കേന്ദ്രസർവകലാശാലയിൽ മലിനജല പ്രശ്നം: പരിശോധനയിൽ വൻവീഴ്ച കണ്ടെത്തി; 50 ലക്ഷം രൂപയുടെ പുതിയ പ്ലാൻ്റ് നിർമിക്കും

പെരിയ: (KasargodVartha) കേന്ദ്രസർവകലാശാലയിലെ മലിനജല സംസ്കരണ പ്ലാൻ്റിൽനിന്ന് മലിനജലം സമീപ പ്രദേശങ്ങളിലേക്ക് ഒഴുകിയെത്തുന്നതായുള്ള പരാതിയിൽ ജനപ്രതിനിധികൾ അടക്കം നടത്തിയ സംയുക്ത പരിശോധനയിൽ ഗുരുതരമായ വീഴ്ചകൾ കണ്ടെത്തി. മലിനജലം സമീപത്തെ തോട്ടിലേക്ക് ഒഴുകിയെത്തി കിണറുകളും കുളങ്ങളും മലിനമാകുന്നതായും ഇതുമൂലം ആരോഗ്യപ്രശ്നങ്ങൾ നേരിടുന്നതായുമുള്ള തണ്ണോട്ട്, കളിയങ്ങാനം പ്രദേശവാസികളുടെ പരാതിയെ തുടർന്നാണ് ബുധനാഴ്ച (ഓഗസ്റ്റ് 19) രാവിലെ പരിശോധന നടത്തിയത്. പുല്ലൂർ-പെരിയ, അജാനൂർ പഞ്ചായത്തുകളിലെ ജനപ്രതിനിധികളാണ് കേന്ദ്രസർവകലാശാല അധികൃതരുടെ സാന്നിധ്യത്തിൽ സ്ഥലം പരിശോധിച്ചത്. സർവകലാശാല അസിസ്റ്റൻ്റ് എൻജിനീയർ ശ്രീകാന്തും പരിശോധനയിൽ പങ്കെടുത്തു.

അജാനൂർ പഞ്ചായത്ത് പ്രസിഡൻ്റ് വിവി തുളസി, വൈസ് പ്രസിഡൻ്റ് മൂലക്കണ്ടം പ്രഭാകരൻ, പുല്ലൂർ-പെരിയ പഞ്ചായത്ത് വൈസ് പ്രസിഡൻ്റ് എംകെ ബാബുരാജ് എന്നിവരുടെ നേതൃത്വത്തിലായിരുന്നു പരിശോധന. പെൺകുട്ടികളുടെ രണ്ട് ഹോസ്റ്റലുകളിലെ ശുചിമുറികളിൽനിന്നുള്ള മാലിന്യം ശേഖരിക്കുന്നതിനായി നിർമിച്ച ടാങ്കുകൾ അശാസ്ത്രീയമായ രീതിയിലാണെന്ന് പരിശോധനയിൽ കണ്ടെത്തി. 

സമീപത്തെ മലിനജല സംസ്കരണ പ്ലാൻ്റിൻ്റെ അടിഭാഗത്തുനിന്ന് മലിനജലം കിനിഞ്ഞൊഴുകുന്നതും ശ്രദ്ധയിൽപ്പെട്ടു. ഇക്കാര്യം ജനപ്രതിനിധികൾ എൻജിനീയറുടെ ശ്രദ്ധയിൽപ്പെടുത്തി. എന്നാൽ നിലവിൽ ടാങ്കിൽനിന്ന് മലിനജലം പുറത്തേക്ക് ഒഴുകുന്ന സാഹചര്യമില്ലെന്നാണ് എൻജിനീയർ വിശദീകരിച്ചത്.

