കാർട്ടൂണിലെ കഥാപാത്രം നേരിട്ടെത്തി; കാസർകോട് സാഹിത്യവേദിയുടെ ആദരമേറ്റുവാങ്ങി പി വി കൃഷ്ണൻ മാഷ്

തിരുവനന്തപുരം: (KasargodVartha) കാസർകോട് സാഹിത്യവേദിയുടെ നേതൃത്വത്തിൽ നടന്ന ആദരച്ചടങ്ങ് ഓർമകളുടെ പങ്കുവെക്കലായി. തിരുവനന്തപുരം ശ്രീകാര്യത്തിനടുത്ത് കരിയം 'ചിത്രം' വീട്ടിൽ വിശ്രമജീവിതം നയിക്കുന്ന കാർട്ടൂണിസ്റ്റും ചിത്രകാരനും ഫോട്ടോഗ്രാഫറുമായ പി.വി. കൃഷ്ണൻ മാഷിനെ മുൻ എം.പി.യും പി.എൻ. പണിക്കർ ഫൗണ്ടേഷൻ ചെയർമാനുമായ പന്ന്യൻ രവീന്ദ്രൻ സന്ദർശിച്ചു. അദ്ദേഹം അരികിലെത്തിയപ്പോൾ മാഷ് പെട്ടെന്ന് തന്നെ പന്ന്യൻ രവീന്ദ്രനെ തിരിച്ചറിഞ്ഞു.

കാസർകോട് സാഹിത്യവേദിയുടെ ആഭിമുഖ്യത്തിൽ ഉപഹാരം നൽകാനാണ് പന്ന്യൻ രവീന്ദ്രൻ എത്തിയത്. സാഹിത്യവേദി ഭാരവാഹികളായ എരിയാൻ ഷരീഫ്, റഹ്‌മാൻ മുട്ടത്തൊടി, എം.വി. സന്തോഷ് എന്നിവർ അദ്ദേഹത്തിൻ്റെ കൂടെയുണ്ടായിരുന്നു.

വരകളിൽ നിറഞ്ഞ ശരികൾ

കാർട്ടൂണുകളിൽ മാഷിൻ്റെ വരയിൽ എളുപ്പം വഴങ്ങുന്ന രണ്ടു പേരായിരുന്നു വി.എസ്. അച്യുതാനന്ദനും പന്ന്യൻ രവീന്ദ്രനും. 'കൃഷ്ണൻ മാഷുടേത് വെറും കാർട്ടൂണുകൾ ആയിരുന്നില്ല. അത് ശരി രാഷ്ട്രീയമേതെന്ന ചൂണ്ടുപലക കൂടിയായിരുന്നു'വെന്ന് പന്ന്യൻ ഓർത്തെടുത്തു.

എം.പി.യായിരിക്കെ, സി.പി.ഐ. സംസ്ഥാന സെക്രട്ടറിയായിരിക്കെ കൃഷ്ണൻ മാഷിൻ്റെ കാർട്ടൂണുകളിൽ പന്ന്യൻ നിറഞ്ഞു നിന്ന ഒരു കാലമുണ്ടായിരുന്നു. ഇടതുമുന്നണി തർക്കങ്ങൾ വാർത്തയാകുമ്പോൾ പ്രതികരിക്കുന്ന പന്ന്യൻ്റെ കാർട്ടൂൺ അന്ന് മാധ്യമങ്ങളിൽ അച്ചടിച്ചു വന്നിരുന്നു.

ആദരവും സ്നേഹവും

മാഷിന് പന്ന്യൻ രവീന്ദ്രൻ ഷാൾ അണിയിച്ചു. കാസർകോട് സാഹിത്യവേദിയുടെ മെമൻ്റോ നൽകി. കാസർകോടിൻ്റെ മധുരം പന്ന്യൻ നേരിട്ട് നൽകി. മാഷ് അത് കഴിച്ചു. പന്ന്യനെയും സാഹിത്യവേദി പ്രതിനിധികളെയും മകൾ രേഖ കൃഷ്ണൻ, പേരക്കുട്ടികളായ അച്ചു, അശ്വതി എന്നിവർ ചേർന്ന് സ്വീകരിച്ചു.

സംസാരത്തിനിടയിൽ പേനയും കടലാസും മകൾ രേഖ കൃഷ്ണൻ നൽകിയപ്പോൾ തൻ്റെ പഴയ കഥാപാത്രമായ പന്ന്യൻ്റെ മുടിനാരുകൾ അദ്ദേഹം വരച്ചു തുടങ്ങി. എന്നാൽ 'വയ്യ, വിരലുകൾ ചലിക്കുന്നില്ല' എന്ന് പറഞ്ഞ് അദ്ദേഹം അത് നിർത്തി. ഏറെ നേരം ചെലവഴിച്ച ശേഷമാണ് പന്ന്യനും സംഘവും അവിടെ നിന്ന് മടങ്ങിയത്. വീണ്ടും കാണാമെന്ന് പറഞ്ഞപ്പോൾ മാഷ് കൈകൾ ഉയർത്തി എല്ലാവരെയും അഭിവാദ്യം ചെയ്തു.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും പങ്കുവെക്കുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: Kasaragod Sahithya Vedi honored cartoonist PV Krishnan Mash at his residence.

#KasargodVartha #PannyanRaveendran #CartoonistPVKrishnan #KasaragodSahithyaVedi #KeralaCulture #TrivandrumNews #MalayalamNews #AparnaNews