Crisis | ചന്ദ്രഗിരി പാലം മരണത്തിലേക്കുള്ള വാതിലോ?

മുഹമ്മദലി നെല്ലിക്കുന്ന്

(KasargodVartha) കാസർകോട് ചന്ദ്രഗിരി പാലം ഇന്ന് ഒരു ദുരന്തത്തിന്റെ പ്രതീകമായി മാറിയിരിക്കുന്നു. നിരവധി പേർ ഈ പാലത്തിൽ നിന്ന് പുഴയിലേക്ക് ചാടി ജീവനൊടുക്കിയതിന്റെ വാർത്തകൾ നമ്മളെ നടുക്കുന്നു. മാനസിക പിരിമുറുക്കം, സാമ്പത്തിക പ്രതിസന്ധി, വ്യക്തിബന്ധ പ്രശ്നങ്ങൾ തുടങ്ങിയ കാരണങ്ങളാൽ ആളുകൾ ജീവനൊടുക്കാൻ ഈ പാലത്തെ തെരഞ്ഞെടുക്കുന്നത് വളരെ ദുഖകരമായ സംഭവമാണ്. ഈ പാലം ആത്മഹത്യക്ക് വേണ്ടി മാത്രം തുറന്നിട്ട വാതിലാണോ?

അടുത്തകാലത്ത് സഹകരണ ബാങ്കിലെ പിഗ്മി കളക്ഷൻ ഏജന്റായ രമേശൻ ഈ പാലത്തിൽ നിന്ന് ചാടി മരിച്ച സംഭവം സമൂഹത്തെ നടുക്കിയിരുന്നു. ഇത്തരം സംഭവങ്ങൾ പതിവായി ആവർത്തിക്കുന്നത് ഈ പ്രശ്നത്തിന്റെ ഗൗരവം വ്യക്തമാക്കുന്നു. ഈ പാലം ആത്മഹത്യ ചെയ്യാൻ ശ്രമിക്കുന്നവർക്ക് ഒരു എളുപ്പമാർഗമായി മാറിയിരിക്കുന്നതിനാൽ, ഈ പ്രശ്നത്തിന് ഒരു പരിഹാരം കാണേണ്ടത് അനിവാര്യമാണ്. 

മൂന്നരപ്പതിറ്റാണ്ട് മുമ്പ്, അന്ന് എംപിയായിരുന്ന എം രാമണ്ണറൈ എംപി, എംഎൽഎ ആയിരുന്ന സിടി അഹ്‌മദ്‌ അലി എന്നിവരുടെ സാന്നിധ്യത്തിൽ പൊതുമരാമത്ത് മന്ത്രിയായിരുന്ന ടി കെ ഹംസയാണ് ചന്ദ്രഗിരി പാലം ഉദ്ഘാടനം ചെയ്തത്.  നാൾക്കുനാൾ വർദ്ധിച്ചു വരുന്ന ആത്മഹത്യകളിൽ നിന്നും തികച്ചും വ്യത്യസ്തമായ ആത്മഹത്യയാണ് ചന്ദ്രഗിരി പാലത്തിൽ നിന്നും പുഴയിൽ ചാടിയുള്ള മരണം. 

ഇതിൽ കോസ്റ്റൽ പോലീസുകാർക്ക് മുങ്ങിയും, പൊങ്ങിയും തിരച്ചിൽ നടത്തുന്നതിൽ വളരെയധികം ബുദ്ധിമുട്ടുകൾ സഹിക്കേണ്ടി വരുന്നുവെന്നത് വാസ്തവമാണ്. ദിശ തെറ്റിയൊഴുകുന്ന ഒഴുക്കിൽ പെട്ട് ദിവസങ്ങൾക്ക് ശേഷം ശവശരീരം ഏതെങ്കിലും കടൽ തീരത്തോ, നദിക്കരയിലോ ചെന്നടിയും. അപ്പോൾ വെള്ളം കുടിച്ച് വീർത്ത് വികൃതമായ രൂപത്തിലായിരിക്കും. മത്സ്യങ്ങൾ കൊത്തിത്തിന്നും കാണുമ്പോൾ പേടി തോന്നുന്ന വിധമാണ് ശരീരം കാണേണ്ടി വരുന്നത്.

പാലത്തിന്റെ ഇരുവശങ്ങളിലും മുള്ള് കമ്പിവേലി സ്ഥാപിക്കുന്നത് ഒരു പ്രാഥമിക പരിഹാരമായി കണക്കാക്കാം. ഇത് ആത്മഹത്യ ശ്രമങ്ങൾ തടയാൻ സഹായിക്കും. കാസർകോട് നഗരസഭ ഈ നിർദ്ദേശം ഗൗരവമായി പരിഗണിക്കേണ്ടതുണ്ട്. ആത്മഹത്യ ചെയ്യുന്നവരുടെ കുടുംബാംഗങ്ങൾ അനുഭവിക്കുന്ന വേദന അളക്കാനാവാത്തതാണ്. ഒരു മനുഷ്യജീവൻ അപൂർവ്വമാണ്, അത് നഷ്ടപ്പെടുന്നത് സമൂഹത്തിന് ഒരു വലിയ നഷ്ടമാണ്.