50 ലക്ഷം രൂപയുടെ പുതിയ പ്ലാൻ്റ്

ജനപ്രതിനിധികൾ രജിസ്ട്രാറുടെ ചുമതല വഹിക്കുന്ന ഡോ. വിബി സെമീർകുമാറുമായി ചർച്ച നടത്തി. പ്രശ്നത്തിന് ശാശ്വതപരിഹാരം കാണുന്നതിനായി ഒരു ലക്ഷം ലിറ്റർ ശേഷിയുള്ള പുതിയ മലിനജല സംസ്കരണ പ്ലാൻ്റ് നിർമിക്കുന്നതിനുള്ള നടപടി സ്വീകരിക്കുമെന്ന് അദ്ദേഹം ഉറപ്പുനൽകി. ഏകദേശം 50 ലക്ഷം രൂപ ചെലവ് പ്രതീക്ഷിക്കുന്ന പ്ലാൻ്റിന് അനുമതി ലഭിക്കുന്നതിനായി ഒരാഴ്ചയ്ക്കകം പുല്ലൂർ-പെരിയ പഞ്ചായത്തിൽ അപേക്ഷ നൽകുമെന്നും സർവകലാശാല അധികൃതർ അറിയിച്ചു. 

പുതിയ പ്ലാൻ്റ് നിർമിക്കുന്ന സ്ഥലം പഞ്ചായത്ത് നിർദേശിക്കുന്നതായിരിക്കണമെന്ന് ജനപ്രതിനിധികൾ ആവശ്യപ്പെട്ടു. നിലവിലുള്ള മലിനജല സംസ്കരണ പ്ലാൻ്റ് ജനവാസകേന്ദ്രത്തിന് സമീപത്തായതിനാൽ പുതിയ പ്ലാൻ്റ് പ്രവർത്തനസജ്ജമാകുന്നതോടെ നിലവിലുള്ള സംവിധാനം ഒഴിവാക്കണമെന്നും ജനപ്രതിനിധികൾ ആവശ്യപ്പെട്ടു.

കുടിവെള്ള സാമ്പിളുകൾ പരിശോധിക്കും

പരാതി ഉയർന്ന കളിയങ്ങാനം പ്രദേശത്തെ കിണറുകളിലെയും മറ്റ് ജലസ്രോതസ്സുകളിലെയും വെള്ളത്തിൻ്റെ ഗുണനിലവാരം പരിശോധിക്കാനും തീരുമാനിച്ചു. പഞ്ചായത്തും കേന്ദ്രസർവകലാശാലയും സംയുക്തമായി കുടിവെള്ള സാമ്പിളുകൾ ശേഖരിച്ച് പരിശോധന നടത്തും. 

മലിനജലം ഒഴുകിയെത്തുന്ന തോട് തണ്ണോട്ട്, കളരിക്കൽ, രാവണേശ്വരം തുടങ്ങിയ പ്രദേശങ്ങളിലേക്കും എത്തുന്നതിനാൽ പ്രശ്നം ഒരു പ്രദേശത്തെ മാത്രം ബാധിക്കുന്നതല്ലെന്നാണ് നാട്ടുകാരുടെ പരാതി. മലിനജലം ഒഴുകിയെത്തുന്ന പ്രദേശങ്ങളിലെ ജലസ്രോതസ്സുകൾ മലിനപ്പെടുന്നതായും കുട്ടികൾ ഉൾപ്പെടെയുള്ളവർക്ക് വിവിധ ആരോഗ്യപ്രശ്നങ്ങൾ നേരിടേണ്ടിവരുന്നതായും നാട്ടുകാർ ആരോപിക്കുന്നു.

നാട്ടുകാർ കർമസമിതി രൂപവത്കരിച്ചു

പ്രശ്നത്തിന് അടിയന്തര പരിഹാരം ആവശ്യപ്പെട്ട് കളിയങ്ങാനം, തണ്ണോട്ട് പ്രദേശങ്ങളിലെ നാട്ടുകാർ കർമസമിതി രൂപവത്കരിച്ചു. തണ്ണോട്ട് വിഷ്ണുമൂർത്തി ദേവസ്ഥാന പരിസരത്ത് ചേർന്ന യോഗത്തിൽ ദുരിതമനുഭവിക്കുന്ന കുടുംബങ്ങളിലേതുൾപ്പെടെ 100 പേർ പങ്കെടുത്തു. അജാനൂർ പഞ്ചായത്ത് പ്രസിഡൻ്റ് വിവി തുളസി യോഗം ഉദ്ഘാടനം ചെയ്തു. 

