Allegation | കാസർകോട് സോർട്ടിംഗ് ഓഫീസ് ലയന തീരുമാനം പിൻവലിക്കണമെന്ന് സിഎച്ച് കുഞ്ഞമ്പു എംഎൽഎ

കാസർകോട്: (KasargodVartha) തപാൽ സോർട്ടിംഗ് ഓഫീസ് കണ്ണൂർ ആർ.എം.എസുമായി ലയിപ്പിക്കാനുള്ള തീരുമാനം പിൻവലിക്കണമെന്ന് അഡ്വ. സി.എച്ച്. കുഞ്ഞമ്പു എം.എൽ.എ. കേന്ദ്ര വാർത്താവിനിമയ മന്ത്രി ജ്യോതിരാദിത്യ സിന്ധ്യയോട് രേഖാമൂലം ആവശ്യപ്പെട്ടു.

ഈ ലയനം മൂലം കാസർകോട് ജില്ലയിലെ തപാൽ സേവനങ്ങളെ ഗണ്യമായി ബാധിക്കുമെന്ന ആശങ്ക ഉയർന്നിട്ടുണ്ട്. 1984 മുതൽ പ്രവർത്തിക്കുന്ന കാസർകോട് സോർട്ടിംഗ് ഓഫീസ് പ്രതിദിനം 3500 സ്പീഡ് പോസ്റ്റ് കത്തുകളും 2500 രജിസ്റ്റർ ചെയ്ത കത്തുകളും ഉൾപ്പെടെ വലിയൊരു അളവിലുള്ള മെയിലുകൾ കൈകാര്യം ചെയ്യുന്നു. 24 മണിക്കൂർ പ്രവർത്തിക്കുന്ന ബുക്കിംഗ് കൗണ്ടർ ഉപഭോക്താക്കൾക്ക് സൗകര്യപ്രദമായ സേവനങ്ങൾ നൽകുന്നുണ്ട്.

കേരളത്തിൻ്റെ വടക്കേ അറ്റത്തുള്ള, ഭൂമിശാസ്ത്രപരമായ വെല്ലുവിളികൾ നേരിടുന്ന കാസർകോടിന് 100 കിലോമീറ്റർ അകലെയുള്ള കണ്ണൂർ ആർ.എം.എസ് സേവനങ്ങൾ ഉപഭോക്താക്കൾക്ക് അപ്രാപ്യമാക്കും. കാസർകോട് ഓഫീസ് അടച്ചാൽ തൃക്കരിപ്പൂരിലും മഞ്ചേശ്വരത്തും പോസ്റ്റ് ചെയ്യുന്ന കത്തുകൾ ജില്ലയ്ക്കുള്ളിൽ ഡെലിവറി ചെയ്യുന്നതിനായി 300 കിലോമീറ്ററിലധികം സഞ്ചരിക്കേണ്ടതുണ്ട് എന്നതിനാൽ കത്തുകൾ ലഭിക്കുന്നതിന് കാലതാമസം നേരിടും.

ലയനം മൂലം ജില്ലയിലെ ജീവനക്കാർ ബുദ്ധിമുട്ടിലാകും എന്നും സി.എച്ച്. കുഞ്ഞമ്പു എം.എൽ.എ. ചൂണ്ടിക്കാട്ടി. ലയന നിർദ്ദേശം പിൻവലിച്ച് കാസർകോട് ഒരു സ്പീഡ് പോസ്റ്റ്/പാഴ്സൽ ഹബ് സ്ഥാപിച്ച് ജില്ലയിലെ ഉപഭോക്താക്കൾക്ക് മികച്ച സേവനം ഉറപ്പാക്കണമെന്നും അദ്ദേഹം ആവശ്യപ്പെട്ടു.

#KasargodSortingOffice, #PostalMerger, #CHKunhambu, #KeralaPolitics, #PostalServices, #CustomerConcerns