കെ.എസ്.യു ജില്ലാ പ്രസിഡണ്ടിനെ കുത്തിയ സംഭവം; 13 സി.പി.എം പ്രവര്‍ത്തകര്‍ക്കെതിരെ വധശ്രമത്തിന് കേസ്

കാഞ്ഞങ്ങാട്: (www.kasargodvartha.com 14.01.2015) കെ.എസ്.യു കാസര്‍കോട് ജില്ലാ പ്രസിഡണ്ട് ബി.പി പ്രദീപ്കുമാറിനെ (27) കുത്തിപ്പരിക്കേല്‍പിച്ച സംഭവത്തില്‍ സി.പി.എം-ഡി.വൈ.എഫ്.ഐ പ്രവര്‍ത്തകരായ 13 പേര്‍ക്കെതിരെ ഹൊസ്ദുര്‍ഗ് പോലീസ് വധശ്രമത്തിന് കേസെടുത്തു.

അടോട്ട് സ്വദേശികളായ പ്രശോഭ്, വിപിന്‍, പ്രശാന്ത് എന്നിവര്‍ക്കും കണ്ടാലറിയാവുന്ന 10 പേര്‍ക്കുമെതിരെയാണ് കേസ്. പ്രതികള്‍ക്ക് വേണ്ടി തിരച്ചില്‍ നടത്തി വരുന്നതായും രാഷ്ട്രീയ വൈരാഗ്യമാണ് അക്രമത്തിന് കാരണമെന്നും ഹൊസ്ദുര്‍ഗ് പോലീസ് പറഞ്ഞു.

കെ.എസ്.യു നേതാവിന് നേരെയുണ്ടായ അക്രമത്തില്‍ പ്രതിഷേധിച്ച് ബുധനാഴ്ച കാസര്‍കോട് ജില്ലയില്‍ കെ.എസ്.യു. പ്രഖ്യാപിച്ച പഠിപ്പ് മുടക്ക് ആരംഭിച്ചു. പഠിപ്പ് മുടക്കിനോട് അനുബന്ധിച്ച് സംസ്ഥാന വ്യാപകമായി പ്രതിഷേധ പ്രകടനവും പൊതുയോഗവും സംഘടിപ്പിച്ചിട്ടുണ്ട്.

കുത്തേറ്റ പ്രദീപ് കുമാര്‍ കാഞ്ഞങ്ങാട്ടെ സ്വകാര്യാശുപത്രിയില്‍ ചികിത്സയിലാണ്. ചൊവ്വാഴ്ച വൈകിട്ട് 6.30 മണിയോടെ വെള്ളിക്കോത്ത് അടോട്ട് വെച്ചാണ് പ്രദീപ് കുമാറിന് നേരെ അക്രമമുണ്ടായത്. പാട്ടുത്സവം നടക്കുന്ന മഡിയന്‍ കൂലോം ക്ഷേത്രത്തിലേക്കുള്ള എഴുന്നള്ളത്തില്‍ പങ്കെടുക്കുന്നതിനിടെയാണ് അക്രമണമുണ്ടായത്.
ഞങ്ങളുടെ Facebookലും Twitterലും അംഗമാകൂ. ഓരോ വാര്‍ത്തയും കാസര്‍കോട് വാര്‍ത്തയിലൂടെ അറിയാം.