പഞ്ചായത്ത് അംഗം എ തമ്പാൻ അധ്യക്ഷനായി. വൈസ് പ്രസിഡൻ്റ് മൂലക്കണ്ടം പ്രഭാകരൻ, പുല്ലൂർ-പെരിയ പഞ്ചായത്ത് വൈസ് പ്രസിഡൻ്റ് എംകെ ബാബുരാജ്, എവി മിനി, രതീഷ് വെള്ളത്തട്ട, കെ രാജേന്ദ്രൻ, ഒ മോഹനൻ, ദാമോദരൻ തണ്ണോട്ട്, ബാലകൃഷ്ണൻ തണ്ണോട്ട്, കെവി കുഞ്ഞിരാമൻ എന്നിവർ സംസാരിച്ചു.

കർമസമിതി ഭാരവാഹികളായി എ തമ്പാൻ ചെയർമാനും ദാമോദരൻ തണ്ണോട്ട് കൺവീനറുമായി തിരഞ്ഞെടുക്കപ്പെട്ടു. തുടർന്ന് കർമസമിതി ഭാരവാഹികൾ കാസർകോട് എംപി രാജ്മോഹൻ ഉണ്ണിത്താനെ കണ്ട് നിവേദനം നൽകി. വിഷയത്തിൽ പഞ്ചായത്ത് തലത്തിലാണ് അന്തിമമായി തീരുമാനമെടുക്കേണ്ടതെന്ന് എംപി കർമസമിതി ഭാരവാഹികളെ അറിയിച്ചു.

കർശന നിലപാടുമായി നാട്ടുകാർ

കേന്ദ്രസർവകലാശാലയിൽനിന്നുള്ള മലിനജലം ദീർഘകാലമായി പ്രദേശത്തേക്ക് ഒഴുകിയെത്തുന്നതായി നാട്ടുകാർ പറയുന്നു. കിണറുകളും കുളങ്ങളും മലിനമാകുകയും കുട്ടികൾ ഉൾപ്പെടെയുള്ളവർക്ക് ആരോഗ്യപ്രശ്നങ്ങൾ ഉണ്ടാകുകയും ചെയ്തതായാണ് പരാതി. പ്രശ്നത്തിന് പരിഹാരം കാണാമെന്ന് സർവകലാശാല അധികൃതർ നേരത്തെ ഉറപ്പുനൽകിയിരുന്നെങ്കിലും കാര്യമായ നടപടി ഉണ്ടായില്ലെന്നാണ് നാട്ടുകാരുടെ ആരോപണം. സർവകലാശാലയുടെ മലിനജല സംസ്കരണ സംവിധാനത്തിൻ്റെ യഥാർഥ അവസ്ഥ നേരിട്ട് പരിശോധിച്ചപ്പോഴാണ് പ്രശ്നത്തിൻ്റെ ഗൗരവം ബോധ്യപ്പെട്ടതെന്നും നാട്ടുകാർ പറഞ്ഞു.

അടിയന്തരമായി ശാശ്വതപരിഹാരം ഉണ്ടായില്ലെങ്കിൽ ശക്തമായ ജനകീയ ഇടപെടൽ നടത്താനാണ് കർമസമിതിയുടെ തീരുമാനം. പരിശോധനാ സംഘത്തിൽ പുല്ലൂർ-പെരിയ ആരോഗ്യ സ്ഥിരംസമിതി ചെയർപേഴ്സൺ എവി മിനി, പഞ്ചായത്ത് അംഗങ്ങളായ സി കൃഷ്ണകുമാർ, എ സന്തോഷ് കുമാർ, അജാനൂർ പഞ്ചായത്ത് അംഗം എം തമ്പാൻ, പഞ്ചായത്ത് ഹെൽത്ത് ഇൻസ്പെക്ടർ എം വിനോദ്, ആനന്ദാശ്രമം കുടുംബാരോഗ്യകേന്ദ്രത്തിലെ ഹെൽത്ത് ഇൻസ്പെക്ടറും ടെക്നിക്കൽ ചുമതലയുള്ള എം നിശാന്ത് എന്നിവരും ഉണ്ടായിരുന്നു.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: A joint inspection by local representatives at the Central University of Kerala in Periya revealed severe flaws in the sewage treatment plant, causing water contamination in nearby areas. Authorities agreed to build a new 1-lakh-liter plant worth Rs 50 lakhs. An action committee was formed.

#KasargodVartha #CentralUniversityOfKerala #KasaragodNews #Periya #WaterPollution #KeralaNews #MalayalamNews #EnvironmentalIssue #LocalNews #AparnaNews