ദേശീയപാതകളിൽ കന്നുകാലികൾ കുടുങ്ങുന്നു; സുരക്ഷാ നിർദേശങ്ങൾ അവഗണിച്ച് നിർമ്മാണക്കമ്പനികൾ, കർഷകർ ദുരിതത്തിൽ

മഞ്ചേശ്വരം: (KasargodVartha) ദേശീയപാത നിർമ്മാണത്തിലെ അശാസ്ത്രീയത കാരണം ദുരിതത്തിലായി കർഷകരും ക്ഷീരകർഷകരും. മൃഗങ്ങൾക്ക് പോലും സുരക്ഷിതമായി സഞ്ചരിക്കാൻ കഴിയാത്ത തരത്തിൽ മതിലുകൾ കെട്ടിപ്പൊക്കിയ ദേശീയപാതകളിൽ കന്നുകാലികൾ കുടുങ്ങുന്നത് പതിവായതോടെയാണ് കർഷകർ വലിയ ആശങ്കയിലായിരിക്കുന്നത്. ഇത് വാഹനങ്ങൾക്കും യാത്രക്കാർക്കും അപകടമുണ്ടാക്കുന്നു.

ദേശീയപാത അതോറിറ്റി (എൻഎച്ച്എഐ) മുന്നോട്ടുവെക്കുന്ന സുരക്ഷാ നിർദ്ദേശങ്ങളൊന്നും തങ്ങൾക്ക് ബാധകമല്ലെന്ന മട്ടിലാണ് നിർമ്മാണക്കമ്പനികളുടെ പ്രവർത്തനം. ദേശീയപാതകളിൽ അലഞ്ഞുതിരിയുന്ന കന്നുകാലികളുടെ സംരക്ഷണത്തിനായി 50 കിലോമീറ്റർ ഇടവിട്ട് ഷെൽട്ടറുകൾ അഥവാ സംരക്ഷണ കേന്ദ്രങ്ങൾ നിർമ്മിക്കണമെന്ന് അതോറിറ്റി നിർദ്ദേശിച്ചിരുന്നു. അലഞ്ഞുതിരിയുന്ന കന്നുകാലികൾ കാരണം വാഹനാപകടങ്ങൾ വർധിക്കുന്ന സാഹചര്യത്തിലാണ് ഈ നിർദ്ദേശം മുന്നോട്ട് വെച്ചതെന്നും ഇത് സംബന്ധിച്ച റിപ്പോർട്ടുകളിലുണ്ട്. എന്നാൽ, നിർമ്മാണം പൂർത്തിയായ തലപ്പാടി-ചെങ്കള റീച്ചിൽ ഒരിടത്തും ഇത്തരത്തിൽ ഷെൽട്ടറുകൾ നിർമ്മിച്ചിട്ടില്ല.

കഴിഞ്ഞ ദിവസം മഞ്ചേശ്വരത്ത് ദേശീയപാതയിൽ കുടുങ്ങിയ കന്നുകാലികളെ അതുവഴി വന്ന ആർ.ടി.ഒ.യും സിവിൽ ഡിഫൻസ് അംഗവും ചേർന്നാണ് ഏറെ ദൂരം നടന്ന് സുരക്ഷിതമായി സർവീസ് റോഡിൽ ഇറക്കിയത്. ഇത്തരത്തിൽ എല്ലാ പ്രദേശങ്ങളിലും കന്നുകാലികൾ ദേശീയപാതയിൽ കുടുങ്ങുന്നത് പതിവാകുന്നുണ്ട്. ഏതാനും ദിവസം മുമ്പ് മൊഗ്രാലിൽ ദേശീയപാതയിൽ കുടുങ്ങിയ കന്നുകാലികളെ നാട്ടുകാരാണ് മൊഗ്രാൽ പുത്തൂർ കടവത്തിലെ സർവീസ് റോഡിൽ എത്തിച്ച് രക്ഷിച്ചത്.

ക്ഷീരകർഷകർ ഏറെയുള്ള പ്രദേശങ്ങളിൽ കന്നുകാലികൾക്ക് റോഡ് മുറിച്ചു കടക്കാൻ ദേശീയപാതയിൽ 'കാറ്റൽ അണ്ടർ പാസ്' (Cattle Under Pass) സംവിധാനം ഒരുക്കണമെന്ന ആവശ്യം നേരത്തെ ഉയർന്നിരുന്നു. എന്നാൽ, ഈ നിർദ്ദേശത്തോടും നിർമ്മാണ കമ്പനികൾ മുഖം തിരിക്കുകയായിരുന്നു. ഈ ആവശ്യം വ്യാപകമായപ്പോൾ ഇതിനു പകരമായി കന്നുകാലികളെ പൂട്ടാനുള്ള സംരക്ഷണ കേന്ദ്രങ്ങൾ ഒരുക്കണമെന്ന നിർദ്ദേശമാണ് ദേശീയപാത അതോറിറ്റി മുന്നോട്ട് വെച്ചത്. എന്നാൽ, ഈ നിർദ്ദേശവും നടപ്പാക്കാൻ അധികൃതർ തയ്യാറാകുന്നില്ലെന്ന് കർഷകർ ആരോപിക്കുന്നു. അശാസ്ത്രീയമായ നിർമ്മാണരീതി കാരണം ക്ഷീരകർഷകർക്ക് ഭീമമായ നഷ്ടമാണ് ഉണ്ടാകുന്നത്. പശുക്കളെയും ആടുകളെയും വളർത്തുന്നതിൽ നിന്നും കർഷകർ പിന്മാറുന്ന സാഹചര്യവും നിലവിലുണ്ട്. നിർമ്മാണ കമ്പനികളുടെ ഓഫീസുകൾ പരാതികൾക്ക് പരിഹാരമില്ലാത്ത കേന്ദ്രങ്ങളായി മാറിയെന്നാണ് ക്ഷീരകർഷകർ ആരോപിക്കുന്നത്.

ഈ വിഷയത്തിൽ അധികാരികളുടെ ഭാഗത്ത് നിന്ന് എന്ത് നടപടികളാണ് ഉണ്ടാകേണ്ടത്? നിങ്ങളുടെ കാഴ്ചപ്പാട് കമന്റ് ചെയ്യൂ.

Article Summary: Cattle trapped on national highways; construction companies ignore safety.

#NationalHighway #Cattle #Farmers #RoadSafety #NHAI #Kasargod