60 കിലോമീറ്റര്‍ ചട്ടം ലംഘിച്ച് ടോള്‍ പ്ലാസ അനുവദിക്കരുത്; കര്‍ശന നിര്‍ദേശങ്ങളുമായി കേന്ദ്ര സര്‍ക്കാര്‍ ഉത്തരവുകള്‍ ; കുമ്പള-ആരിക്കാടി വിവാദത്തില്‍ നിര്‍ണായക രേഖകള്‍ പുറത്ത്

- കുഞ്ഞിക്കണ്ണന്‍ മുട്ടത്ത്

കാസർകോട്: (KasargodVartha) ദേശീയപാതകളിൽ ടോൾ പ്ലാസ സ്ഥാപിക്കുന്നതുമായി ബന്ധപ്പെട്ട് 60 കിലോമീറ്റർ ദൂരപരിധി ചട്ടം കർശനമായി പാലിക്കണമെന്ന് വ്യക്തമാക്കുന്ന കേന്ദ്ര സർക്കാരിന്റെ നിരവധി ഔദ്യോഗിക ഉത്തരവുകൾ പുറത്തുവന്നു. ഇതോടെ കുമ്പള–ആരിക്കാടി ടോൾ പ്ലാസ വിവാദം പുതിയ വഴിത്തിരിവിലേക്ക് കടന്നിരിക്കുകയാണ്. 2017, 2018, 2023, 2025 വർഷങ്ങളിൽ റോഡ് ഗതാഗത–ദേശീയപാത മന്ത്രാലയം (MoRTH) പുറത്തിറക്കിയ ഉത്തരവുകളിൽ, ടോൾ പ്ലാസുകളുടെ സ്ഥാനം സംബന്ധിച്ച് വ്യക്തവും സംശയരഹിതവുമായ നിയമവ്യവസ്ഥകളാണ് നൽകിയിട്ടുള്ളത്.

നിയമം പറയുന്നത്

നാഷണൽ ഹൈവേസ് ഫീ റൂൾസ് (National Highways Fee Rules), 2008 ലെ റൂൾ 8(1), 8(2) പ്രകാരം ഒരേ ദേശീയപാതയിലും ഒരേ ദിശയിലും പ്രവർത്തിക്കുന്ന രണ്ട് ടോൾ പ്ലാസുകൾക്കിടയിൽ കുറഞ്ഞത് 60 കിലോമീറ്റർ ദൂരം നിർബന്ധമാണെന്ന് കേന്ദ്ര സർക്കാർ വീണ്ടും വീണ്ടും ആവർത്തിച്ച് വ്യക്തമാക്കിയിട്ടുണ്ട്. കൂടാതെ, ഒരു ടോൾ പ്ലാസ നഗരസഭാ/മുനിസിപ്പൽ പരിധിയിൽ നിന്ന് കുറഞ്ഞത് 10 കിലോമീറ്റർ അകലെയായിരിക്കണമെന്നും, പ്രത്യേക സാഹചര്യങ്ങളിൽ പോലും 5 കിലോമീറ്ററിനുള്ളിൽ ഒരിക്കലും സ്ഥാപിക്കരുതെന്നും ഉത്തരവുകളിൽ വ്യക്തമാക്കുന്നു.

മുൻകാല ഉത്തരവുകൾ

2017 സെപ്റ്റംബർ 5ന് പുറത്തിറക്കിയ ഓഫീസ് മെമോറാണ്ടത്തിൽ, ടോൾ പ്ലാസ ലൊക്കേഷൻ നിർദേശിക്കുന്ന ഡിപിആർ (Detailed Project Report) കൺസൾട്ടന്റുമാർ നിയമലംഘനങ്ങൾ നിർദ്ദേശിക്കരുതെന്നും, സംസ്ഥാന സർക്കാരുകളുടെ കത്ത് പ്രകാരമുള്ള സമ്മതം മുൻകൂട്ടി നേടണമെന്നും മന്ത്രാലയം നിർദേശിച്ചിരുന്നു. ഇതേ തുടർന്നാണ് 2018 നവംബർ 2ലെ ഉത്തരവിലൂടെ, നിയമലംഘനത്തോടെ സ്ഥാപിച്ച ടോൾ പ്ലാസുകൾ താൽക്കാലികമായി മാത്രം അനുവദിക്കാമെന്നും, രണ്ട് വർഷത്തിനകം നിയമാനുസൃത സ്ഥാനത്തേക്ക് മാറ്റണമെന്നും നിർബന്ധമാക്കിയത്.