ഈ പ്രശ്നം ഒരു വ്യക്തിയുടെയോ ഒരു കുടുംബത്തിന്റെയോ പ്രശ്നമല്ല, ഇത് സമൂഹത്തിന്റെ മൊത്തത്തിലുള്ള പ്രശ്നമാണ്. അതിനാൽ, ഈ പ്രശ്നത്തിന് ഒരു ശാശ്വത പരിഹാരം കാണേണ്ടത് അനിവാര്യമാണ്. 

രാഷ്ട്രീയ രംഗത്ത് നിന്നും ആവശ്യം 

ഈ പ്രശ്നത്തിന്റെ ഗൗരവം മനസ്സിലാക്കി കാസർകോട് കാഞ്ഞങ്ങാട് കെ.എസ്.ടി.പി റോഡിലുള്ള ചന്ദ്രഗിരി പാലത്തിൽ മൈൽഡ് സ്റ്റീൽ ഗ്രിൽ നിർമ്മിക്കണമെന്ന് എൻ.എ നെല്ലിക്കുന്ന് എം.എൽ.എ ആവശ്യപ്പെട്ടിട്ടുണ്ട്. പാലത്തിൽ അപകടങ്ങളും ആത്മഹത്യകളും നിത്യസംഭവമായതിനാൽ ബ്രിഡ്ജ് കർബിലിൽ സ്റ്റീൽ ഗ്രിൽ നിർമ്മിച്ചാൽ മാത്രമെ ഇത് നിയന്ത്രിക്കാനും തടയാനും കഴിയുകയുള്ളൂ എന്ന് പൊതുമരാമത്ത് വകുപ്പ് മന്ത്രി പി.എ മുഹമ്മദ്‌ റിയാസിന് നൽകിയ കത്തിൽ എം.എൽ.എ വ്യക്തമാക്കിയിട്ടുണ്ട്.

യുവമോർച്ചയും ചന്ദ്രഗിരി പാലത്തിന് സുരക്ഷാ വേലിയും, സി.സി.ടി.വി ക്യാമറ സ്ഥാപിക്കണമെന്ന ആവശ്യവുമായി ജില്ലാ കളക്ടർക്ക് നിവേദനം നൽകിയിട്ടുണ്ട്. പാലത്തിന്റെ താഴെ ഭാഗം മദ്യപാനികളുടെയും ലഹരി ഉപയോഗിക്കുന്നവരുടെ ഇടമായി മാറിയിരിക്കുന്നതിനാൽ ഇത് നിയന്ത്രിക്കുന്നതിന് സിസിടിവി  സ്ഥാപിക്കാൻ നടപടി ഉണ്ടാകണമെന്നും യുവമോർച്ച നേതാക്കൾ പറയുന്നു.

ഒന്നിച്ച് പ്രവർത്തിക്കാം 

പാലത്തിൽ മുള്ള് കമ്പിവേലി സ്ഥാപിക്കുന്നത്, സിസിടിവി ക്യാമറകൾ സ്ഥാപിക്കുന്നത്, മാനസികാരോഗ്യ സംബന്ധമായ പ്രശ്നങ്ങൾക്ക് പരിഹാരം കാണുന്നതിനുള്ള സൗകര്യങ്ങൾ ഒരുക്കുന്നത് തുടങ്ങിയ നടപടികൾ സ്വീകരിക്കുന്നതിലൂടെ ഈ ദുരന്തം തടയാൻ സാധിക്കും. ഒരു ജീവൻ നഷ്ടപ്പെടുന്നത് സമൂഹത്തിന് ഒരു വലിയ നഷ്ടമാണ്. അതിനാൽ, ചന്ദ്രഗിരി പാലത്തെ ആത്മഹത്യാക്കാരുടെ ഒരു താവളമായി മാറാൻ അനുവദിക്കാതെ നാം എല്ലാവരും ഒന്നിച്ചുകൂടി പ്രവർത്തിക്കേണ്ടതുണ്ട്.

• ഈ വാർത്ത പങ്കിടുക! നിങ്ങളുടെ അഭിപ്രായം ഞങ്ങൾക്ക് പ്രധാനമാണ്. നിങ്ങളുടെ ഷെയർ ഞങ്ങളെ പ്രോത്സാഹിപ്പിക്കുന്നു.

#ChandragiriBridge #Prevention #MentalHealth #Kerala #India #SafetyFirst