KasargodVartha #KasaragodNews #CharityHouse #ChembakamPookkumidam #Nekraje #PJayarajan #KeralaNews #MalayalamNews #CPMKerala #DubaiCharity