Commendation | വാക്കുകൾ പ്രവൃത്തിയാക്കി; വീടിന് മുന്നിലെ റോഡ് സ്വയം വൃത്തിയാക്കി മാതൃകയായി നഗരസഭ ചെയർമാൻ അബ്ബാസ് ബീഗം

കാസർകോട്: (KasargodVartha) നഗരസഭയുടെ ശുചീകരണ പ്രഖ്യാപന യോഗത്തിൽ മുഴക്കിയ വാക്കുകൾ പ്രവൃത്തിയാക്കി, നാടിന് മാതൃകയായി മാറിയിരിക്കുകയാണ് നഗരസഭ ചെയർമാൻ അബ്ബാസ് ബീഗം. തന്റെ വീടിന്റെ മുൻവശത്തുള്ള റോഡ് സ്വയം വൃത്തിയാക്കിയാണ് അദ്ദേഹം കയ്യടി നേടിയത്.

നഗരസഭയുടെ ശുചീകരണ പ്രഖ്യാപന യോഗത്തിൽ സംസാരിച്ച അബ്ബാസ് ബീഗം, 'നമ്മുടെ വീടിന്റെ മുൻവശത്തുള്ള റോഡുകൾ നമ്മൾ തന്നെ വൃത്തിയാക്കിയാൽ നാടും നഗരവും ശുചിത്വത്തിൽ മുൻപന്തിയിൽ എത്തും' എന്നായിരുന്നു പറഞ്ഞത്. തന്റെ വാക്കുകൾ പ്രവൃത്തിയാക്കിയാണ് അദ്ദേഹം ഈ വാദം ശരിവെച്ചത്.

ഒഴിവുദിവസമായ ഞായറാഴ്ച, തന്റെ വീടിന്റെ മുൻവശത്തെ നെല്ലിക്കുന്ന് മസ്ജിദ് റോഡിലെ മാലിന്യങ്ങൾ സ്വയം നീക്കിയ അദ്ദേഹത്തിന്റെ നടപടി നഗരസഭയിലെ മറ്റ് ജനപ്രതിനിധികൾക്കും ഉദ്യോഗസ്ഥർക്കും പൊതുജനങ്ങൾക്കും പ്രചോദനമായി മാറി. നഗരസഭാ ചെയർമാന്റെ ഈ പ്രവർത്തനത്തെ പലരും അഭിനന്ദിച്ചു. ഒരു ജനപ്രതിനിധി എന്ന നിലയിലും നഗരപിതാവ് എന്ന നിലയിലും അദ്ദേഹം കാണിച്ച ഈ മാതൃക വളരെ പ്രശംസനീയമാണെന്നാണ് പൊതുവെ അഭിപ്രായം. 

നാടിനെ ശുചിയാക്കുന്നതിൽ എല്ലാവർക്കും ഒരു പങ്കുണ്ടെന്നും അതിനായി എല്ലാവർക്കും ഒന്നിച്ച് പ്രവർത്തിക്കാനാകുമെന്നും അബാസ് ബീഗം സ്വന്തം പ്രവൃത്തിയിലൂടെ ഓർമിപ്പിക്കുന്നു.

#Kasargod #cleanliness #inspiration #community #localhero #Kerala #India #municipality #chairman