ഇളവുകൾ അനുവദിക്കില്ല

2023 ജൂലൈ 6ന് പുറത്തിറക്കിയ ഉത്തരവിൽ, ടോൾ പ്ലാസ ദൂരപരിധി ചട്ടങ്ങളിൽ പിന്നീടുള്ള (ex-post facto) അനുമതി അനുവദിക്കില്ലെന്ന് കേന്ദ്ര സർക്കാർ വ്യക്തമായി പ്രഖ്യാപിച്ചു. ഡിപിആർ അംഗീകരിക്കുന്ന ഘട്ടത്തിലോ പദ്ധതിയുടെ പ്ലാനിങ് ഘട്ടത്തിലോ തന്നെ ടോൾ പ്ലാസ ലൊക്കേഷൻ ചട്ടപ്രകാരം ഉറപ്പാക്കണം. ഏതെങ്കിലും ഇളവ് അനിവാര്യമായാൽ, അത് സ്റ്റാൻ്റിംഗ് ഫിനാൻസ് കമ്മറ്റി (SFC) ഉൾപ്പെടെയുള്ള അപ്രൈസൽ കമ്മിറ്റികളുടെ മുമ്പാകെ വ്യക്തമായി രേഖപ്പെടുത്തുകയും, ബന്ധപ്പെട്ട അധികാരിയുടെ മുൻകൂർ അനുമതി നേടുകയും വേണമെന്ന് ഉത്തരവിൽ പറയുന്നു.

പുതിയ ഉത്തരവ് നിർണ്ണായകം

ഇതെല്ലാം ശക്തിപ്പെടുത്തുന്നതാണ് 2025 ഓഗസ്റ്റ് 22ന് പുറത്തിറക്കിയ ഏറ്റവും പുതിയ ഉത്തരവ്. 60 കിലോമീറ്റർ, 10 കിലോമീറ്റർ ചട്ടങ്ങളിൽ നിന്ന് ഇളവ് ആവശ്യപ്പെടുന്ന പ്രവണത വ്യാപകമാണെന്ന് ചൂണ്ടിക്കാട്ടിയ മന്ത്രാലയം, ഇത്തരം ഇളവുകൾ അത്യപൂർവ സാഹചര്യങ്ങളിൽ മാത്രമേ അനുവദിക്കാവൂ എന്നും നിർദേശിച്ചു. എല്ലാ പദ്ധതികളിലും സാങ്കേതിക അനുമതി നൽകുന്ന ഘട്ടത്തിൽ തന്നെ ടോൾ പ്ലാസ ചട്ടങ്ങൾ പരിശോധിക്കണമെന്നും യൂസർ ഫീ നോട്ടിഫിക്കേഷൻ (User Fee Notification) പുറപ്പെടുവിക്കുമ്പോൾ മന്ത്രിയുടെയോ സിസിഇഎ (CCEA)യുടെയോ അംഗീകാരം നിർബന്ധമാണെന്നും ഉത്തരവിൽ വ്യക്തമാക്കുന്നു.

നിയമപോരാട്ടത്തിന് കരുത്ത്

ഈ കേന്ദ്ര സർക്കാർ ഉത്തരവുകളുടെ പശ്ചാത്തലത്തിൽ, തലപ്പാടി–ആരിക്കാടി ടോൾ പ്ലാസുകൾക്കിടയിൽ വെറും 22 കിലോമീറ്റർ മാത്രം ദൂരമുള്ളത് നിയമവിരുദ്ധമാണെന്ന ആരോപണം ശക്തമാകുകയാണ്. 60 കിലോമീറ്റർ ചട്ടം ലംഘിച്ചുള്ള ടോൾ പിരിവ് നിയമപരമായി നിലനിൽക്കുമോയെന്ന ചോദ്യമാണ് ഇപ്പോൾ ഉയരുന്നത്. ടോൾ പ്ലാസ വിഷയത്തിൽ ഹൈക്കോടതിയിൽ കേസ് പരിഗണനയിൽ തുടരുന്ന സാഹചര്യത്തിൽ, കേന്ദ്ര സർക്കാരിന്റെ ഈ രേഖകൾ പ്രതിഷേധക്കാർക്കും നിയമപോരാട്ടത്തിനും നിർണായക ആയുധമായി മാറിയിരിക്കുകയാണ്.

നിയമം ലംഘിച്ച് ജനങ്ങളെ പിഴിയാൻ ആർക്കാണ് ഇത്ര വാശി? സത്യം പുറത്തായിട്ടും അധികൃതർ മൗനം തുടരുന്നത് ശരിയാണോ? നിങ്ങളുടെ അഭിപ്രായം പറയൂ.

Article Summary: New Central Government orders reinforce the 60km distance rule for toll plazas, strengthening the protest against the Kumbala-Arikkadi toll collection.

#Kasaragod #TollPlaza #MoRTH #Kumbala #Arikkadi #KeralaNews